قاراعاندىدا جاڭا ماركەتپلەيس جۇمىسىن باستادى

ساۋدا جانە ينتەگراتسيا ءمينيسترى ارمان شاققاليەۆ قاراعاندى وبلىسىنىڭ اكىمى ەرماعانبەت بۇلەكپاەۆپەن بىرگە ەلەكتروندى ساۋدا الاڭىنىڭ بىرلەسكەن قويماسىن ارالاپ كوردى. ولارعا بارلىق لوگيستيكا جولدارى كورسەتىلىپ, ىسكە قوسۋ ناتيجەلەرى مەن وتاندىق ماركەتپلەيستىڭ الداعى جوسپارلارى تۋرالى باياندالدى.

Teez ماركەتپلەيسىنىڭ قالاۋشىلارىنىڭ ءبىرى لينار حۋسنۋللين قازىرگى ۋاقىتتا ماركەتپلەيستىڭ 40 تاپسىرىس پۋنكتى بار ەكەنىن, الداعى ۋاقىتتا جوسپار بويىنشا ولاردىڭ سانى 127-گە جەتەتىنىن اتاپ ءوتتى. قازىردىڭ وزىندە 540 ساتۋشى تىركەلگەن جانە ءونىم اسسورتيمەنتىنىڭ سانى 50 مىڭنان اسادى. سونداي-اق كومپانيا ەلەكتروندىق قوسىمشا جاساپ, ونى قىسقا مەرزىمدە جۇكتەگەن ادامداردىڭ سانى 170 مىڭنان اساتىنىن جەتكىزدى.

ماركەتپلەيستىڭ قويمالارى ءتورت كورپۋستا ورنالاسقان, جالپى الاڭى - 25 مىڭ شارشى مەتر. ال 2030 جىلعا دەيىن ساقتاۋ قويمالارىن 120 مىڭ شارشى مەترگە دەيىن كەڭەيتۋدى جوسپارلاپ وتىر. قاراعاندىدا قۇرىلىس ءۇشىن جەر ۋچاسكەسى دە تابىلدى. الداعى ۋاقىتتا كومپانيا ينتەرنەت-ساۋدانىڭ كوشباسشىلارىنىڭ بىرىنە اينالۋعا بەل بۋىپ وتىر.

ارمان شاققاليەۆ بۇگىندە ەلەكتروندى ساۋدانىڭ قارقىندى دامىپ كەلە جاتقانىن جانە ول الەمدىك ەكونوميكالىق ءوسىمنىڭ ماڭىزدى درايۆەرى بولعانىن اتاپ ءوتتى.

«سوڭعى جىلدارى ەلەكتروندى ساۋدانىڭ كولەمى كۇرت ءوستى. قازاقستاندىق ەلەكتروندى ساۋدا ەكوجۇيەسىن دامىتۋ ماقساتىندا كولىك-لوگيستيكالىق ينفراقۇرىلىمدى جاقسارتۋ, قاعازسىز ساۋدانى ەنگىزۋ جانە حالىقتىڭ تسيفرلىق ساۋاتتىلىعىن ارتتىرۋ بويىنشا جۇمىس جۇرگىزىلىپ جاتىر. تەك 10 ايدىڭ قورىتىندىسى بويىنشا ساۋدا كولەمى وتكەن جىلدىڭ سايكەس كەزەڭىمەن سالىستىرعاندا 20%-عا ارتتى. بۇل كورسەتكىش 3 ترلن تەڭگەدەن اسادى. مۇنداي جوبالار ەكونوميكاعا وڭ اسەر ەتىپ, تۇتىنۋشىلار ءۇشىن تاۋارلارعا قولجەتىمدىلىكتى كەڭەيتەدى», دەدى ارمان شاققاليەۆ.

ساپار بارىسىندا ارمان شاققاليەۆ وساكاروۆ اۋدانىنىڭ كاسىپكەرلەرىمەن جانە تۇرعىندارىمەن كەزدەستى. ءىس-شارادا ساۋدا جانە ينتەگراتسيا مينيسترلىگىنىڭ نەگىزگى جەتىستىكتەرى جانە ساۋدا سەكتورىن ءارى قاراي دامىتۋ جوسپارلارى تالقىلاندى.

