ۇكىمەت باسشىسى ولجاس بەكتەنوۆ قىزىلوردا وبلىسىنا جاساعان ساپارى بارىسىندا پرەزيدەنتتىڭ جۇمىسپەن قامتۋ جانە الەۋمەتتىك ينفراقۇرىلىمدى دامىتۋ جونىندەگى تاپسىرمالارىنىڭ ورىندالۋ بارىسىن تەكسەردى. سونىمەن قاتار جولداۋدا ايتىلعان «اۋىل اماناتى» باعدارلاماسى شەڭبەرىندە اۋىل تۇرعىندارىنىڭ ءال-اۋقاتى مەن تۇرمىس ساپاسىن جاقسارتۋ, اگروونەركاسىپ كەشەنىن دامىتۋ ارقىلى ەكونوميكانى ءارتاراپتاندىرۋ, سونداي-اق تۇرعىندارعا ساپالى ءبىلىم بەرۋ قىزمەتتەرىن ۇسىنۋ ءۇشىن الەۋمەتتىك ينفراقۇرىلىم نىساندارىن جاڭعىرتۋ جونىندەگى تاپسىرمالارىنىڭ ورىندالۋ بارىسىن تەكسەردى.
سىرداريا اۋدانى بەسارىق اۋىلىندا پرەمەر-مينيستر «اۋىل اماناتى» باعدارلاماسىن ىسكە اسىرۋدىڭ جانە بيزنەستىڭ الەۋمەتتىك جاۋاپكەرشىلىگىنىڭ تابىستى مىسالدارىمەن تانىستى. «اباي داۋلەت» جشس قۇرعان وندىرىستىك الاڭدا 318,2 ملن تەڭگەگە اۋىل تۇرعىندارىنىڭ 13 بيزنەس-باستاماسى ىسكە اسىرىلىپ جاتىر. جارتىلاي فابريكات, پلاستيكالىق ىدىس, اعاشتان جاسالعان بۇيىمدار, توقىما, كونديتەرلىك ونىمدەر, سابىن جانە باسقا دا ونىمدەر وندىرەتىن تسەحتار اشىلدى. و.بەكتەنوۆ اۋىل تۇرعىندارى شىعاراتىن ونىمدەر جەلىسىمەن تانىستى.
وڭ تاجىريبەنى كەڭىنەن تاراتۋ ءۇشىن وبلىستىڭ ءار اۋدانىندا كەمى 3-4 اۋىلدا وسىنداي بيزنەس-ينكۋباتورلار اشۋ جۇمىستارى قولعا الىنعان. قىزىلوردا وبلىسىندا «اۋىل اماناتى» باعدارلاماسى اياسىندا بيىل وڭدەۋ ونەركاسىبىن, مال شارۋاشىلىعى, وسىمدىك شارۋاشىلىعى جانە باسقا دا كەلەشەگى بار سالالاردا 610 جۇمىس ورنىن اشقان 575 جوبا ىسكە اسىرىلدى. «Kaz Fries» زاۋىتىندا پرەمەر-مينيسترگە اگروونەركاسىپ كەشەنى ونىمدەرىن تەرەڭ وڭدەۋ سالاسىنداعى الەۋەتتى اشۋ شارالارى تانىستىرىلدى. كاسىپورىننىڭ قۋاتى ساعاتىنا 150 كيلوعا دەيىن قۋىرىلعان كارتوپ تاياقشالارىن وندىرۋگە جەتەدى. دايىن ءونىم مۇزداتىلىپ, ىشكى نارىقتا ساتىلادى. «اباي-داۋلەت» جشس ديرەكتورى مۇرات سارسەنباەۆ وسىمدىك, قۇس, مال شارۋاشىلىعىمەن جانە قۇرىلىس ونىمدەرىن شىعارۋمەن اينالىساتىن كوپسالالى كومپانيانىڭ وندىرىستىك قۋاتىن ودان ءارى كەڭەيتۋ جوسپارلارى تۋرالى حاباردار ەتتى.
سەرىكتەستىك اۋىلدىڭ دامۋىنا ۇلكەن ۇلەس قوسىپ كەلە جاتقانىن اتاپ وتكەن ءجون. 2018 جىلدان بەرى كومپانيا بۇل ماقساتتارعا 1,5 ملرد تەڭگەدەن اسا قارجى ءبولدى. قاراجات 360 ورىندىق مەكتەپ, 120 ورىندىق بالاباقشا جانە دارىگەرلىك امبۋلاتوريا سياقتى الەۋمەتتىك نىسانداردى اباتتاندىرۋعا, كوگالداندىرۋعا, جوندەۋگە باعىتتالعان. دەمەۋشىلىك قولداۋ ەسەبىنەن وسى جىلى 150 ادامعا ارنالعان مادەنيەت ءۇيى كۇردەلى جوندەۋدەن ءوتتى. مۇندا پرەزيدەنت باستاماسىمەن جاستاردى وتانشىلدىق, ادامگەرشىلىك رۋحىندا تاربيەلەۋگە باعىتتالعان «ادال ادام» تۇجىرىمداماسى ىسكە اسىرىلىپ جاتىر. بالالار ۇيىرمەلەرى اشىلىپ, مۋزىكالىق شىعارماشىلىق ۇجىم قۇرىلدى. سونىمەن قاتار «ادال ادام» مادەني ورتالىعىندا ورناتىلعان پودكاست-ستۋديادا تىكەلەي ەفيردە اۋىل بيزنەسىن دامىتۋدىڭ وزەكتى ماسەلەلەرى تالقىلانادى, كورەرمەندەرگە جەرگىلىكتى تسەحتاردا وندىرىلگەن ونىمدەر تانىستىرىلادى.
