سپورت تۇرلەرىنىڭ ىرىكتەۋ جۇيەسى وزگەرەدى

تۋريزم جانە سپورت مينيسترلىگى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت, سونداي-اق نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەدى. ⠀

قۇجاتتا ەلىمىزدىڭ سپورت سالاسىندا جاڭا ىرىكتەۋ جۇيەسىن ەنگىزۋ قاراستىرىلعان. زاڭ جوباسىنا سايكەس, باسىم سپورت تۇرلەرى ولاردىڭ الەمدىك رەيتينگتەرى نەگىزىندە ەمەس, وليمپيادا, پاراليمپيادا, سۋردليمپيادا, ازيا جانە پارا ازيا ويىندارىندا ۇلتتىق قۇراما كوماندالارىنىڭ كورسەتكەن ناتيجەلەرى بويىنشا ىرىكتەلەتىن بولادى. ⠀

بۇل وزگەرىس قازاقستاننىڭ سپورتتىق قۇرامالارىن دايىنداۋداعى باسىمدىقتاردى ناقتىلايدى جانە حالىقارالىق دەڭگەيدەگى ناتيجەلەرگە نەگىزدەلگەن جۇيەنى قالىپتاستىرۋعا مۇمكىندىك بەرەدى. وسىلايشا, ەلىمىزدىڭ سپورتشىلارىن حالىقارالىق ارەنالاردا باسەكەگە قابىلەتتى ەتۋ ءۇشىن ناقتى جانە ناتيجەگە باعىتتالعان ساياسات جۇزەگە اسىرىلماق. ⠀

«بۇل زاڭ جوباسى سپورت سالاسىنداعى جاڭاشىلدىقتاردى ەنگىزۋدى, تيىمدىلىكتى ارتتىرۋدى جانە قازاقستاننىڭ سپورتتىق قۇراماسىنىڭ حالىقارالىق جارىستاردا جوعارى ناتيجەلەر كورسەتۋىن قامتاماسىز ەتۋگە باعىتتالعان. ءبىز وليمپيادا, پاراليمپيادا, سۋردليمپيادا, ازيا جانە پارا ازيا ويىندارىنداعى ناتيجەلەردى باستى باعدار رەتىندە الىپ, ەلىمىزدىڭ سپورت سالاسىن جاڭا دەڭگەيگە كوتەرۋدى كوزدەپ وتىرمىز», دەدى تۋريزم جانە سپورت ءمينيسترى ەربول مىرزابوسىنوۆ.

ءمينيستردىڭ ايتۋىنشا, اتالىپ وتىرعان زاڭ جوباسىنىڭ قابىلدانۋى سپورتتى دامىتۋ جۇيەسىن جەتىلدىرىپ, قازاقستاننىڭ الەمدىك سپورت ارەناسىندا وزىق جەتىستىكتەرگە قول جەتكىزۋىن قامتاماسىز ەتەدى.