جىل باسىنان قاراشاعا دەيىن مەملەكەتتىك الەۋمەتتىك ساقتاندىرۋ قورىنان جۇمىسىنان ايىرىلۋىنا بايلانىستى الەۋمەتتىك تولەم الۋشىلار سانى 256,6 مىڭ ادامدى قۇراعان. بۇل رەتتە بيىل 212,9 مىڭ ادامعا تولەم العاش رەت تاعايىندالعانىن ايتا كەتكەن ءجون. تولەمدەردىڭ جالپى سوماسى 70,6 ملرد تەڭگەگە جەتكەن.
قولدانىستاعى زاڭناماعا سايكەس جۇمىستان بوساتىلعان جۇمىسشىلار مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە, كەيىنگى 24 ايداعى تابىسىنا بايلانىستى 1 ايدان 6 ايعا دەيىن جۇمىسىنان ايىرىلۋى بويىنشا الەۋمەتتىك تولەم الادى. جوعالعان كىرىستىڭ 45%-ىنا دەيىنگى مولشەردەگى بۇل قاراجات مەملەكەتتىك الەۋمەتتىك ساقتاندىرۋ قورىنىڭ ەسەبىنەن تولەنەدى.
تولەم تاعايىنداۋعا جۇمىستان بوساتىلعان جۇمىسشىدان نە تالاپ ەتىلەدى؟ جۇمىسشى الدىمەن eGov.kz پورتالىنا تىركەلۋى قاجەت. كەيىن «جۇمىسقا ورنالاستىرۋ جانە جۇمىسپەن قامتۋ» بولىمىندە «جۇمىس ىزدەۋشى ادامداردى تىركەۋ» قىزمەتىن تاڭدايدى. ىزىنشە ونلاين-قىزمەتكە تاپسىرىس بەرىپ, بارلىق جولدى تولتىرادى. ەتسق ارقىلى قول قويىپ, ءوتىنىمدى جىبەرەدى. اراعا كۇن سالىپ, تۇرعىلىقتى جەردەگى مانساپ ورتالىعى بوس جۇمىس ورىندارىن ۇسىنادى. ەگەر جۇمىس تابىلماسا, 3 جۇمىس كۇنى ىشىندە قاشىقتان جۇمىسسىز مارتەبەسى بەرىلەدى. قاجەت بولعان جاعدايدا مانساپ ورتالىعىنىڭ قىزمەتكەرى قوسىمشا اقپارات جيناۋ ماقساتىندا حابارلاسۋى مۇمكىن. بۇل قىزمەتتى ونلاين رەجىمدە ەلەكتروندىق ەڭبەك بيرجاسى (enbek.kz) ارقىلى دا الۋعا بولادى.
جۇمىسسىز رەتىندە تىركەلۋ تۋرالى مالىمەتتەر جاريالانعان سوڭ, ەڭبەك مينيسترلىگىنىڭ اقپاراتتىق جۇيەسى پرواكتيۆتى فورماتتا مەملەكەتتىك الەۋمەتتىك ساقتاندىرۋ قورىنان تولەم تاعايىنداۋ جونىندەگى قىزمەت كورسەتۋگە كەلىسۋ ءۇشىن ءموبيلدى تەلەفونعا SMS-حابارلاما جىبەرەدى. كەلىسكەن جاعدايدا SMS-حابارلاماعا جاۋاپ بەرۋ قاجەت. تولەم اۆتوماتتى تۇردە تاعايىندالادى.
مەملەكەتتىك الەۋمەتتىك ساقتاندىرۋ قورىنىڭ قاراجاتى ەسەبىنەن جۇمىستان ايىرىلعان جاعدايدا تاعايىندالاتىن الەۋمەتتىك تولەم جۇمىستان شىعۋ سەبەبىنە قاراماستان تولەنەدى. الەۋمەتتىك تولەم – جۇمىسىنان ايىرىلىپ, قايتا جۇمىس ىزدەۋگە كىرىسكەن ازاماتتاردى قولداۋدىڭ ءبىر جولى.