ەلىمىزدىڭ قوستاناي, كوكشەتاۋ, تالدىقورعان, ورال, تاراز, وسكەمەن, شىمكەنت, قىزىلوردا, سەمەي, پەتروپاۆل قالالارىندا وبلىستىق IT-فورۋمدارى ءوتتى. 3 مىڭنان استام قاتىسۋشى جيناعان بۇل ءىس-شارا وڭىرلەردە تسيفرلىق ترانسفورماتسيانى قولداۋ مەن تاجىريبە الماسۋدىڭ الاڭىنا اينالدى.
فورۋم بارىسىندا قاتىسۋشىلار تسيفرلاندىرۋ, جاساندى ينتەللەكت, كيبەرقاۋىپسىزدىك, ۇلكەن دەرەكتەر جانە مەملەكەتتىك قۇرىلىمداردا تەحنولوگيالاردى قولدانۋ سياقتى ماڭىزدى تاقىرىپتاردى تالقىلادى. قوناقتاردىڭ ەرەكشە قىزىعۋشىلىعىن وياتقان ستارتاپتار اللەياسىندا جاس كومپانيالار يننوۆاتسيالىق جوبالارىن ۇسىنىپ, ينۆەستورلارمەن تانىسىپ, مەنتورلاردان قۇندى كەڭەس الدى. سونىمەن قاتار بيزنەس-ۇدەرىستەردى اۆتوماتتاندىرۋ جانە اگروتەحنولوگيالارعا جاساندى ينتەللەكتىنى ەنگىزۋ سالاسىندا ماماندانعان قوستانايلىق «Aitomaton» ستارتابى مەن جاستارعا ارنالعان تاعىلىمدامالىق باعدارلامالار ۇسىناتىن شىمكەنتتىك «Amanbay Tech» ستارتابى تانىستىرىلدى.
«وڭىرلەردەگى تسيفرلاندىرۋ فورۋمدارى قازاقستانداعى IT-سالانىڭ قارقىندى دامۋى مەن ەلدىڭ تسيفرلىق ترانسفورماتسياسىندا شەشۋشى ءرول اتقارىپ وتىرعانىن ايقىن كورسەتتى. بۇل ءىس-شارالار وڭىردەگى ستارتاپتاردىڭ وسۋىنە ىقپال ەتىپ, IT-نارىقتاعى نەگىزگى ويىنشىلارمەن بايلانىس ورناتۋ الاڭىنا اينالدى. وڭىرلەردەن باستاۋ العان باستامالار قازىردىڭ وزىندە ەلدىڭ ەكوجۇيەسىنە وڭ ىقپالىن تيگىزىپ, تسيفرلىق قازاقستاننىڭ دامۋىنا ۇلەس قوسىپ وتىر. ءبىز جاس تالانتتاردىڭ تابىستارىن ماقتان تۇتىپ, ولاردى جاڭا جەتىستىكتەرگە جەتۋ جولىندا قولداۋدى توقتاتپايمىز», دەدى «Astana Hub» باسقارۋشى ديرەكتورى دانيا احمەتوۆا.
فورۋم اياسىندا IT-مەكتەپتەردىڭ كورمەلەرى, ويىن ازىرلەۋ, جاساندى ينتەللەكت جانە موبيلوگرافيا بويىنشا ۆوركشوپتار ۇيىمداستىرىلدى.
سونداي-اق «Grand Mobile» ءموبيلدى ويىنىنىڭ اۆتورى رومان لينەيتسەۆ تۋعان قالاسى – وسكەمەندەگى فورۋمعا قاتىسىپ, ءسوز سويلەدى. تۋعان جەرى مەن فورۋمنىڭ ەرەكشە اتموسفەراسىنان شابىت العان ول «Oskemen Hub»-تا وتكەن حاكاتوننىڭ جۇلدە قورىن ەكى ەسە ارتتىرىپ, ءوڭىردىڭ ەكوجۇيەسىنە ماڭىزدى ۇلەس قوستى. «تۋعان جەرىمىزدى ۇمىتپاي, ءوز جولىن باستاعان جاستارعا قولداۋ كورسەتۋ ماڭىزدى. بۇل جەردە مىقتى الەۋەت بار ەكەنىن بايقادىم», دەدى ر.لينەيتسەۆ.
ءبىر سوزبەن ايتقاندا, وبلىستىق IT-فورۋمدارى جەرگىلىكتى ازىرلەۋشىلەرمەن قاتار ءىرى تەحنولوگيالىق كومپانيالار مەن IT سالاسىنىڭ جەتەكشى ماماندارىنىڭ قىزىعۋشىلىعىن تۋدىردى. الەمگە تانىمال كومپانيا وكىلدەرى وبلىس ورتالىقتارىندا تاجىريبە الماسىپ, ۆوركشوپتار مەن ترەنينگتەر وتكىزىپ, گرانتتىق قولداۋ باعدارلاماسىن ۇسىندى.