پرەمەر-مينيستر بيزنەستىڭ اۋىلدىق جەرلەردەگى تۇرمىس ساپاسىن جاقسارتۋعا قوسقان ۇلەسى ماڭىزدى ەكەنىن اتاپ ءوتتى.
«اۋىلدى دامىتۋ, ناتيجەلى جۇمىسپەن قامتۋدى ىنتالاندىرۋ, ساپالى الەۋمەتتىك ينفراقۇرىلىم قۇرۋ – ۇكىمەتتىڭ باسىم مىندەتتەرىنىڭ ءبىرى. وسى باعىتتا ءبىز كاسىپكەرلەردىڭ بارلىق باستاماسىن قولدايمىز», دەدى ۇكىمەت باسشىسى.
قىزىلوردادا پرەمەر-مينيستر بۇگىندە 200 جۇمىس ورنى اشىلعان «جان اراي» جشس اگروونەركاسىپ كەشەنىنىڭ وندىرىستىك ورىندارىن ارالادى. كاسىپورىن كۇرىش, قۇراما جەم وندىرۋمەن, جەمىس پەن كوكونىس وڭدەۋ جانە ساقتاۋمەن اينالىسادى. مۇندا قۋاتى تاۋلىگىنە 80 توننا قۇراما جەم وندىرۋگە جەتەتىن جانە تاۋلىگىنە 150 توننا كۇرىش وڭدەي الاتىن ەكى زاۋىت جۇمىس ىستەيدى. سونىمەن قاتار سىيىمدىلىعى 4 مىڭ توننا بولاتىن كوكونىس قويماسى بار, بۇل ماۋسىمارالىق كەزەڭدە الەۋمەتتىك ماڭىزى بار ونىمدەرگە باعا تۇراقتىلىعىن قامتاماسىز ەتۋگە مۇمكىندىك بەرەدى. كەشەن ونىمدەرى ەلىمىزدە ساتىلادى جانە تۇركيا, يراك, رەسەي, وزبەكستان, تاجىكستان, ازەربايجان, بەلارۋس جانە باسقا دا الىس-جاقىن شەتەلدەرگە ەكسپورتتالادى.
و.بەكتەنوۆ وبلىس ورتالىعىندا بالالاردى قوسىمشا بىلىممەن قامتۋدى ارتتىرۋ باعىتىندا اتقارىلىپ جاتقان شارالارمەن تانىستى. جەكە ينۆەستيتسيا ەسەبىنەن سالىنعان جاڭا وقۋشىلار سارايى بيىل قازان ايىندا پايدالانۋعا بەرىلدى. جوبانىڭ قۇنى – 2,4 ملرد تەڭگە. 350 ادامعا دەيىن سىياتىن الەۋمەتتىك نىسان ءارتۇرلى جاستاعى وقۋشىلاردىڭ جان-جاقتى دامۋىنا ىقپال ەتەتىن, گيدروپونيكا, روبوتتەحنيكا, ونەركاسىپتىك ديزاين, تەلەستۋديا سىندى باسقا دا جاڭا جابدىقتارمەن قامتاماسىز ەتىلگەن. مۇندا پرەمەر-مينيسترگە كاسىپتىك-تەحنيكالىق ءبىلىم بەرۋ جانە كادرلار دايارلاۋ جۇيەسىن ترانسفورماتسيالاۋ بويىنشا اتقارىلىپ جاتقان شارالار تۋرالى اقپارات بەرىلدى. وڭىردە 28 كوللەدج جۇمىس ىستەيدى, وندا بۇگىندە 20 مىڭنان استام ستۋدەنت ءبىلىم الىپ جاتىر, ونىڭ 5 مىڭعا جۋىعى جۇمىسشى ماماندىقتارى بويىنشا وقيدى.
2024–2025 وقۋ جىلىندا وبلىستىڭ بارلىق اۋدانىندا 7 وقۋ-وندىرىستىك كومبيناتى اشىلدى. قىسقامەرزىمدى كاسىپتىك وقىتۋ كۋرستارى 300-گە جۋىق ادامدى قامتىدى. العاشقى كومبينات 2022 جىلى قالالىق مەكتەپ-ليتسەي بازاسىندا اشىلعان. اسپاز, تىگىنشى, گرافيكالىق ديزاينەر جانە باسقا دا سۇرانىسقا يە ماماندىقتار بويىنشا 164 مامان ءبىتىردى. الداعى ۋاقىتتا تاجىريبەنى كەڭەيتۋ جوسپارلانىپ وتىر.