ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اقمادي سارباسوۆ مەملەكەتتىك ەڭبەك ينسپەكتسياسى كوميتەتى مەن ونىڭ اۋماقتىق دەپارتامەنتتەرىنىڭ قىزمەتكەرلەرىنىڭ قاتىسۋىمەن سىبايلاس جەمقورلىققا قارسى قۇندىلىقتار تۋرالى كەڭەس وتكىزدى.
باسقوسۋدا ا.سارباسوۆ سىبايلاس جەمقورلىقتىڭ الدىن الۋ, وعان جول بەرمەۋ مينيسترلىك جۇمىسىنىڭ نەگىزگى باعىتتارىنىڭ ءبىرى سانالاتىنىن ايتتى.
«سىبايلاس جەمقورلىققا قارسى ءىس-قيمىل تۋرالى زاڭناما شەڭبەرىندە مينيسترلىك جىل سايىن قۇرىلىمدىق بولىمشەلەردىڭ قىزمەتىندەگى سىبايلاس جەمقورلىق تاۋەكەلدەرىنە ىشكى تالداۋ جۇرگىزەدى. بيىل سىبايلاس جەمقورلىققا قارسى ءىس-قيمىل اگەنتتىگىمەن بىرگە سىبايلاس جەمقورلىق تاۋەكەلدەرىنە سىرتقى تالداۋ جۇرگىزدىك. مەملەكەتتىك ەڭبەك ينسپەكتسيا كوميتەتىنىڭ اۋماقتىق دەپارتامەنتتەرىنىڭ بارلىق قىزمەتكەرى مەملەكەتتىك قىزمەتكەردىڭ سىبايلاس جەمقورلىققا قارسى شەكتەۋلەرى تۋرالى ناقتى بىلۋگە ءتيىس», دەدى ا.سارباسوۆ.
مەملەكەتتىك ەڭبەك ينسپەكتسياسى كوميتەتى توراعاسىنىڭ مىندەتىن اتقارۋشى مۇرات مۇراتبەكوۆ ينسپەكتسيانىڭ نەگىزگى مىندەتتەرى تۋرالى اڭگىمەلەپ بەردى. ونىڭ ىشىندە ەڭبەك زاڭناماسىنىڭ ساقتالۋىنا مەملەكەتتىك باقىلاۋدى, قاۋىپسىز ەڭبەك جاعدايلارىن قامتاماسىز ەتۋ, سونداي-اق جۇمىسشىلاردىڭ قۇقىعى مەن بوستاندىعىن قورعاۋ, جۇمىسشى مەن جۇمىس بەرۋشىنىڭ ءوتىنىشىن, ارىز-شاعىمدارىن قاراۋ مىندەتى جونىندە كەڭىنەن باياندادى.
«بيىل جىل باسىنان قاراشاعا دەيىن ەڭبەك ۇجىمدارىندا 4552 تەكسەرۋ جۇرگىزىلىپ, 7146 بۇزۋشىلىق انىقتالدى. جۇمىس بەرۋشىلەرگە 338,9 ملن تەڭگەدەن استام سوماعا 3207 اكىمشىلىك ايىپپۇل سالىندى. بيىل سىبايلاس جەمقورلىق قىلمىس جاساعانى ءۇشىن دەپارتامەنت باسشىلارى مەن ولاردىڭ تىكەلەي باعىنىستى قىزمەتكەرلەرىن جاۋاپقا تارتۋ فاكتىلەرى تىركەلگەن جوق. مەملەكەتتىك ەڭبەك ينسپەكتسياسى كوميتەتىنىڭ جەمقورلىقتى جويۋ جونىندەگى نەگىزگى مىندەتتەرىنىڭ ءبىرى – سىبايلاس جەمقورلىققا قارسى يممۋنيتەت قالىپتاستىرۋ, سىبايلاس جەمقورلىق تاۋەكەلدەرىن بولدىرماۋ, جاۋاپكەرشىلىكتىڭ بۇلتارتپاستىعىن قامتاماسىز ەتۋ جونىندەگى ءىس-شارالاردى جەتىلدىرۋ. 15 وبلىستا مەملەكەتتىك ەڭبەك ينسپەكتسياسىنىڭ قىزمەتىنە قاتىستى سىبايلاس جەمقورلىق تاۋەكەلدەرىنە ىشكى تالداۋ جۇرگىزىلدى. ونىڭ ناتيجەلەرى بويىنشا جەمقورلىققا بارۋعا ىقپال ەتەتىن سەبەپتەر انىقتالدى. ءار ونى بولدىرماۋ جونىندە جۇمىستار جۇرگىزىلدى», دەدى م.مۇراتبەكوۆ.
كەزدەسۋ سوڭىندا ا.سارباسوۆ مەملەكەتتىك ەڭبەك ينسپەكتسياسى كوميتەتى مەن ونىڭ اۋماقتىق بولىمشەلەرىنىڭ باسشىلىعىنا 2025 جىلعا ارنالعان سىبايلاس جەمقورلىق قۇقىق بۇزۋشىلىقتارىنا ىقپال ەتەتىن سەبەپتەر مەن جاعدايلاردى انىقتاۋ, جويۋ جونىندەگى ءىس-شارالار جوسپارىن ازىرلەپ, بەكىتۋدى تاپسىردى.