قازاق ۇلتتىق قىزدار پەداگوگيكالىق ۋنيۆەرسيتەتى 80 جىلدىق مەرەيتويىن اتاپ ءوتتى. بالۋان شولاق مادەنيەت جانە سپورت سارايىندا وتكەن سالتاناتتى ءىس-شارادا عىلىم جانە جوعارى ءبىلىم ءمينيسترى ساياسات نۇربەك قۇتتىقتاۋ ءسوز سويلەپ, ۋنيۆەرسيتەتتىڭ پروفەسسورلىق-وقىتۋشىلىق قۇرامىن عىلىمعا قوسقان ۇلەسى ءۇشىن ماراپاتتادى.
«80 جىل بۇرىن سول كەزدەگى باسشىلار ەڭ قيىن كەزەڭدە, الەمدىك سوعىستىڭ ءتورتىنشى جىلىندا ۋنيۆەرسيتەت اشۋ تۋرالى ۇلكەن شەشىم قابىلدادى. ەجەلگى گرەكيادا ءبىر جاقسى ناقىل ءسوز بار. «قوعام قاشان ۇلكەن بولادى؟ سول قوعامداعى ادامداردىڭ ۇلكەندەرى كولەڭكەسىنە وتىرا المايتىنىن بىلە تۇرا اعاش ەككەن». 1944 جىلى ۇلكەن اعاش ەگىلسە, سول اعاشتىڭ كولەڭكەسىندە قازىر ءبىز وتىرمىز. بىرىنشىدەن, ۇستازدارعا, پروفەسسورلىق-وقىتۋشىلىق قۇرامعا, ۋنيۆەرسيتەت باسشىلىعىنا ايتارىم, اعاشتاردى ەگە بەرىڭىزدەر, شامشىعارىمىز سونبەسىن. قىزدار ۋنيۆەرسيتەتى – تەك ءبىلىم بەرۋ ورداسى ەمەس, ۇلتتىق قۇنىلىقتاردى دارىپتەۋشى جانە تىكەلەي قوعامعا جەتكىزۋشى ءبىلىم ورداسى», دەدى مينيستر.
سالتاناتتى ءىس-شاراعا ۋنيۆەرسيتەتتىڭ ديرەكتورلار كەڭەسىنىڭ توراعاسى ومارحان وكسىكباەۆ, پرەزيدەنت جانىنداعى ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ,ۇلتتىق ينجەنەرلىك اكادەميا پرەزيدەنتى باقىتجان جۇماعۇلوۆ, پارلامەنت ءماجىلىسى دەپۋتاتى, پرەزيدەنت جانىنداعى ايەلدەر ىستەرى جانە دەموگرافيالىق ساياسات جونىندەگى ۇلتتىق كوميسسيا مۇشەسى قاراقات ابدەن جاقسىلىققىزى, قازاقستاننىڭ تۇڭعىش ەڭبەك ەرى اياگۇل ميرازوۆا, «تۇران» ۋنيۆەرسيتەتىنىڭ رەكتورى, اكادەميك راحمان الشانوۆ, پرەزيدەنت جانىنداعى ۇلتتىق عىلىم اكادەمياسى ديرەكتورلار كەڭەسىنىڭ تاۋەلسىز ديرەكتورى, ۇلتتىق قۇرىلتاي مۇشەسى, اكادەميك كارىمبەك قۇرماناليەۆ, پارلامەنت ءماجىلىسىنىڭ دەپۋتاتى يرينا سميرنوۆا قاتىسىپ, قۇتتىقتاۋ ءسوز سويلەدى.
قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما توراعاسى-رەكتور قاناي گۇلميرا امىرحانقىزى ديرەكتورلار كەڭەسىنىڭ توراعاسىنا العىسىن ءبىلدىرىپ, ۋنيۆەرسيتەتتىڭ دامۋىنا قوسقان ۇلەسى ءۇشىن مەدال تابىس ەتتى.
«مەرەيتوي اياسىندا ءبىر جىل بويى كوپتەگەن كونفەرەنتسيالار, عىلىمي جوبالار جۇزەگە اسىرىلدى, ورتالىقتار اشىلدى, پروفەسسورلار ءدارىس وقىدى. بىراق بۇگىنگى كۇن ەرەكشە, سەبەبى ۋنيۆەرسيتەتىمىزدىڭ باستى جەتىستىگى, قوعامعا بەرگەن جاقسىلىعى سىزدەردىڭ الدارىڭىزدا وتىر. ۋنيۆەرسيتەتىمىزدىڭ وركەندەپ, وسۋىنە ۇلەس قوسىپ جۇرگەن ەل اعالارىنا العىس ايتامىن. ومارحان نۇرتاي ۇلى ۋنيۆەرسيتەتىمىزگە كولەمدى ينۆەستيتسيا الىپ كەلدى. قىزداردىڭ ءبىلىم الۋىنا قولداۋ ءبىلدىرىپ, مەملەكەت تاراپىنان الماتىنىڭ ورتالىعىنان عيمارات بەرىلۋىنە, زەرتحانالاردىڭ اشىلۋىنا سەپتىگىن تيگىزدى», دەدى رەكتور.
ءىس-شارا بارىسىندا اياگۇل ميرازوۆا ۇجىمدى قۇتتىقتاپ, ساتتىلىك تىلەدى.
«قازاق ۇلتتىق قىزدار پەداگوگيكالىق ۋنيۆەرسيتەتىنىڭ 80 جىلدىعى – بارشا قازاقستاننىڭ قۋانىشى دەسەم, ارتىق ايتقانىم ەمەس. وزىق ويلى ۇلتتى تاربيەلەۋدە انا مەن ۇستازدىڭ الار ورىنى ەرەكشە. ال قازاق ۇلتتىق قىزدار پەداگوگيكالىق ۋنيۆەرسيتەتى وسى جولدا ايانباي ەڭبەك ەتۋدە. نەبىر تۇلعالار وسى ۋنيۆەرسيتەتتەن تۇلەپ ۇشتى. تاريحى وتە تەرەڭ ۋنيۆەرسيتەتىمىز وركەندەي بەرسىن. بىلىكتى ۇستازدارىمىز, ەلدى الەمگە تانىتاتىن تۇلەكتەرىمىز كوپ بولعاي», دەدى اياگۇل تورەقىزى.
پارلامەنت ءماجىلىسى دەپۋتاتى يرينا سميرنوۆا قوعامدا قىز بالا تاربيەسىنىڭ ماڭىزدىلىعىنا توقتالىپ, «تاربيەلى, ىزگى قاسيەتتەرگە يە قىزدار بولاشاقتا ۇلتتىڭ ار-نامىسىن ساقتايتىن, قوعامعا ۇلگى بولاتىن ۇرپاقتى تاربيەلەۋدە ماڭىزدى رولگە يە», دەپ اتاپ ءوتتى.
ۋنيۆەرسيتەت تۇلەگى, اقىن مەملەكەتتىك سىيلىقتىڭ يەگەرى اقۇشتاپ باقتىگەرەەۆا, مەملەكەت جانە قوعام قايراتكەرى, «پاراسات» وردەنىنىڭ يەگەرى ورازكۇل اسانعازى, قوعام قايراتكەرى, فيلولوگيا عىلىمدارىنىڭ كانديداتى, پروفەسسور, «پاراسات» جانە 2 دارەجەلى «دوستىق» وردەندەرىنىڭ يەگەرى اسىلى وسمان قۇتتىقتاۋ ءسوز سويلەپ, بولاشاق ماماندارعا ساتتىلىك تىلەدى.
فورۋمدا ۋنيۆەرسيتەت رەكتورى گۇلميرا قاناي ءبىلىم جانە عىلىم, مادەنيەت سالالارىن دامىتۋعا ۇلەس قوسقان تۇلەكتەرگە العىس ايتىپ, مەرەيتويلىق توسبەلگى تابىستادى.
سالتاناتتى كەشتە قوناقتار كونتسەرتتىك باعدارلاما تاماشالاپ, ۋنيۆەرسيتەت تۇلەگى, قازاقستاننىڭ ەڭبەك سىڭىرگەن ۇستازى ورىنشا قارابالينا 1 كۋرس ستۋدەنتىنە ستۋدەنتتىك بيلەت تابىستادى.
الماتى