الماتى قالاسىندا قازاقستان مەن رەسەي اراسىنداعى ءوزارا ىنتىماقتاستىقتى نىعايتۋ ماقساتىندا ۆولونتەرلىك ۇيىمدارىنىڭ سلەتى ۇيىمداستىرىلدى.
سلەتتىڭ اشىلۋىنا قر مادەنيەت جانە اقپارات ءمينيسترى ايدا بالاەۆا, سونداي-اق رەسەي فەدەراتسياسى پرەزيدەنتىنىڭ شەت ەلدەرمەن وڭىرارالىق جانە مادەني بايلانىستار جونىندەگى باسقارماسى باسشىسىنىڭ ورىنباسارى انتون رىباكوۆ, ەكى ەلدىڭ ۆولونتەرلىك قوزعالىس وكىلدەرى قاتىستى.
ايدا بالاەۆا جينالعانداردى الداعى حالىقارالىق ۆولونتەر كۇنىمەن قۇتتىقتاپ, مەملەكەت پەن ۆولونتەرلىك قاۋىمداستىق اراسىنداعى سەرىكتەستىكتىڭ ماڭىزدىلىعىن اتاپ ءوتتى.
«قازاقستان پرەزيدەنتى قاسىم-جومارت توقاەۆ ۆولونتەرلەر قىزمەتىنە ۇلكەن كوڭىل ءبولىپ وتىر. مەملەكەت باسشىسى, اسىرەسە, سالاداعى حالىقارالىق ىنتىماقتاستىقتى دامىتۋعا باسا نازار اۋدارىپ وتىر. بۇگىن ءبىز قازاقستان مەن رەسەيدەگى ۆولونتەرلەر قوزعالىسى قۋاتتى كۇشكە, مەيىرىمدى ازاماتتاردىڭ جۇدىرىقتاي جۇمىلۋىنىڭ جارقىن ۇلگىسىنە, حالىقتار اراسىنداعى بايلانىستاردى نىعايتاتىن, ماڭىزدى الەۋمەتتىك ماسەلەلەردى شەشۋگە ىقپال ەتەتىن قوزعالىسقا اينالدى دەپ سەنىممەن ايتا الامىز», دەدى مينيستر.
سونداي-اق ايدا بالاەۆا مەملەكەت باسشىسىنىڭ باستاماسىمەن 2020 جىلدىڭ قازاقستاندا ۆولونتەرلەر جىلى دەپ جاريالانعانىن, بۇل ۆولونتەرلەر قوزعالىسىنا قۋاتتى سەرپىن بەرگەنىن ايتىپ, قازاقستانداعى ۆولونتەرلىكتى مەملەكەتتىك قولداۋ شارالارىنا توقتالدى.
مەملەكەتتىك ورگاندار جىل سايىن ۆولونتەرلەر قاۋىمداستىعىمەن بىرلەسىپ 50-دەن استام جوبانى جۇزەگە اسىرىپ, باستامالاردى ىسكە اسىرۋ ءۇشىن 240 شاعىن گرانت بەرەدى.
بۇگىندە ەلىمىزدە 240 مىڭنان استام بەلسەندى ۆولونتەر بار, 740-تان استام ۆولونتەرلىك ۇيىمدار مەن مىڭنان استام باستاماشىل توپ جەمىستى جۇمىس ىستەپ كەلەدى.
ءسوز سوڭىندا مينيستر 2025 جىلى تابيعاتتى قورعاۋعا باعىتتالعان ءىس-شارالاردى وزەكتى ەتۋ ماقساتىندا بىرلەسكەن ەكولوگيالىق اكتسيالار, كورمەلەر, سەمينارلار مەن كونفەرەنتسيالار وتكىزۋدى ۇسىندى.
ۆولونتەرلەر سلەتىندە ءسوز سويلەگەن رەسەي فەدەراتسياسى پرەزيدەنتى اكىمشىلىگىنىڭ شەت ەلدەرمەن وڭىرارالىق جانە مادەني بايلانىستار باسقارماسى باسشىسىنىڭ ورىنباسارى انتون رىباكوۆ قازاقستانعا ءىس-شارانى ۇيىمداستىرعانى ءۇشىن العىس ايتتى.
«بىرلەسكەن جوبالاردى ساپالىق تۇرعىدا جاڭا دەڭگەيگە كوتەرۋدەگى نەگىزگى باستاماشىلاردىڭ ءبىرى – قازاقستان پرەزيدەنتى قاسىم-جومارت توقاەۆ. بۇل ءبىز ءۇشىن وتە ماڭىزدى. قازاقستان ۆولونتەرلەرمەن جۇمىس ىستەۋدە ۇلكەن تاجىريبەگە يە. ءبىز بۇل باعىتتى تولىق قولدايمىز جانە بۇگىنگى كەزدەسۋدىڭ ماڭىزدىلىعى كەلەسى جىلى, ءبىز جوسپارلاعانداي, رەسەي مەن قازاقستان ۆولونتەرلەرىنىڭ «تاتۋ كورشىلىك» اتتى تولىققاندى فورۋمى وتەتىنىندە دەپ بىلەمىز. بۇل ءبىزدىڭ ەلدەرىمىز اراسىنداعى بىرلەسكەن جوبالار پورتفەلىن بايىتا تۇسەدى دەپ سەنەمىن. ۆولونتەرلىك يدەيانى ناسيحاتتاۋ جانە ۆولونتەرلىك قوزعالىسقا كوبىرەك ادام تارتۋ قوعامدى بىرىكتىرۋگە, ءداستۇرلى مورالدىق جانە رۋحاني قۇندىلىقتاردى نىعايتۋعا ىقپال ەتەدى», دەدى ول.
سلەت اياسىندا ۆولونتەرلەر ءۇشىن تانىمدىق دارىستەر, سەمينار-ترەنينگتەر ۇيىمداستىرىلدى.
سونداي-اق رەسەيلىك قوناقتارعا الماتى قالاسىنداعى كوميۋنيتي ورتالىقتارىنىڭ جۇمىسى تانىستىرىلدى.