«Polytech Astana» پوليەتيلەن شىعارىپ, وسى تاۋارعا دەگەن سۇرانىستى وتەپ وتىر. جشس باسشىسىنىڭ ايتۋىنشا, 2004 جىلى قۇرىلعان كاسىپورىنعا 2013 جىلى №1 يندۋستريالىق پاركىنەن جەر ءبولىنىپ, تولىق نەگىزدە ءتۇرلى ولشەمدەگى قۇبىر شىعارۋ جولعا قويىلدى. وندىرىسكە 4,15 ملرد تەڭگە ينۆەستيتسيا سالىنعان.
«قازىر زاۋىتتا ءارتۇرلى ولشەمدەگى پلاستيكالىق قۇبىرلار جەتى ءوندىرىس جەلىسىنەن شىعىپ جاتىر. گەرمانيا, فينليانديا, قىتاي ەلدەرىنەن اكەلىنگەن تەحنولوگيا ۋاقىت تالابىنا ساي ءونىم جاساۋىمىزعا مۇمكىندىك تۋدىرىپ وتىر. زاۋىت جىلىنا 10-15 مىڭ توننا قۇبىر شىعارادى. ءونىم ساپاسىن تۇتىنۋشى كومپانيالاردىڭ الەۋەتىنە قاراپ-اق ايقىنداۋعا بولادى. تۇتىنۋشىلارىمىز ەلدىڭ 20 ءوڭىرىنىڭ بارىندە دەرلىك بار», دەيدى كاسىپورىن باس ديرەكتورى باعلان قۇدياروۆ.
نەگىزگى تاپسىرىس بەرۋشىلەر قاتارىندا «استانا سۋ ارناسى» مكك, «Kegoc», «قازاقتەلەكوم», «قازگەرستروي» جشس جانە باسقا دا ىرگەلى كومپانيالار بار.
ء«ونىم مەن يننوۆاتسيانى ۇنەمى جەتىلدىرە وتىرىپ, تۇتىنۋشى تالابىن تولىق ورىنداۋعا مۇددەلىمىز. سەبەبى كاسىپورىن ۇزاقمەرزىمدى دامۋعا باعىتتالعان. سەرىكتەستەرمەن قارىم-قاتىناستى نىعايتۋمەن قاتار, جوعارى دەڭگەيدە قىزمەت كورسەتىپ, قاجەت كەزىندە قولداۋ بىلدىرەمىز», دەيدى باس ديرەكتور.
كومپانيا تەك وندىرىسپەن عانا شۇعىلدانىپ قويماي, ەلدەگى ورتا ءبىلىم وشاقتارىمەن بايلانىس ورناتۋعا تىرىسادى. بۇگىندە استاناداعى ەكى تەحنيكالىق كوللەدجبەن مەموراندۋمعا وتىرعان. كوللەدج ستۋدەنتتەرى زاۋىتقا كەلىپ ءىس-تاجىريبەدەن وتەدى.
«تاجىريبەدەن وتۋگە كەلگەن 30 ستۋدەنتتىڭ ون شاقتىسى وسىندا تۇراقتى جۇمىسقا قالىپ قويادى. كاسىبي مامان تابۋ قيىن. پلاستيكالىق قۇبىرلار جاساۋعا وقىتىپ, ۇيرەتەتىن ءبىلىم ورىندارى ازىرشە ەلىمىزدە جوق. زاۋىت العاش اشىلعان كەزدە مامانداردى فينلياندياعا جىبەرىپ, وقىتىپ العانبىز. زاۋىتتىڭ جۇرەگى ءھام ۇستىنى بولىپ وتىرعان سول ساقا ماماندار كەلگەن ءاربىر جاس تۇلەكتى وسىنداعى كاسىپكە باۋليدى», دەيدى كاسىپورىننىڭ تەحنيكالىق ديرەكتورى مارات سادۋاقاسوۆ.
ونىڭ ايتۋىنشا, «Polytech Astana» كاسىپورنىنىڭ گازبەن جابدىقتاۋعا ارنالعان قۇبىرلارى جوعارى قىسىمعا جانە سىرتقى اسەرلەرگە توزىمدىلىكتى قامتاماسىز ەتەتىن جوعارى ساپالى پوليەتيلەننەن (پە) جاسالعاندىقتان, وتە ءتوزىمدى ءارى بەرىك. قۇبىرلار حالىقارالىق قاۋىپسىزدىك جانە ساپا ستاندارتتارىنا سايكەس كەلەدى. ال سۋ قۇبىرى پوليەتيلەن جانە پوليۆينيلحلوريدتەن (پۆح, پۆح-و) جاسالعان. ول دا اسا بەرىك, ەكولوگيالىق تۇرعىدا تازا ءارى كورروزياعا ءتوزىمدى.
«قازىر ونىمگە سۇرانىس بار. ايتسە دە, وتاندىق ۇلكەن كومپانيالار قاجەت قۇبىرىن قىتاي نەمەسە رەسەيدەن الدىرادى. ايتپەسە ءبىز شىعاراتىن ءونىم ساپاسى سىرتتان كەلەتىن تاۋاردان ءبىر مىسقال كەم ەمەس. ءتىپتى ارتىق دەۋگە بولادى. سوندىقتان ۇكىمەت قولداۋى تاعى ۇلعايىپ, ىرگەلى كومپانيالاردىڭ تەك وتاندىق ونىمدەردى ساتىپ الۋى قاجەتتىگى بەلگىلى ءبىر كەلىسىمشارتتا انىق كورىنىس تاپسا دەگەن تىلەك بار», دەدى م.سادۋاقاسوۆ.
تاۋلىگىنە 24 ساعات تەگەرشىگى اينالعان زاۋىتتا جۇمىسشىلار 4 اۋىسىممەن ەڭبەك ەتەدى. 100-دەن اسا ادام جۇمىس ىستەيدى. باسىم كوپشىلىگى – تەحنيكالىق, مەحانيكالىق ماماندىق يەلەرى. جۇمىسشىلاردى ءۇي مەن زاۋىت اراسىنا تاسىمالدايتىن ارنايى اۆتوبۋس بار. ءبىر مەزگىل تەگىن اس بەرىلەدى. ەڭبەكاقى كولەمى 200 مىڭ تەڭگەدەن باستالىپ, ەڭبەگى مەن لاۋازىمىنا قاراي ەسەلەنەدى ەكەن.