قوستاناي وبلىستىق تاريحي-ولكەتانۋ مۋزەيىندە ناۋرىزىم قورىعىنىڭ سان بوياۋعا مالىنعان اسەم تابيعاتى بەينەلەنگەن كوركەمسۋرەت كورمەسى اشىلدى.
كورمە «پلەنەر» دەپ اتالادى. كەسكىندەمە ونەرىندە بۇل ءسوز «سۋرەتشىنىڭ تابيعات اياسىندا, اشىق اسپان استىندا جۇمىس ىستەۋى» دەگەندى بىلدىرەدى ەكەن.
ءىس-شارانى ۇيىمداستىرۋشىلاردىڭ ايتۋىنشا, تامىز ايىندا وتكەن «پلەنەر – 2024» جوباسى اياسىندا ءبىر توپ كاسىبي سۋرەتشى ناۋرىزىم قورىعىنا ارنايى بارىپ, بىرەر كۇن تۇمسا تابيعات اياسىندا جۇمىس ىستەگەن. اتالعان كورمەدە وسى ساپاردا سالىنعان تابيعات سۋرەتتەرى كوپشىلىك نازارىنا ۇسىنىلدى. ەكسپوزيتسيا زالىنا قويىلعان كوركەمسۋرەت تۋىندىلارىندا قوستاناي ءوڭىرىنىڭ ءىنجۋ-مارجانى سانالاتىن ناۋرىزىم قورىعىنىڭ ورمان-دالاسى, وزەن-سۋ, قاراعاي-قايىڭى, قورىقتا تىرشىلىك ەتەتىن جان-جانۋارلار مەن قۇستار الەمى كورىنىس تاپقان.
جىلدا قىركۇيەك ايى جاقىنداعاندا وتەتىن ءداستۇرلى ءىس-شاراعا قاتىسقان قىلقالام شەبەرلەرىنىڭ ءبىرى – سۋرەتشىلەر وداعى وبلىستىق فيليالىنىڭ توراعاسى, كەسكىندەمەشى ۆاديم بىكوۆ.
«بيىلعى پلەنەر ەرەكشە ەستە قالدى. تابيعات اياسىندا ءوندىرتىپ جۇمىس ىستەدىك. ءبىر قىزىعى, ءبىز قورىققا كىرە سالىسىمەن جول بويى تۇنەرىپ تۇرعان اسپان شايداي اشىلىپ, كۇن رايى بىردەن جادىراپ سالا بەردى. ءبىز كەتكەنشە كۇن جىلى, اۋا رايى سۋرەت سالۋعا قولايلى بولدى. ناۋرىزىم قورىعىنىڭ عاجايىپ تابيعاتىن مەيلىنشە جان-جاقتى قامتىپ, بوياۋ تىلىندە سويلەتۋگە تىرىستىق», دەيدى كەسكىندەمەشى.
قوستاناي وبلىسى