ءادىل سەيىتجانوۆ – جەزدى قالاشىعىنىڭ تۋماسى. سوندا تۋىپ-ءوستى, مەكتەپ ءبىتىردى, ەڭبەككە ارالاستى. دەگەنمەن كەيىنگى شيرەك عاسىردان استام عۇمىرى ساتباەۆ قالاسىندا ءوتىپ كەلەدى. جەزدىدەن قونىس اۋدارۋعا نە سەبەپ بولدى؟
– 90-جىلدارى ەسكىنىڭ ءبارى قيراپ, جارامسىز بولىپ جاتتى ەمەس پە؟ جەزدىدە الەۋەتى زور اۆتوبازا بولاتىن. مەن سوندا ەڭبەك جولىمدى باستاعان ەدىم, سلەسار بولىپ ىستەيتىنمىن. سول كاسىپورىن اياق استىنان ەشكىمگە كەرەكسىز بولدى دا شىقتى. ءجۇز قارالى ادام جۇمىسسىز قالدىق. ءبىر جاقسىسى, سول كەزدە بۇرىن بىزدە باسشى بولعان رايىمبەك اياشوۆ ەسىمدى ازامات ساتباەۆ قالالىق جىلۋمەن-سۋمەن قامتۋ كاسىپورنىنىڭ ديرەكتورى بولىپ ىستەيتىن ەدى. سول كىسىگە بارىپ, جۇمىس جاعىنان قاراسۋدى ءوتىندىم. راحاڭ – تەرىسى كەڭ كىسى. «كرەسلو سۇراپ تۇرعان جوقسىڭ عوي, ەكى قولعا ءبىر جۇمىس تابىلار. بۇرىننان ۇيرەنشىكتى جۇمىسىڭ مۇندا دا بار», دەدى دە سلەسار ەتىپ قابىلدادى. مىنە, سودان بەرى وسى كاسىپورىندا جۇمىس ىستەپ كەلەمىن, – دەيدى ءادىل, بار ءومىربايانىم وسى دەگەندەي.
ادامدى ابىرويعا قانشا جەردە ىستەگەنى ەمەس, قالاي ەڭبەك ەتكەنى بولەيدى ەمەس پە؟ ءادىل قۋانىش ۇلى جاڭا ەڭبەك ۇجىمىندا دا بىردەن-اق تىندىرىمدى ەڭبەگىمەن كوزگە ءتۇسىپ, سەنىمنەن شىعا ءبىلدى. ماقتاۋ, ماراپاتتار يەلەندى. ارادا وتكەن ۋاقىت ونىڭ ەڭبەك كىتاپشاسىنا ءبىر عانا وزگەرىس ەنگىزدى. ەگەر ول 1997 جىلى ساتباەۆ قالالىق جىلۋمەن-سۋمەن قامتۋ كاسىپورنىنا سلەسار بولىپ قابىلدانعان بولسا, قازىر سلەسارلار بريگاداسىنىڭ بريگاديرى. ونىڭ قاراۋىندا 20-دان اسا سلەسار بار. كوممۋنالدىق شارۋاشىلىق سالاسىنىڭ جۇمىسى ەشقاشان تاۋسىلىپ بىتپەيدى. كۇن جىلىدا قىسقى جىلۋ بەرۋ ماۋسىمىنا دايىندالاسىڭ, ال قىستا حالىققا دەر مەزگىلىندە جىلۋ جەتكىزىپ تۇرۋدى قامتاماسىز ەتۋدە كۇنى-ءتۇنى جۇمىس ىستەۋگە تاعى تۋرا كەلەدى. مۇنى ءوزىڭ قانشالىقتى سەزىنە بىلسەڭ, قاراماعىڭداعى جۇمىسكەرلەردى دە سونشالىقتى ورتاق ىسكە جۇمىلدىرا ءبىلۋ كەرەك. دەمەك بريگادير تالاپ قويا بىلۋگە دە, ءىستى ۇيىمداستىرۋ جاعىنا دا مىعىم بولۋ كەرەك. بۇل جاعىنان دا ءادىل قۋانىش ۇلى وزىنە جۇكتەلگەن سەنىمگە سەلكەۋ ءتۇسىرىپ كورگەن ەمەس.
ءا.سەيىتجانوۆ بيىل III دارەجەلى «ەڭبەك داڭقى» وردەنىمەن ماراپاتتالدى. ۇجىم باسشىلىعى ونىڭ جوعارى مەملەكەتتىك ناگراداعا ۇسىنىلعانىن وتە قۇپيا ۇستادى.
– جوعارى جاق بەكىتپەي قالسا, كوڭىلىن جارالاپ الارمىز دەگەن ويدا بولدىق. سوندىقتان قاشان ءسۇيىنشى حابار جەتكەنشە تىسىمىزدەن شىعارمادىق. وردەندى زور سالتانات ۇستىندە وبلىس اكىمى ءوزى تاپسىردى. بۇل قاراپايىم ەڭبەك ادامىنا دەگەن شىنايى قۇرمەتتىڭ بەلگىسى بولدى, – دەيدى اتالعان كاسىپورىننىڭ باسشىسى, وبلىستىق ءماسليحاتتىڭ دەپۋتاتى ەرجان توقىمباەۆ.
پرەزيدەنت قاسىم-جومارت توقاەۆ قاراپايىم ەڭبەك ادامدارىن قۇرمەتتەۋ تۋرالى ءار كەز ايتىپ, ەسكە سالىپ, مىندەتتەپ كەلەدى. ءادىلدىڭ كەۋدەسىن كورىكتەندىرىپ تۇرعان وردەن دە پرەزيدەنت تاپسىرماسىنىڭ مۇلتىكسىز ورىندالىپ جاتقانىن ايعاقتايدى.
ۇلىتاۋ وبلىسى,
ساتباەۆ قالاسى