تۇركيانىڭ انكارا قالاسىندا ورنالاسقان پرەزيدەنتتىك ۇلتتىق كىتاپحانادا «Turktav» تۇركى تاريحى جانە مادەنيەتى قورى, «KÖK TUĞ» قازاق مادەنيەتى قاۋىمداستىعىنىڭ ۇيىمداستىرۋىمەن م.اۋەزوۆ اتىنداعى ادەبيەت جانە ونەر ينستيتۋتىنىڭ باس ديرەكتورى, اكادەميك, فيلولوگيا عىلىمدارىنىڭ دوكتورى كەنجەحان ماتىجانوۆتىڭ «قازاقتىڭ وتباسى فولكلورى» ەڭبەگى «Kazak aile folkloru» اتاۋىمەن تۇرىك تىلىندە جارىق كوردى.
تۇساۋكەسەر راسىمىندە تۇركيا پرەزيدەنتتىك ۇلتتىق كىتاپحاناسىنىڭ ديرەكتورى ايحان تۋگلۋ, تۇركيا رەسپۋبليكاسىنداعى ەلشىلىگىنىڭ اتتاشەسى دىنمۇحامەد ءومىرالى, تۇركولوگيا عىلىمي-زەرتتەۋ ينستيتۋتى ديرەكتورىنىڭ ورىنباسارى, كىتاپتى تۇرىك تىلىنە اۋدارعان حاليل چەتين, «KOK TUĞ» قازاق مادەنيەتى قاۋىمداستىعىنىڭ باسشىسى قاراگوز احمەتوۆا ارنايى ءسوز الىپ, كەنجەحان ءىسلامجان ۇلىن قۇتتىقتاپ, ىزگى تىلەكتەرىن ءبىلدىردى. شارانى «Turktav» تۇركى تاريحى جانە مادەنيەتى قورىنىڭ ۆيتسە-پرەزيدەنتى اسەل لاقاەۆا جۇرگىزدى.
كەنجەحان ءىسلامجان ۇلى ۇيىمداستىرۋشىلارعا العىسىن ءبىلدىرىپ, باۋىرلاس ەلدەر حالقىنا ىستىق سالەمىن جولداپ: «تاريحى, تاعدىرى توعىسقان, ءتۇبى ءبىر باۋىرلاس تۇركيا مەن قازاقستان ەلدەرىنىڭ اراسىنداعى ادەبي-مادەني بايلانىستار نىعايىپ, ىنتىماق-بىرلىگى ارتا بەرسىن», دەدى.
ءىس-شاراعا انكارا حاجى بايرام ۆەلي ۋنيۆەرسيتەتىنىڭ پروفەسسورى گۇلجانات قۇرمانعاليەۆا-ەرجيلاسۋن, حادجەتتەپە ۋنيۆەرسيتەتى فولكلورتانۋ ءبولىمىنىڭ پروفەسسورى وزگۋل چوبانوگلۋ, «Turktav» تۇركى تاريحى جانە مادەنيەتى قورىنىڭ پرەزيدەنتى نيزامەتتين ايكۋرت, م.اۋەزوۆ اتىنداعى ادەبيەت جانە ونەر ينستيتۋتىنىڭ ءباسپاسوز حاتشىسى نۇر ماعازبەكوۆ جانە حادجەتتەپە, انكارا حاجى بايرام ۆەلي ۋنيۆەرسيتەتىنىڭ وقىتۋشىلارى, ادەبيەتتانۋشىلار, تاريحشىلار قاتىستى.
تۇرىك تىلىنە اۋدارىلعان ەڭبەك «تاقىرىپتىڭ تاريحناماسى», «جانر تابيعاتى», «الپەشتەۋ فولكلورى», «ۇيلەنۋ فولكلورى», «ازالاۋ فولكلورى», «تاريحي پوەتيكا ماسەلەلەرى» تاراۋلارىنان تۇرادى.
الماتى