نازارباەۆى بار قازاقستان – سەنىممەن تۇراقتى داميتىن ەل!
نازارباەۆى بار قوعام – الاڭسىز ءومىر سۇرەتىن قوعام!
(وزىمدەگى وسى ءبىر سەنىممەن داۋىس بەردىم)
استانا قالاسىنىڭ ەسىل اۋدانىنداعى №91 سايلاۋ ۋچاسكەسىنە بارىپ داۋىس بەردىم. كەزەكتە تۇرۋعا تۋرا كەلدى. بىراق, سايلاۋ ۋچاسكەسىندەگى بۇل جولعى كەزەكتىڭ ءجونى مۇلدەم باسقا بولاتىن. سول كەزەكتە تۇرعانداردىڭ ءبارىنىڭ دە كوڭىلدەرى جارقىن, قاباقتارى اشىق ەدى, كوڭىلدەرىندە قۋانىش تۇردى. مەن ءوز باسىم, وتباسىممەن قازاقستاننىڭ قازىرگى پرەزيدەنتى نۇرسۇلتان ءابىش ۇلى نازارباەۆ ءۇشىن داۋىس بەردىم! وتانداستارىمنىڭ باسىم كوپشىلىگىنىڭ دە نازارباەۆ ءۇشىن داۋىس بەرەتىندىكتەرىنە سەنىمدى ەدىم. بۇعان كوڭىلىمدە ەش كۇمان دا بولعان جوق. ويتكەنى, تاۋەلسىز قازاق ەلىنىڭ تاريحى سول ەلدىڭ ەكى تىزگىن, ءبىر شىلبىرىن ءوز قولىنا ۇستاعان نۇرسۇلتان نازارباەۆتىڭ تاعدىرى, بۇعان كەرىسىنشە ەلباسىنىڭ تاعدىرى قازاق ەلىنىڭ تاعدىرى مەن تاريحى بولىپ قالىپتاستى. بۇل قوس تاعدىر – تۇتاس ءبىر حالىقتىڭ تاعدىرى! مىنە, سول قوس تاعدىر تاعى دا تاريح الدىنداعى ۇلى جاۋاپكەرشىلىك جۇگىن بىرگە كوتەرۋ ءۇشىن تاعى دا ادال كوڭىل, ادال نيەتپەن تابىسىپ وتىر. قازاقستاندىقتاردىڭ سايلاۋ ۋچاسكەلەرىنە اسىققاندارى دا, ۇزىن-سونار كەزەكتە تۇرىپ, داۋىس بەرگەندىكتەرىنىڭ دە تەرەڭ ءمانى وسى بولاتىن. اڭگىمەنىڭ بىردەن ادالىن ايتايىق, بۇل جولعى سايلاۋدا دا نۇرسۇلتان ءابىش ۇلى نازارباەۆتىڭ جەڭىسكە جەتەتىندىگىنە ەشكىمنىڭ دە كۇدىگى دە, كۇمانى دە بولعان جوق. ويتكەنى, بارلىق قازاقستاندىقتار ەل تاۋەلسىزدىگىنىڭ العاشقى كۇنىنەن باستاپ, ەلباسىنىڭ ءوز سەنىمدەرىن اقتاپ كەلە جاتقاندىعىن عانا بىلەدى. كەشەگى كەڭەستىك وكىمەت قۇلاپ, شارۋاسىنىڭ بەرەكەسى ابدەن قاشقان, ءتىپتى, حالقىنىڭ تيەسىلى جالاقىسى مەن زەينەتاقىسىن, ءتۇرلى تولەماقىلارىن بەرەيىن دەسە قازىناسىندا كوك تيىنى دا قالماعان, «بۇلار ەندى ەل بولا المايدى» دەگەن كۇدىكتى ويلارىمەن اتاجۇرتتارىنا قوتارىلا كوشىپ, ەل شەتى سوگىلىپ, جۇگى جۇرتتا شاشىلىپ قالعانداي بولعان قازاقستانعا, بىلايشا ايتقاندا, يەسىز قالعان ءوز ەلى مەن ءوز جەرىنە قورعان بولعان, ءسويتىپ, تاۋەلسىزدىكتىڭ العاشقى ءبىر ونجىلدىعىندا قازاق ەلىن الەمنىڭ دامىعان الدىڭعى قاتارلى مەملەكەتتەرىنىڭ لەگىنە ىلەستىرگەن نۇرسۇلتان