ارمەنيانىڭ استاناسى – ەرەۆاندا كۇرەس تۇرلەرىنەن اسكەريلەر اراسىنداعى الەم چەمپيوناتى ءوز مارەسىنە جەتتى. جارىستا ەلىمىزدىڭ بالۋاندارى وتە جاقسى ناتيجە كورسەتىپ, جەتى جۇلدەگە قول جەتكىزدى.
العاشقى التىندى ەركىن كۇرەس شەبەرى مەيىرجان ءاشىروۆ قورجىنعا سالدى. 70 كگ سالماق دارەجەسىندە بەلدەسكەن ول رەسەي, موڭعوليا, يران, ءۇندىستاننىڭ وكىلدەرىنەن باسىم ءتۇستى. ءبىر ايتا كەتەرلىگى, فينالدا مەيىرجان 0:2 ۇتىلىپ جاتقانىنا قاراماستان, سوڭعى ساتتە جەڭىستى قارسىلاسىنىڭ ۋىسىنان ج ۇلىپ اكەتتى. ءسويتىپ, م.ءاشىروۆ ءوزىنىڭ سەگىز جىل بۇرىنعى كورسەتكىشىن قايتالاپ, سپورتتىق مانسابىندا ەكىنشى رەت ءدال وسىنداي اتاققا يە بولدى.
97 كگ سالماقتا ايقاسقان كاميل كۋرۋگليەۆكە دە التىن تۇعىرعا كوتەرىلۋ وڭايعا سوقپادى. باستاپقى باسكەلەردىڭ بارلىعىندا قارسىلاستارىن سىپىرا ۇتقان وتانداسىمىز فينالدا پارسى ەلىنىڭ پەحلەۆانى شارياتي نيا دانيالمەن ابدەن تىرەستى. ۇزاق ۋاقىت بويى يراندىق 3:1 ەسەبىمەن الدا كەلە جاتتى. وڭتايلى ساتتە ءوزىنىڭ وڭ جامباسىنا كەلەتىن ءادىستى ءساتتى ورىنداعان كاميل 6:3 ەسەبىمەن تارازى باسىن ەڭسەرىپ اكەتتى. سوندا دا شارياتي جەڭىستەن كۇدەرىن ۇزبەي, سوڭىنا دەيىن ايقاستى. اقىرى ەسەپ تەڭەستى – 6:6. باسەكە ءدال وسىلاي اياقتالدى. وسى ورايدا, العان ۇپايدىڭ ساپاسى ەسكەرىلىپ, جەڭىس كۋرۋگليەۆتىڭ ەنشىسىنە جازىلدى.
گرەك-ريم كۇرەسى شەبەرلەرى اراسىنان ءالىمحان سىزدىقوۆ ەرلەدى. 130 كگ سالماقتا كۇش سىناسقان قازاقتىڭ نار تۇلعالى ازاماتى جارىستى باسىنان اياعىنا دەيىن ءبىر دەممەن وتكىزدى. بۇرىن ونىڭ ءجيى شارشاپ قالاتىنىن بايقايتىن ەدىك. بۇل جولى مۇلدەم باسقا ءالىمحاندى كوردىك. شەشۋشى تۇستا يراندىق مەحدي كالانتاريدى 5:1 ەسەبىمەن قاپى قالدىرعان بيسولت دەتسيەۆتىڭ شاكىرتى الەم چەمپيونى اتاندى.
سونداي-اق ايدوس سۇلتانعالي (60 كگ, گرەك-ريم كۇرەسى), رۇستەم مىرزاعاليەۆ (86 كگ, ەركىن كۇرەس), سۆەتلانا اكينچەۆا (50 كگ, ايەلدەر كۇرەسى), مارينا سەدنەۆا (55 كگ, ايەلدەر كۇرەسى) قولا مەدالدى يەلەندى. ناتيجەسىندە, 76 ۇپاي جيعان ەلىمىزدىڭ قۇراماسى جالپى كوماندالىق ەسەپتە بەسىنشى ورىندى يەلەندى. الدىمىزدا – رەسەي (175 ۇپاي), يران (161), ارمەنيا (157), تۇركيا (141).
كۇرەس فەدەراتسياسىنىڭ ۆيتسە-پرەزيدەنتى داۋرەن جاباسوۆتىڭ ايتۋىنشا, بۇعان دەيىنگى اسكەريلەردىڭ الەم چەمپيوناتىندا جەرلەستەرىمىز ءدال مۇنداي زور تابىسقا قول جەتكىزگەن ەمەس. ءباسى جوعارى سايىستا 3 التىن, 4 قولا مەدال يەلەنۋىمىز وتاندىق بالۋاندارىمىزدىڭ دۇرىس باعىتتا ەكەنىن اڭعارتادى.