جاركەنتتىڭ جۇگەرىسى مول

قازان ايىنىڭ العاشقى اپتاسىنان القاپتارىنا وراق سالعان جاركەنتتىك جۇگەرىشىلەر دالالىق ناۋقاندى قارا­شا­نىڭ باسىندا بەلۋاردان اسىرىپ, قىر­مان­دارىن «دالا ارۋىنىڭ» قىزىل دانىنە تولتىردى. قىرماندارعا 800 توننا جۇگەرى ءدانى, سونىڭ 110 مىڭ تونناسى ساتىلدى. ونىڭ 87 مىڭ تونناسى جاركەنت كراحمال-سىرنە زاۋىتىنا, 22800 تونناسى جەم تارتاتىن كاسىپورىندارعا وتكىزىلدى. ازىرگە 32800 توننا ءدان مەن سوبىقتى جۇگەرى شارۋالاردىڭ ءوز قويمالارىندا مال ازىعىنا قالدىرىلدى. بۇل كورسەتكىش ناۋقان تولىق اياقتالعانعا دەيىن تاعى ءوسۋى مۇمكىن.

«جاركەنت وڭىرىندە قاراشا ايىنىڭ ەكىنشى جارتىسىنا دەيىن جالپى وسىرىلگەن 23400 گەكتار جۇگەرى القابىنىڭ 23290 گەكتارى ورىلىپ بولدى. قالعان 100 گەكتاردان اسا القاپتاعى «دالا ارۋىنىڭ» ءدانى اي سوڭىنا دەيىن تۇتاس جينالماق. وڭىردەگى جۇگەرى جيناۋ ناۋقانى كوكتال, پەنجىم, بىرلىك, شولاقاي, ۇلكەنشىعان اۋىلدىق وكرۋگتەرىندە قارقىندى جۇرگىزىلدى. «كوكتال اگرو» جشس مەن «ورازباي ب.ز.», «ايكەرىم», «ەرنار» جەكە شارۋا قوجالىقتارى ەگىستىگىن تامشىلاتىپ سۋارۋ ارقىلى گەكتار ونىمدىلىگىن ارتتىردى.

ءبىراز جىل اۋىل شارۋاشىلىعى سالاسىندا ەڭبەك ەتكەن جانىبەك وحانوۆ بۇگىندە جۇگەرىنىڭ ءار گەكتارىنان 50 تسەنتنەر ءونىم جيناعان. پانفيلوۆتىق جۇگەرىشى دالا ارۋىن ءوسىرۋدىڭ جاڭا ادىستەرىن قولدانۋدا كوشباسشى سانالادى. اگرارشى بيىلعى ەگىن شىعىمىنا ءدان ريزا. ول 18 جىل بويى وسىنداي جەتىستىككە جەتىپ كەلەدى. ماماندىعى ەكونوميست بولسا دا اۋىل شارۋاشىلىعىنا دەن قويعان. بيىكتەردى باعىندىرۋ ءۇشىن الدىمەن سالانى زەرتتەپ, جۇگەرىدەن مول ءونىم الۋ جولدارىن ىزدەگەن. ناتيجەسى جامان ەمەس. بۇگىندە القاپتان گەكتار بەرەكەلىگىن ارتتىرىپ, جاڭا بەلەستەن كورىنىپ وتىر. ءوندىرىس ۇدەرىسى دە وڭ جولعا قويىلعان. سونداي-اق ول الدىمەن قۇنارسىز جەردەگى ونىمدىلىكتى ارتتىرۋ ءۇشىن جاڭا تاسىلدەردى ىزدەستىرۋدىڭ جانە تامشىلاتىپ سۋارۋ تەحنولوگياسىن يگەرۋدىڭ ماڭىزى زور ەكەنىن ايتادى.

