قوستانايداعى ىبىراي التىنسارين مەموريالدىق مۋزەيىندە ارقالىق پەداگوگيكا ينستيتۋتى مۇراجايىنىڭ كوشپەلى كورمەسى اشىلدى. ارقالىقتان كەلگەن قۇندى جادىگەرلەردىڭ ىشىندە 1864 جىلى تورعايدا ىبىراي اشقان تۇڭعىش مەكتەپتىڭ قوڭىراۋى دا بار.
160 جىلدىق تاريحى بار كونە قوڭىراۋ بۇگىندە ىبىراي التىنسارين اتىنداعى ارقالىق پەداگوگيكا ينستيتۋتىنىڭ مۇراجايىندا ساقتاۋلى تۇر. كوشپەلى كورمە ينستيتۋت عالىمدارىنىڭ زەرتتەۋ جۇمىستارىنىڭ ناتيجەسىندە تابىلعان وزگە دە باعا جەتپەس دۇنيەلەردى, مىسالى, اعارتۋشىنىڭ تاباعىن, قىمىز ىشكەن توستاعانىن, ىبىرايدىڭ بالاسى ابدوللا مەن نەمەرەسى ناعيماعا تيەسىلى زاتتاردى, قۇندى سۋرەتتەر مەن دەرەكتى مۇراعاتتىق قۇجاتتاردى جۇرتشىلىق نازارىنا ۇسىنىپ وتىر.
«ەلىمىزدە ايگىلى اعارتۋشىعا ارناپ اشىلعان تۇڭعىش مۋزەي وسى ارقالىقتاعى ىبىراي التىنسارين اتىنداعى مەملەكەتتىك پەداگوگيكالىق ينستيتۋتىندا بولاتىن. بۇل – ەلىمىزدەگى اعارتۋ ءىسىنىڭ, ءبىلىم بەرۋ ۇدەرىسىنىڭ دامۋ تاريحىنان سىر شەرتەتىن العاشقى مۇراجايدىڭ ءبىرى. 1974 جىلدان بەرى جۇمىس ىستەپ كەلە جاتقان مۇراجايدىڭ اشىلۋىنا ينستيتۋتتىڭ تۇڭعىش رەكتورى مىرزاعالي تولەگەنوۆ پەن مۇراجايدىڭ العاشقى ديرەكتورى اسەت لاماشەۆ كوپ ەڭبەك ءسىڭىردى. ىبىراي التىنسارين مۇراسىن زەرتتەپ, زەردەلەپ, اتالعان مۋزەيدى ۇيىمداستىرۋدا, اسىرەسە, عالىم اسەت لاماشەۆ كوپ تەر توكتى. ول كىسى 1,5 مىڭنان استام جازبا قۇجاتتاردى, قوماقتى ەكسپوناتتار قورىن جيناپ, ەلگە تانىتتى. العاش ەكى بولمەدەن عانا تۇرعان ينستيتۋت ىشىندەگى شاعىن مۇراجايدى رەسپۋبليكا دەڭگەيىندەگى مەموريالدىق مۋزەي مارتەبەسىنە دەيىن جەتكىزىپ كەتتى. سوندىقتان بۇل مۋزەيدىڭ ۇلتتىق رۋحانيات تاريحىنداعى ورنى قاشاندا ەرەكشە. كورمەنى ۇيىمداستىرۋعا قولداۋ كورسەتىپ, قوستاناي جۇرتشىلىعىنىڭ, ەلىمىزدىڭ تۇكپىر-تۇكپىرىنەن كەلىپ وسىندا ءبىلىم الىپ جاتقان ستۋدەنت جاستاردىڭ تۇپنۇسقا قۇندى جادىگەرلەرمەن تانىسۋىنا مۇمكىندىك جاساعان ارقالىق ينستيتۋتىنىڭ رەكتورى ەرجان امىربەك ۇلىنا العىسىمىز شەكسىز», دەيدى مۋزەي ديرەكتورىنىڭ ورىنباسارى سالتانات وتەلباەۆا.
ارقالىقتان جەتكەن كوشپەلى كورمە قاراشا ايىنىڭ سوڭىنا دەيىن جۇمىس ىستەيدى.
قوستاناي وبلىسى