باستى نازار - ەلىمىزدەگى ساۋدا نارىعىن جاڭعىرتۋعا قويىلدى. ساۋدا جانە ينتەگراتسيا مينيسترلىگى ساۋدا نارىعىن جاڭعىرتۋ جانە تسيفرلاندىرۋ بويىنشا بەلسەندى جۇمىستار جۇرگىزىپ جاتىر. جول كارتاسى اياسىندا قاراعاندى وبلىسىنىڭ بەس ساۋدا بازارىنىڭ جاڭعىرتۋى جوسپارلانعان, بۇل پروتسەسس 2025 جىلى اياقتالادى. ولاردىڭ ىشىندە «شىعىس», «التىن اربا», «تۇلپار», «قايرات» جانە «گورنياك» بازارلارى بار.

مينيستر ىشكى ساۋدا سالاسىندا مەملەكەتتىك قولداۋ شارالارىن قامتاماسىز ەتۋ بويىنشا قۇزىرەتكە يە بولعانىن باسا ايتتى. قولداۋ ساتىپ الۋشىلار مەن بيزنەستىڭ سۇرانىستارىنا ساي ينفراقۇرىلىم قۇرۋعا مۇمكىندىك بەرەتىنىن ايتتى. قازىرگى ۋاقىتتا قاراعاندى وبلىسى بويىنشا دامۋ قورى 7 ميلليارد تەڭگە كولەمىندە 19 جوبانى قارجىلاندىرۋعا ارنالعان پۋل قۇرعان.

مينيستر سونداي-اق اۋىلدىق دۇكەن مەن ءىرى قالالىق سۋپەرماركەتكە بارىپ, سورەلەردە وتاندىق تاۋارلاردىڭ ورنالاسۋىن كوردى. ول جۇمىرتقا ساتىلاتىن بولىمگە دە كىرىپ, ءوندىرۋشىنىڭ باعاسىمەن ۇسىنىلعان – 470 تەڭگەگە ساۋدالانىپ تۇرعان س1 ساناتىنداعى جۇمىرتقالاردىڭ بار ەكەنىن كوردى.

ارمان شاققاليەۆ سونداي-اق «قاراعاندى نان» كورپوراتسياسىنىڭ جۇمىسىمەن تانىستى. بۇل كومپانيا نان, ماكارون, جۇمىرتقا جانە باسقا ونىمدەردى شىعارادى, سونداي-اق تەك قاراعاندى وبلىسىن عانا ەمەس ەلىمىزدىڭ وڭىرلەرىن قوسا العاندا, جاقىن شەتەلدەرگە دە ءونىم ەكسپورتتايدى. ماكارون ونىمدەرى رەسەي, وزبەكستان, ازەربايجان, قىتاي, قىرعىزستان جانە باسقا ەلدەرگە ايىنا 400-600 توننا كولەمىندە ەكسپورتتالادى. سونىمەن قاتار كونديتەرلىك ونىمدەر, ۇن, جۇمىرتقا, جۇمىرتقا ۇنتاعى مەن جارما سىرتقا شىعىپ جاتىر. قازىرگى ۋاقىتتا كومپانيا قىتاي نارىعىنا شىعۋدى جوسپارلاپ وتىر, ماقسات - تۇراقتى جانە ۇزاق مەرزىمدى كەلىسىمشارتتارعا قول جەتكىزۋ. ارمان شاققاليەۆ جەلتوقسان ايىندا ۇرىمشىدە قازاقستاننىڭ ۇلكەن پاۆيلونىن اشۋدى جانە ول جەردە كورپوراتسيانىڭ ونىمدەرىن ورنالاستىرۋدى ۇسىندى.

جۇمىس ساپارىنىڭ قورىتىندىسى بويىنشا مينيستر قاراعاندى وبلىسىنىڭ گەوگرافيالىق ورنالاسۋى مەن ينفراقۇرىلىمىنىڭ تيىمدىلىگىن ەسكەرە وتىرىپ, وبلىس قازاقستاننىڭ نەگىزگى ساۋدا-لوگيستيكالىق ورتالىعىنا عانا ەمەس, بۇكىل ورتالىق ازيا ايماعى ءۇشىن ماڭىزدى حابقا اينالۋعا الەۋەتى بار ەكەنىن اتاپ ءوتتى.