«سۋ تاپشىلىعىنا قاتىستى ماسەلە بىزدە وسىدان ءبىراز جىل بۇرىن كوتەرىلگەن ەدى. وعان سۋ تاپشىلىعى سەبەپ بولدى. ءسويتىپ, بىردەن شەشىم قابىلداپ, تامشىلاتىپ سۋارۋعا كوشۋ قاجەت دەپ شەشتىك. بۇل باعىتتا ماڭداي تەرلەتىپ, جۇمىس جۇرگىزدىك. ناتيجەسى جەمىسىن جەگىزدى. سۋارۋ جابدىقتارىن جەتكىزۋ ءۇشىن بەس جىل كەتتى. ويتكەنى بۇل تۋرالى بىزگە ەشكىم كەڭەس ايتپادى. سوعان قاراماستان, تالاپتانىپ, قولىمىزدان ءىس كەلەتىنىن دالەلدەدىك. قازىر ءبارى جاقسى. ەگىن شىعىمدىلىعى ويدان شىعادى. قازىر ءبىزدىڭ ءىسىمىزدى كورىپ, تاجىريبەمەن بولىسكىسى كەلەتىندەر كوپ», دەيدى شارۋا يەسى.

ونىڭ ايتۋىنشا, دالا ارۋىن وسىرۋدەگى جەتىستىك جاڭا ويلاردىڭ تۋىنداۋىنا جول اشقان. قازىر كاسىپكەردىڭ جەكە جەم-ءشوپ بازاسى بار. وندا ساۋىن سيىرعا ارنالعان شاعىن ءسۇت فەرماسىن سالىنعان. وسى ۋاقىت ارالىعىندا انالىق تابىن ۇستاۋدىڭ ەۋروپالىق تەحنولوگياسى يگەرىلىپتى. مۇندا تاۋلىگىنە 15 توننا ءسۇت وندىرىلەدى. قازىر بۇل وبلىستاعى وزىق كاسىپورىنداردىڭ ءبىرى سانالادى. وندا 200-گە جۋىق ادام جۇمىس ىستەيدى. ءبارى جەرگىلىكتى تۇرعىندار.

اۋىل اقساقالدارى دا جۇگەرىشىنىڭ ەڭبەككەرلەرگە قامقورلىق جاساۋدى ءبىر ساتكە دە ەستەن شىعارمايتىنىن جانە اۋىل ءومىرىن جاقسارتۋعا بارىنشا تىرىسىپ جۇرەتىنىن ايتادى. الداعى ۋاقىتتا كاسىپورىندى كەڭەيتىپ, جاڭا ءوندىرىس ورىندارىن قۇرۋدى ماقسات تۇتادى. باستىسى, جاڭا ءىستى جۇزەگە اسىرۋدا قولداۋ كورسەتەتىن ىنتالاندىرۋ مەن سەنىمدى سەرىكتەستەردىڭ بولۋى ماڭىزدى دەپ ەسەپتەيدى. سوندا عانا ويعا العاننىڭ ءبارى جەمىسىن بەرىپ, جەڭىسكە جەتكىزەتىنىنە سەنىمدىلىگى مول.

جالپى, بيىل جۇگەرىنىڭ «ماركو», «پيونەر» جانە «تۇلپار» سۇرىپتارىن 6620 گەكتار جەرگە وسىرگەن پەنجىم اۋىلدىق وكرۋگىنىڭ ديقاندارى قازىر استىق جيناۋدى بارىنشا جەدەل اتقارىپ جاتىر. وكرۋگتەگى «بەشيروۆ», «رايىسوۆ», «بەيسەبەكوۆ», «قوجامبەرديەۆ» جشق جۇگەرى القاپتارىنداعى ورۋ جۇمىسىن اياقتاپ, بىرنەشە كومباين تاسىمالداۋشى جۇك كولىگى مەن تىركەمەلى تراكتور كەزەكتەگى قوجالىقتاردىڭ جۇگەرىسىن ورىپ جاتىر.تەحنيكالاردىڭ كۇندىز-ءتۇنى توقتاۋسىز جۇمىس اتقارۋىنا بار جاعداي جاسالعان.

جەتىسۋ وبلىسى