اباي وبلىسىنا قاراستى بورودۋليحا اۋدانى جەزكەنت مەكتەپ-ليتسەيىنىڭ 9-سىنىپ وقۋشىسى ءنۇرالي امانگەلديەۆ سىبايلاس جەمقورلىققا قارسى «ساتىلمايتىن الپامىس» اتتى كومپيۋتەرلىك ويىن جاساپ شىعاردى, دەپ حابارلايدى Egemen.kz.
ويىننىڭ باستى ماقساتى – وقۋشىلارعا سىبايلاس جەمقورلىقتىڭ زيانىن ءتۇسىندىرىپ, وعان قارسى تۇرۋ مادەنيەتىن قالىپتاستىرۋ.
ويىن كۆەست فورماتىندا جاسالعان. مۇندا ويىنشى وزىنە جاسىرىن اگەنت نەمەسە جۋرناليست ءرولىن تاڭداي الادى. سونداي-اق تەرگەۋدى كىمگە قاتىستى جۇرگىزەتىنىن دە ءوزى شەشەدى: سوت, پروكۋرور نەمەسە مەملەكەتتىك قىزمەتشى. ويىن بارىسىندا ول ءارتۇرلى ەپيزودتاردان ءوتىپ, جەمقورلىققا قارسى ارەكەتتەردىڭ قىر-سىرىن مەڭگەرەدى جانە ويىن سوڭىندا جەمقورلىقتى اشكەرەلەيدى.
وقۋ-اعارتۋ مينيسترلىگىنىڭ ءباسپاسوز قىزمەتى ءمالىم ەتكەندەي, قازىرگى ۋاقىتتا ويىن مەكتەپتە قۇقىق نەگىزدەرى ساباعىندا تاجىريبە رەتىندە قولدانىلىپ ءجۇر. اۆتور بولاشاقتا اتالعان جوبانى ۇيالى تەلەفوندارعا ارنالعان تەگىن قوسىمشا رەتىندە ءۇش تىلدە ۇسىنباقشى. وسى ماقساتتا ول وتكەن جىلى ءى رەسپۋبليكالىق سىبايلاس جەمقورلىققا قارسى جوبالار بايقاۋىندا جەڭىپ العان 1 000 000 تەڭگە سىياقىسىن ويىندى دامىتۋعا جۇمساعان. سونىمەن بىرگە ويىننىڭ ءار كەزەڭىنە ابايدىڭ قارا سوزدەرىن قوسۋ ارقىلى ونىڭ رۋحاني مازمۇنىن بايىتۋدى جوسپارلاپ وتىر.
«ويىن قازاقستانداعى ناقتى وقيعالارعا نەگىزىندەلگەن كوركەم رومان فورماتىندا جاسالعان. ءار ەپيزودتا قىلمىستىق كودەكسكە تۇسىندىرمە بەرىلىپ, وقۋشىلاردىڭ قۇقىقتىق ساۋاتى ارتادى. ال ويىن سوڭىندا كوپ ۇپاي جيناعان ويىنشى جەڭىمپاز اتانادى», دەيدى جاس ونەرتاپقىش.
«ساتىلمايتىن الپامىس» – وقۋشىلاردىڭ قۇقىقتىق ساۋاتتىلىعىن ارتتىرىپ, جەمقورلىققا قارسى مىنەز-ق ۇلىقتى قالىپتاستىرۋعا ارنالعان ەرەكشە جوباعا اينالدى.