رەسەيدىڭ «يزۆەستيا» گازەتىندە جاريالانعان مەملەكەت باسشىسى قاسىم-جومارت توقاەۆتىڭ «قازاقستان مەن رەسەي: ستراتەگيالىق سەرىكتەستىكتىڭ جاڭا كوكجيەگى» ماقالاسىندا ءبىلىم سالاسىنداعى ىنتىمىقتاستىق تۋرالى باياندالدى, دەپ حابارلايدى Egemen.kz.
قاسىم-جومارت توقاەۆ ەلىمىزدىڭ وڭتۇستىك ايماقتارىندا ورىس مەكتەپتەرىن اشۋدى جوسپارلاپ جاتقانىن ايتىپ, سوعان سايكەس بىزبەن ىرگەلەس جاتقان رەسەي قالالارىندا دا قازاق مەكتەپتەرى اشىلادى دەگەن سەنىمىن جەتكىزدى.
«قازىر رەسەيدىڭ وقۋ ورىندارىندا قازاقستاننان بارعان 60 مىڭعا جۋىق ستۋدەنت ءبىلىم الىپ ءجۇر. استانادا ماسكەۋ مەملەكەتتىك حالىقارالىق قاتىناستار ينستيتۋتىنىڭ فيليالىن, ال ومبىدا ءال-فارابي اتىنداعى قازاق ۇلتتىق ۋنيۆەرسيتەتىنىڭ وكىلدىگىن اشۋ جوسپارىمىزدا بار. ەلىمىزدە 3500-دەن استام مەكتەپ پۋشكين تىلىندە ءبىلىم بەرەدى, تەلەارنالار مەن راديوستانتسيالار حابار تاراتادى, گازەتتەر مەن جۋرنالدار شىعادى. بارلىق دەرلىك وڭىردە كورەرمەننىڭ كوزايىمى بولىپ جۇرگەن ورىس دراما تەاترلارى بار», دەدى قاسىم-جومارت توقاەۆ.