مەملەكەت باسشىسى Power International Holding كومپانياسىنىڭ يەلەرى مۋاتاز ءال-حايات پەن رامەز ءال-حاياتتى قابىلدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
اڭگىمەلەسۋ بارىسىندا ەلىمىزدە ەنەرگەتيكا, تەلەكوممۋنيكاتسيا سالالارىنداعى ءىرى ينۆەستيتسيالىق جوبالاردى ىسكە اسىرۋ بارىسى قاراستىرىلدى.
Power International Holding (PIH) كومپانياسى قاشاعاندا گاز وڭدەۋ زاۋىتتارىن, بەينەۋ – بوزوي – شىمكەنت گاز قۇبىرىنىڭ ەكىنشى جەلىسىن, سونداي-اق جاڭا كومپرەسسور ستانتسياسى مەن اقتوبە – قوستاناي ماگيسترالدى گاز قۇبىرىن سالۋعا قاتىسادى. قاسىم-جومارت توقاەۆ بۇل جوبالار ەلىمىزدىڭ ەنەرگەتيكالىق قاۋىپسىزدىگىن نىعايتۋعا ەلەۋلى ۇلەس قوساتىنىنا نازار اۋداردى.
PIH ديرەكتورلار كەڭەسىنىڭ توراعاسى مۋاتاز ءال-حايات قازاق تاراپىمەن تەلەكوممۋنيكاتسيا, ەنەرگەتيكا سالالارىنداعى ينۆەستيتسيالىق جوبالار بويىنشا تۇبەگەيلى كەلىسىمگە كەلگەنىن ايتىپ, اتالعان باعىتتاعى جۇمىستى جۇزەگە اسىرۋ جوسپارىن تانىستىردى.
سونىمەن قاتار كومپانيا قازىر قىزىلوردا وبلىسىندا بۋ-گاز قوندىرعىسىن سالۋ جانە وبلىسارالىق ەلەكتر جەلىلەرىن تارتۋ جوبالارى بويىنشا كەلىسسوز جۇرگىزىپ جاتىر.
بۇدان بولەك, قاتار كونگلومەراتىنىڭ باسشىلارى جاساندى ينتەللەكت باعىتىندا بىرلەسكەن باستامالاردى قولعا الۋعا قىزىعۋشىلىق تانىتىپ وتىر.
مەملەكەت باسشىسى قازاقستان ۇكىمەتى تاراپىنان قاتارلىق ينۆەستورعا قولايلى جاعداي جاسالاتىنىن راستاپ, بارلىق جۇمىستى جوعارى ستاندارتتارعا ساي ناتيجەلى ورىنداۋدىڭ ماڭىزىن اتاپ ءوتتى.