ەلورداداعى ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە بەلگىلى جۋرناليست-عالىم, پروفەسسور, باس رەداكتورلار كلۋبىنىڭ ءبىرىنشى ۆيتسە-پرەزيدەنتى مۇراتبەك توقتاعازيننىڭ 60 جىلدىق مەرەيتويىنا وراي «جۋرناليستيكا مەن قازىرگى مەدياكوممۋنيكاتسيا پاراديگمالارى: تەوريالىق جانە پراكتيكالىق ماسەلەلەرى» اتتى حالىقارالىق عىلىمي-تاجىريبەلىك كونفەرەنتسيا ءوتتى, دەپ حابارلايدى Egemen.kz.
ءىس-شاراعا مادەنيەت جانە اقپارات, عىلىم جانە جوعارى ءبىلىم مينيسترلىكتەرىنىڭ, TURKSOY حالىقارالىق ۇيىمىنىڭ, قازاقستان جازۋشىلار وداعىنىڭ وكىلدەرى, وتاندىق جانە شەتەلدىك عالىمدار, باق باسشىلارى مەن ستۋدەنتتەر قاتىستى. كونفەرەنتسيا بارىسىندا مۇراتبەك بالقىبەك ۇلىنىڭ شىعارماشىلىق جولى تۋرالى اسەرلى باياندامالار وقىلدى. اسىرەسە, ونىڭ اقمولا قالاسىنىڭ تاريحي اتاۋىن قايتارۋداعى ەڭبەگى ەرەكشە اتاپ ءوتىلدى.
مەرەيتويدا پرەزيدەنت كەڭەسشىسى, ۇلتتىق عىلىم اكادەمياسىنىڭ اكادەميگى باۋىرجان ومار ۇلى ءوزىنىڭ بايانداۋىندا مۇراتبەك توقتاعازيننىڭ قايراتكەرلىك جانە شىعارماشىلىق قىرلارىنا توقتالدى.
«مۇراتبەك توقتاعازيننىڭ ءومىرى ءۇش كەزەڭگە بولىنەدى: ستۋدەنت, جۋرناليست, زەرتتەۋشى. ول مەكتەپ جاسىنان باستاپ-اق قايراتكەر رەتىندە قالىپتاسىپ, قازاق ءباسپاسوزىنىڭ دامۋىنا ايرىقشا ۇلەس قوستى. ونىڭ قاجىرلى ەڭبەگى مەن تىڭ يدەيالارى سارىدالانى قازاقيلاندىرۋعا جانە استانانىڭ ۇلتتىق كەلبەتىن قالىپتاستىرۋعا سەرپىن بەردى», دەدى ول.
مۇراتبەك توقتاعازين 2010 جىلى ءازىلحان نۇرشايىقوۆ شىعارماشىلىعىنا ارنالعان كانديداتتىق ديسسەرتاتسيا قورعاپ, جۋرناليستيكانىڭ ءتۇرلى جانرلارىندا 300-دەن استام ماقالا جاريالاعان. ونىڭ «اقمولا ءۇشىن ايقاس», «كىتاپ باسۋ ىسىندەگى كوممۋنيكاتيۆتى ساياسات» اتتى كىتاپتارى مەن كوپتەگەن عىلىمي ماقالاسى جاس زەرتتەۋشىلەر ءۇشىن قۇندى باعىت-باعدار بولىپ وتىر.