پرەزيدەنت ق.توقاەۆتىڭ 2022 جىلى 1 قىركۇيەكتە جاريالاعان «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىنا سايكەس ەل ۇكىمەتى سول جىلعى 30 قاراشادا ءبىلىم بەرۋ سالاسىندا «جايلى مەكتەپ» سالۋ قاناتقاقتى ۇلتتىق جوباسىن ارنايى قاۋلىمەن بەكىتكەن ەدى. جوبانى ىسكە اسىرۋدىڭ قارجىلىق مىندەتى «Samruk-Kazyna Construction» اق بەلگىلەنگەن. ال ۇلتتىق جوبانى جۇزەگە اسىرۋدى جاۋاپتى ورتالىق, جەرگىلىكتى اتقارۋشى ورگاندار قامتاماسىز ەتەتىن بولدى. «جايلى مەكتەپتەردىڭ» ەڭ باستى ەرەكشەلىگى – مۇندا باستاۋىش جانە جوعارى سىنىپ وقۋشىلارى بولەك بلوكتاردا وقىتىلادى. بۇل قاۋىپسىزدىك شارالارىن قامتاماسىز ەتۋگە تىكەلەي بايلانىستى.
كۇنى كەشە عانا پەتروپاۆل قالاسىنىڭ «ورمان» شاعىن اۋدانىندا 600 وقۋشىعا ارنالعان وبلىستاعى العاشقى جايلى مەكتەپ اشىلدى. جاڭا نىساننىڭ اشىلۋ سالتاناتىنا وبلىس اكىمى عاۋەز نۇرمۇحامبەتوۆ, قالانىڭ زيالى قاۋىم وكىلدەرى, اقساقالدار مەن ارداگەر ۇستازدار قاتىستى. قۇتتىقتاۋ سوزىندە وبلىس اكىمى «جايلى مەكتەپ» ۇلتتىق جوباسى مەملەكەت باسشىسىنىڭ تىكەلەي تاپسىرماسى بويىنشا جۇزەگە اسىپ وتىرعانىن جەتكىزدى.
ء«بىزدىڭ بالالار جاڭا, جايلى بارلىق زاماناۋي ستاندارتقا ساي مەكتەپتە ءبىلىم الۋعا ءتيىس. سەبەبى ول جارقىن بولاشاعىمىزعا سالىنعان ينۆەستيتسيا. جەتكىنشەكتەرگە بارلىق جاعداي جاسالسا, ارامىزدان الەمدى باعىندىراتىن تالاي ونەرتاپقىشتار, عالىمدار, ونەر يەلەرى شىعاتىنىنا سەنىمىم مول. ءبىز ورەندەرگە جاقسى جاعداي جاساپ قانا قويماي, 80-گە جۋىق ادامدى جۇمىسپەن قامتىپ وتىرمىز. وسىنداي مەكتەپ «بەرەكە» شاعىن اۋدانىندا دا سالىنىپ جاتىر», دەدى ءوڭىر باسشىسى.
اتالعان ءبىلىم ورداسىندا «ورمان» شاعىن اۋدانىمەن ىرگەلەس «بوركي», «سولنەچنىي», «يۋبيلەينىي» جانە جاڭادان اشىلعان «بىرلىك» شاعىن اۋدانىنىڭ بالالارى وقيدى. ءبىلىم ۇياسىندا 30-دان استام سىنىپ بولمەسى, سولاردىڭ ىشىندە قازاق, ورىس, اعىلشىن تىلدەرى, فيزيكا, حيميا, ينفورماتيكا, بيولوگياعا ارنالعان ارنايى كابينەتتەر, STEM زەرتحانا جانە روبوتتەحنيكا مەن ينتەراكتيۆتى تاقتالار بار. وعان قوسا ەكى سپورتزال, زاماناۋي شەبەرحانالار, ءماجىلىس زالى, بي زالى جانە كوپسالالى سپورت الاڭى جۇمىس ىستەيدى. قىزداردىڭ شەبەرحانا كابينەتىندە ءىس تىگەتىن زاماناۋي تىگىن ماشينالارى قويىلعان. وندا قىز بالالار 18 ءتۇرلى تىگىن ونەرىن ۇيرەنەدى. اسحانا مەن كىتاپحانا دا كورگەن ادامنىڭ كوزىن سۇرىندىرگەندەي. ەرەكشە ءبىلىمدى قاجەت ەتەتىن بالالارعا دا قولايلى جاعداي جاسالعان. ولارعا ارنالعان ينكليۋزيا جانە لوگوپەد كابينەتى جۇمىس ىستەيدى. مۇندا وقۋشىلار قازاق جانە ورىس تىلىندە ءبىلىم الادى.
انەل سابىر دەگەن 8-سىنىپ وقۋشىسى جاڭا مەكتەپتىڭ اشىلعانىنا ايرىقشا قۋانىشتى ەكەنىن ايتتى. «بۇل مەكتەپتە ءبارى – ادەمى. ءوزىم باسكەتبولمەن اينالىسامىن. سوندىقتان سپورتزال ەرەكشە ۇنادى», دەسە, سابدەن ەسىمدى اتا-انا «جايلى مەكتەپ» بارلىق تالاپقا ساي سالىنعانىن ايتتى. «شىنىندا دا, بالالارعا وتە جايلى. بۇرىن وقىعان مەكتەپتە ەكىنشى اياقكيىم اۋىستىراتىن ورىن وتە تار بولىپ, اتا-انالار بالالارىمەن بىرگە قىسىلىپ-قىمتىرىلىپ جاتاتىن ەدى. ال مىنا جاڭا مەكتەپتە ونداي جوق. ءىشى كەڭ, ورىن مول. ادام ەركىن تىنىستايدى. وسى ءبىلىم ورداسىنا نەمەرەمدى اكەلدىم», دەپ ريزاشىلىعىن ءبىلدىردى.
جاڭا مەكتەپكە باسشى بولىپ, تاجىريبەلى مامان, بۇرىن مەكتەپ ديرەكتورى بولعان گۇلجان جاقانوۆا تاعايىندالدى. «بۇل ءبىلىم ورداسى №28 مەكتەپ اتالادى. كەرەك دۇنيەنىڭ ءبارىن جەتكىزىپ الدىق. ەرەكشە ءبىلىمدى قاجەت ەتەتىن بالالارعا سۋ جاڭا, زاماناۋي ساۋىقتىرۋ قۇرالدارىن اكەلدىك. ارنايى جيھازدار دا بار. بالالاردىڭ دامۋىنا ىڭعايلى تاكتيلدى جول-كورپەشەلەر, ليفت, ءماجىلىس زالىنىڭ ساحناسىنا شىعاراتىن پاندۋستار – ءبار-ءبارى قاراستىرىلعان. ازىرگە بالالارىمىز تولىق ەمەس, بىراق ۋاقىت وتە كەلە وقۋشىلار سانى ارتادى دەپ ويلايمىن. «بىرلىك» شاعىن اۋدانىنىڭ بالالارى دا وسىندا كەلىپ وقيدى. ماماندارىمىز دا ءالى دە تولىعاتىنىنا سەنىمدىمىن», دەدى ول.
ەل ۇكىمەتى بالالاردىڭ جارقىن بولاشاعى ءۇشىن بارلىق جاعدايدى جاساپ وتىر, ەندى تەك جەتكىنشەكتەر ونىڭ باعاسىن ءبىلىپ, وتانىنىڭ وزىق ويلى ازاماتتارى بولسىن دەڭىز.
پەتروپاۆل