الماتىدا ينفراقۇرىلىمدى جاڭارتۋ جۇمىستارى جالعاسىپ جاتىر

ماسەلەن, بيىل اۋەزوۆ اۋدانىندا 57 جوبا ىسكە اسىرىلادى. ونىڭ ىشىندە 41 اۋلانى اباتتاندىرۋ, جولداردى جوندەۋ, كوگالداندىرۋ جانە جاڭا دەمالىس ايماقتارىن قۇرۋ جۇمىستارى قاراستىرىلعان. اتالعان جوبالار الماتىدا ءومىر ءسۇرۋ ساپاسىن ارتتىرۋعا باعىتتالعان.

«مەن كوپبالالى انامىن. دەمالىس كۇندەرى اۋدان بويىنشا بالالارمەن سەرۋەندەۋگە شىعىپ تۇرامىز. ءۇي جانىنداعى ساياباق اباتتاندىرىلدى, قازىر وندا وتباسىمەن ۋاقىت وتكىزۋ ىڭعايلى. ويىن الاڭدارى, سپورت الاڭدارى پايدا بولدى, تۇرعىندار ءۇشىن بارلىعى قاراستىرىلعان», دەدى اقساي شاعىن اۋدانىنىڭ تۇرعىنى ءاليا ەسبولعانوۆا.

«حالىق قاتىساتىن بيۋدجەت» جوباسى اياسىندا بيىل جەتىسۋ اۋدانىندا 34 جوبا ىسكە اسىرىلىپ جاتىر, ونىڭ ىشىندە 24 اۋلا اۋماعىن, 2 جاياۋ جۇرگىنشىلەر ايماعىن, ساياباقتى, 3 سكۆەردى جوندەۋ جانە 3 اۆتوجول جۇيەلەرىن ورناتۋ جۇمىستارى قولعا الىنعان. ولاردى ىسكە اسىرۋ ءۇشىن الماتى اكىمى ەربولات دوساەۆتىڭ تاپسىرماسى بويىنشا قارجىلاندىرۋ 2 ملرد تەڭگەگە دەيىن ۇلعايتىلدى.

تۇرعىندار وزگەرىستەرگە وڭ باعا بەرىپ, قالا باسشىلىعىنا العىس ءبىلدىردى.

ء«بىزدىڭ اۋلا وزگەردى, تاپ-تازا ءارى جايلى بولدى, گۇلزارلارعا گۇلدەر وتىرعىزىلدى. ءبىزدىڭ وتىنىشىمىزگە نازار اۋدارىلدى. كوشەلەر الدەقايدا ۇقىپتى كورىنە باستادى. كەرەمەت جۇمىس!», دەدى جەتىسۋ اۋدانىنىڭ تۇرعىنى ۆيكتوريا تۋعانباەۆا.

اۋدان اكىمدىكتەرى تۇرعىنداردىڭ وتىنىشتەرىن ۇنەمى تىڭداپ, ورىنداۋعا تىرىسادى. ماسەلەن, بۇعان دەيىن جەتىسۋ اۋدانىنداعى كەمەل شاعىن اۋدانىنىڭ تۇرعىندارى قوقىستىڭ ۋاقتىلى شىعارىلماعانىنا شاعىمدانعان. قازىر تازالىق ماسەلەسى ايتارلىقتاي جاقساردى, بۇنى تۇرعىنداردىڭ وزدەرى دە بايقادى.

«كوشەلەر الدەقايدا تازا بولدى. جاڭا قوقىس جاشىكتەرى ورناتىلىپ, قوقىس ۇنەمى شىعارىلىپ تۇرادى. قالانىڭ تازالىعىن ساقتايىق!», دەدى كەمەل شاعىن اۋدانىنىڭ تۇرعىنى.

جالپى, وتكەن جىلى «حالىق قاتىساتىن بيۋدجەت» جوباسى بويىنشا الماتىدا 236 جوبا ىسكە اسىرىلدى. وسى جىلدىڭ سوڭىنا دەيىن تاعى 300-دەن استام جوبانى ىسكە اسىرۋ جوسپارلانىپ وتىر. باستامالاردىڭ ەداۋىر سانى قالانىڭ المالى, اۋەزوۆ جانە الاتاۋ سياقتى اۋداندارىندا ىسكە اسىرىلىپ جاتىر.

الماتى اكىمى ەربولات دوساەۆتىڭ تاپسىرماسى بويىنشا «حالىق قاتىساتىن بيۋدجەت» باعدارلاماسىن قارجىلاندىرۋ 2024 جىلى 18,8 ملرد تەڭگەگە دەيىن ۇلعايتىلعانىن (2023 جىلى - 12,9 ملرد) اتاپ ءوتۋ قاجەت.