وبلىس پروكۋروتۋراسىنىڭ مالىمەتىنە سايكەس, وڭىردە كەيىنگى ءۇش جىل ىشىندە قىلمىس دەڭگەيىنىڭ ءبىرشاما تومەندەگەنى بايقالادى. الايدا ۇرلىق-قارلىق, الاياقتىق سياقتى قىلمىس تۇرلەرى باسەڭدەمەي تۇر.
باقىلاۋ ورىندارى جاريا ەتكەن دەرەككە سۇيەنسەك, وبلىس كولەمىندە مەنشىككە قارسى جاسالعان ءاربىر ەكىنشى قىلمىس الاياقتىققا جاتادى ەكەن. اسىرەسە ينتەرنەت الاياقتىق ءورشىپ تۇر. اتالعان قىلمىستىڭ دەڭگەيى 12 پايىزعا وسكەن.
وبلىس پروكۋرورى بەرىك ءابىلوۆتىڭ توراعالىعىمەن وتكەن قاداعالاۋشى ورگانداردىڭ كەڭەيتىلگەن القا وتىرىسىندا ۇرلىق پەن الاياقتىقتىڭ الدىن الۋ مەن اتالعان قىلمىس تۇرلەرىن اشۋ جولدارى تالقىلاندى. جيىندا الاياقتارعا الدانعان ازاماتتارعا, بيزنەس نىساندارىنا 1,6 ملرد تەڭگە, ونىڭ ىشىندە ينتەرنەت-الاياقتىقتان 116 ملن تەڭگە زالال كەلگەنى ايتىلدى. ماسەلەن, جىل باسىنان بەرى ينتەرنەت الاياقتىقتىڭ 135 دەرەگى انىقتالىپ, 40 كۇدىكتى ۇستالعان. سونداي-اق الاياقتىق ارەكەتكە قاتىسى بار 3 دروپپەر قىلمىستىق جاۋاپكەرشىلىككە تارتىلىپ, 10 مىڭعا جۋىق ينتەرنەت-رەسۋرس بۇعاتتالعان.
بۇگىندە وڭىردە اتالعان قىلمىستىڭ الدىن الۋ شارالارى ءجۇرىپ جاتىر. كوپشىلىك ورىنداردا جۇرتتى الاياقتاردان ساقتانۋعا ۇندەگەن بيلبورد, led-ەكراندار كوبەيدى. قالا كوشەلەرىندە تۇرعىندارعا وسى مازمۇنداعى بۋكلەتتەر مەن پاراقشالار تاراتىپ جۇرگەن بەلسەندى جاستاردى دا ءجيى ۇشىراتاسىز. قۇزىرلى ورىنداردىڭ وكىلدەرى ءتۇرلى ەڭبەك ۇجىمدارىن ارالاپ, ءتۇسىندىرۋ جۇمىستارىن جۇرگىزىپ جاتىر.
پروكۋرورلاردىڭ ايتۋىنشا, سوت ارقىلى دروپپەرلەردەن ازاماتتىق تارتىپپەن م ۇلىكتىك زالال ءوندىرىپ الۋ تاجىريبەسى قالىپتاسقان. مىسالى, بيىل 36 دروپپەردەن 71 ملن تەڭگە سوت ارقىلى ءوندىرىلىپ الىنعان.
«وبلىس اكىمدىگى الاياقتىققا قارسى كۇرەس شارالارىنا ماتەريالدىق-تەحنيكالىق تۇرعىدان بارىنشا قولداۋ كورسەتىپ وتىر. ماسەلەن, پوليتسيا دەپارتامەنتىنىڭ «كيبەرپول» بولىمشەسىن ارنايى باعدارلامامەن قامتاماسىز ەتتى», دەيدى پروكۋرورلار.
القا جۇمىسىنىڭ قورىتىندىسىندا وبلىستىڭ قاداعالاۋ ورىندارى مەن قۇقىق قورعاۋ ورگاندارىنىڭ الداعى ۋاقىتتا الاياقتىققا قارسى بىرلەسىپ اتقاراتىن ءىس-شارالارى ايقىندالدى.
قوستاناي وبلىسى