نازارباەۆ سىندى دارا دا دانا ۇلانىنا بارلىق قازاقستاندىقتاردىڭ ءبىر كىسىدەي داۋىس بەرەتىندىكتەرىن ەشكىمنىڭ ۇگىتىنسىز-اق, ەشقانداي ناسيحاتسىز-اق قالىڭ ەل سايلاۋ بولار كۇنگە دەيىن ايتىپ تا جۇرگەن بولاتىن. مۇنى ەل ىشىندە جۇرگەنىمىزدە ەستىپ تە جۇردىك. بۇل سايلاۋدا ەلباسىنا دەگەن ەلدىڭ سەنىمى جەڭدى! اڭگىمەمىزدىڭ وسى ءبىر پاراسىن تاراتا ايتار بولساق, نۇرسۇلتان ءابىش ۇلى نازارباەۆ ءوزىنىڭ وسىعان دەيىنگى ەل بيلىگىندە ءجۇرىپ, سول ەلدىڭ سەنىمىن اقتاپ قانا قويعان جوق, ءتىپتى, ەشكىمنىڭ ويىنا دا كىرىپ-شىقپاس يگى دە جاقسى ىستەر اتقارا ءبىلدى. تاۋەلسىزدىگىمىز ءالى دە تالتىرەكتەپ تۇرعان سوناۋ توقسانىنشى جىلدارى الماتىدا جاتقان استانانى بۇرىنعى اقمولا, تسەلينوگرادقا كوشىرتىپ, بۇگىنگى استانا قالاسىن سالادى دەپ كىم ويلاعان؟! حح عاسىردا ءوز ەلىنىڭ استاناسىن باسقا ورىنعا كوشىرتىپ, جاڭادان سالعان قازاقستان الەمدەگى بىردەن-ءبىر جالعىز ەل بولسا, سونداي باتىل قادامعا, باتىل شەشىم قابىلداۋعا بارعان دا جالعىز نازارباەۆ بولاتىن! بۇگىنگى استانا ەلدىڭ نۇرسۇلتان نازارباەۆقا دەگەن بەرىك سەنىمىنىڭ ءبىر سيمۆولى! تاۋەلسىزدىكتىڭ شيرەك عاسىرعا جاقىنداپ قالعان قيلى-قيلى جولدارى مەن عاسىرعا تاتىرلىق جىلدارى نازارباەۆى بار قازاقستان سەنىممەن تۇراقتى داميتىن ەل, نازارباەۆى بار قوعام الاڭسىز ءومىر سۇرەتىن قوعام ەكەندىگىنە بارلىق قازاقستاندىقتار مەن الەم جۇرتشىلىعىنىڭ كوزىن جەتكىزگەندىگى دە جانە دە سوعان ەشبىر ءشۇباسىز سەنىم قالىپتاستىرعانى بار! بۇل سايلاۋدا تاۋەلسىزدىكتىڭ العاشقى ساتىنەن باستاپ «مەنىڭ بار تىلەگىم دە, زار تىلەگىم دە ەلدىڭ بىرلىگى» دەپ ەلباسىنىڭ ءوزى ۇيىستىرا بىلگەن ەلدىڭ بىرلىگى جەڭدى, ەلدىڭ ىنتىماعى وزدى! الەم تاريحىنىڭ كۇنى كەشە باستالدى دەيتىن ءXXى عاسىرىنىڭ بۇگىنگى ون ەكى جىلىنىڭ عانا سياسى كەۋىپ ۇلگەرمەي جاتقان بەتتەرىنە ۇڭىلەر بولساق, نەبىر سويقاندى دا الاساپىراندى وقيعالار مەن قان توگىستەر ءار ەل مەن ءار حالىقتىڭ ءوز بىرلىكتەرى مەن بەرەكەلەرىن, ىنتىماعى مەن تىنىشتىعىن ساقتاپ تۇرا الاتىن دا, ساقتاپ قالا الاتىن دا سول ەلدىڭ بىرلىگى مەن حالىقتىڭ ىنتىماعىنان وزگە ەشبىر قۋاتتى قارۋ جوق ەكەندىگىنە يلاندىرا تۇسەدى. بىزگە, بارلىق قازاقستاندىقتارعا وسى ءبىر ۇلى اقيقاتتى ۇعىندىرعان دا, ءالى دە كۇن قۇرعاتپاي ايتىپ, ۇعىندىرىپ كەلە جاتقان دا پرەزيدەنت نازارباەۆ! قازاقستاندىقتار تاعى دا سول وزدەرىنىڭ بىرلىك پەن ىنتىماق جونىندەگى ەلباسىنىڭ كيەلى ۇعىمىن تەرەڭ ۇعىنا بىلگەن قاسيەتتەرىمەن الەم الدىندا تاعى دا ءوز ابىرويلارىن اسقاقتاتىپ, جارقىن جۇزدەرىمەن تاريحي جاڭا ءبىر بيىك بەلەسكە كوتەرىلدى! بۇل سايلاۋدا ەلباسىنىڭ قازاق ەلىن «نۇرلى جول» باعدارلاماسىمەن دامىتىپ, قازاقستاندى الەمنىڭ دامىعان وتىز مەملەكەتىنىڭ قاتارىنا قوسۋ جولىندا باستالىپ كەتكەن ۇلان-عايىر ىستەردى بارلىق قازاقستاندىقتاردىڭ نازارباەۆپەن بىرگە اتقارساق, ەلباسىنىڭ تاريحي ماڭىزى اسا زور «بارشاعا بىردەي وسى زامانعى مەملەكەت: بەس ينستيتۋتتىق رەفورما» اتتى سايلاۋالدى باعدارلاماسىن بىرگە جۇزەگە اسىرساق جانە دە ماڭگىلىك ەل بولساق دەگەن اڭسارلى ماقساتتارى جەڭىسكە يە بولدى! الدا الەم نازارىنىڭ ۇشىنا بايلانعان ەكسپو-2017 كورمەسىن وتكىزۋ مىندەتى تۇر. الدا «بارلىق سىرتتان سوققان داۋىلدار مەن قيىندىقتارعا قاراماي, قازاقستان تەك العا جۇرۋگە ءتيىس!» دەگەن نۇرسۇلتان نازارباەۆتىڭ سول سايلاۋالدى باعدارلاماسىندا اتاپ كورسەتىپ وتىرعان وسى قاعيدامەن قازاقستاندىق ۇلى جولدى ءداۋىردىڭ سىن قاتەرلەرىنە توتەپ بەرە وتىرىپ, ودان ءارى جالعاستىرۋ جانە نىعايتۋدىڭ قيىن دا كۇردەلى مىندەتتەرى تۇر. بۇلاردى دا ەلباسى ناقتىلى انىقتاپ, ايقىنداپ تا بەردى. بەس ينستيتۋتتىق رەفورما ارقاۋىنىڭ بەس تۇعىرى بار. ولار: بارشاعا بىردەي وسى زامانعى مەملەكەت, زاڭنىڭ ۇستەمدىگى, ورنىقتى ەكونوميكا, بولاشاعى ءبىرتۇتاس ۇلت جانە اشىق جانە حالىققا ەسەپ بەرۋشى مەملەكەت! ءبارى دە ماڭىزدى! بۇل ءبىزدىڭ ماڭگىلىك ەل بولۋىمىزدىڭ كەپىلى جانە العىشارتتارىنىڭ ءبىرى! بۇل سايلاۋدا ەلباسىنىڭ سايلاۋالدى باعدارلاماسى بارلىق قازاقستاندىقتاردىڭ زور قولداۋىنا يە بولدى! جەڭىستى دە نازارباەۆتىڭ وسى سايلاۋالدى باعدارلاماسى اپەردى! جانە دە ءبىر اتاپ كورسەتەرلىك جاي سول, نۇرسۇلتان ءابىش ۇلى نازارباەۆ ءوز باعدارلاماسىندا ادامزات بالاسىنىڭ الدىندا تۇرعان ءتۇرلى جاھاندىق سىن-قاتەرلەر مەن تاۋەكەلدەردىڭ تەرەڭدىگى سونداي, ول كەز كەلگەن مەملەكەتتىڭ تۇراقتىلىعى مەن تابىستىلىعىنا تۋرا اسەر ەتىپ وتىرماقشى دەگەن ويىن اشىق ايتا ءبىلدى. ءبىزدىڭ ەلىمىزدە سول تۇراقتىلىق پەن تابىستىلىق بولۋى ءۇشىن ەلباسى قازاقستاننىڭ الدىنا جاھاندىق داعدارىستىڭ مەملەكەت قۇرىلىسىنا ىقپالىنىڭ تەرىس اسەرىنە جول بەرمەۋ, دامۋدىڭ قول جەتكىزىلگەن قارقىنىن ساقتاۋ, جاڭا سەرپىلىس ءۇشىن جاعدايلار دايىنداۋ, الەمنىڭ دامىعان 30 مەملەكەتىنىڭ قاتارىنا قاراي ىلگەرى جىلجۋدى ودان ءارى جالعاستىرۋ مىندەتتەرىن قويا وتىرىپ, قازىرگى جاھاندىق سىن-قاتەرلەرگە جاۋاپ بەرۋگە دايىن تۇرۋ مىندەتتەرىن العا تارتتى. ءسويتىپ, ەلباسىنىڭ وسى بەس ينستيتۋتتىق رەفورمانى مەملەكەتىمىزدى ودان ءارى نىعايتۋدىڭ جانە «نۇرلى جول» جاڭا ەكونوميكالىق ساياساتىنىڭ بارلىق مىندەتتەرىن شەشۋ مەن «قازاقستان-2050» ستراتەگياسىنىڭ باستى ماقساتىنا قول جەتكىزۋدىڭ نەگىزگى تۇجىرىمداماسى ەتىپ بەلگىلەپ, ەل الدىنا قويعان وسى ءبىر زاماناۋي ءارى تاريحي مىندەتتەرىن بارلىق قازاقستاندىقتاردىڭ ارقايسىسى ەل الدىندا, مەملەكەت الدىندا اتقارۋعا ءتيىستى ءوز مىندەتتەرىندەي سەزىنە الدى. نۇرسۇلتان نازارباەۆتىڭ سايلاۋداعى تالاسسىز جەڭىسىنىڭ ءبىر تەتىگى دە, ءبىر سىرى دا وسىندا جاتقاندىعىن ايتقان ءلازىم! بۇگىنگى سايلاۋدان كەيىنگى كوڭىل تولعانىسىمەن ەلباسىنىڭ 2012 جىلدىڭ 10 تامىزىندا ءوز ساپارى كەزىندە كوكشەتاۋدىڭ باس الاڭىنا قويىلعان حان ابىلايدىڭ ەسكەرتكىشىنىڭ قولا ءمۇسىندى ايبارلى جۇزىنە قاراپ تۇرىپ: «مەن ابىلايدىڭ ارمانىن ورىندادىم! ابىلايحان قالا سالا المادىم دەپ ەدى, قالا سالدىم, حالقىمنىڭ باسىن قوسا المادىم دەپ ارماندا كەتسە, مەن قالا دا سالدىم, حالقىمنىڭ باسىن قۇراپ ەگەمەن ەل دە ەتتىم!», – دەگەن جۇرەك ءسوزىن ايتقان ءساتى تاعى دا ەسىمە تۇسكەنى بار. نۇرسۇلتان نازارباەۆتىڭ بۇل ايتقانىندا الدەقاشان مويىندالعان اقيقات جاتىر. «مەن ابىلايدىڭ ارمانىن ورىندادىم!». ءيا, مارتەبەلى ەلباسى, ءسىز ابىلايدىڭ دا, ابىلايحانعا دەيىن دە, ودان كەيىن دە وتكەن اتا-بابالارىمىزدىڭ بار ءۇمىتى مەن زار ءۇمىتىن دە, اڭسارلى بار ارمانى مەن مۇددەلى بار ماقساتتارىن دا ورىندادىڭىز! بۇعان تالاس تا جوق! بۇعان كۇدىك پەن كۇمان دە جوق!» دەگەن ادال ويىمىزدى سول كەزدە ايتقان دا بولاتىنبىز. ءيا, ءبىز ءوزىنىڭ ەل ءۇشىن جارعاق قۇلاعى جاستىققا تيمەي ادال ەڭبەك ەتكەن ەر ۇلانىن حان كوتەرىپ اسپەتتەگەن ەل ەدىك! بۇل جولى دا سولاي ەتتىك! ءبارى دە قۇتتى بولسىن, تۋعان ەل! جابال ەرعاليەۆ, جازۋشى, قازاقستاننىڭ ەڭبەك سىڭىرگەن قايراتكەرى, پارلامەنت سەناتىنىڭ دەپۋتاتى. استانا.