پرەزيدەنت قاسىم-جومارت توقاەۆ تسيفرلاندىرۋدى ەل ەكونوميكاسى دامۋىنىڭ نەگىزگى تەتىكتەرىنىڭ ءبىرى رەتىندە ايتىپ كەلەدى. بۇل قوعامنىڭ بارلىق سالاسىنا كەڭىنەن دەندەپ ەنۋگە ءتيىس. بۇدان اسكەري سالا دا تىس ەمەس.
پرەزيدەنت جانىنداعى ورتالىق كوممۋنيكاتسيالار قىزمەتىندە قورعانىس ءمينيسترىنىڭ تسيفرلاندىرۋ جونىندەگى ورىنباسارى دارحان احمەديەۆتىڭ قاتىسۋىمەن وتكەن بريفينگتە اسكەري سالاداعى تسيفرلىق ترانسفورماتسيا ماسەلەسى تالقىلاندى. سپيكەر قوعام مەن بۇقارالىق اقپارات قۇرالدارىنىڭ وكىلدەرىن ارميانى تسيفرلاندىرۋ ۇدەرىستەرى, اياقتالعان جوبالار, ازىرلەنىپ جاتقان جانە ەنگىزىلۋ ساتىسىندا تۇرعان باعدارلامالار تۋرالى حاباردار ەتتى.
ونىڭ ايتۋىنشا, قارۋلى كۇشتەردىڭ قاۋىپسىزدىك جۇيەسىنە جاساندى ينتەللەكتپەن جابدىقتالعان بەينە ساراپتاۋ جۇيەسى ەنگىزىلمەك. ول اسكەري نىسان اۋماعىنا زاڭسىز كىرۋگە تىرىساتىن بوگدە ادامداردى انىقتاۋعا, ادامنىڭ كەلبەتىن, اۆتوكولىك نومىرلەرىن تانۋعا, ادامداردىڭ جينالۋىن جانە ءۇي-جايلاردان شىققان ءتۇتىندى دە انىقتاۋعا قابىلەتتى. بۇعان قوسا بۇل جۇيە كامەرالاردىڭ ىستەن شىققانىن دا انىقتايدى, باسقارۋشىلىق جانە تاعى باسقا شەشىمدەر قابىلداۋ ءۇشىن دەرەكتەردى تالدايدى, اسكەري قىزمەتتىڭ قاۋىپسىزدىگىن ارتتىرادى. قازىر اتالعان جۇيە اۋە قورعانىسى كۇشتەرىنىڭ اسكەري بولىمدەرىندە قاناتقاقتى جوبا رەتىندە تەستىلەۋدەن ءوتىپ جاتىر. سىناقتان كەيىن بەينە ساراپتاۋ جۇيەسى قارۋلى كۇشتەردىڭ بارلىق اسكەري بولىمىنە ەنگىزىلەدى.
ەڭ ماڭىزدى جوبالاردىڭ ءبىرى – اسكەري مىندەتتىلەردىڭ تىرشىلىك تسيكلىنىڭ بارلىق ۇدەرىسىن اۆتوماتتاندىرۋعا مۇمكىندىك بەرەتىن «تسيفرلىق اسكەري كوميسساريات».
– قورعانىس مينيسترلىگى باسقا مەملەكەتتىك ورگاندارمەن بىرلەسە وتىرىپ, تسيفرلىق ترانسفورماتسيا بويىنشا اۋقىمدى جۇمىس اتقاردى. ول بىرتىندەپ ءومىردىڭ بارلىق سالاسىنا ەنگىزىلىپ كەلەدى جانە ۋاقىت وتە كەلە جۇمىستار بارىنشا ايقىن ءارى ناقتى بولا تۇسەدى. قازىردىڭ وزىندە, مىسالى, جەرگىلىكتى اسكەري باسقارۋ ورگاندارىندا كەيىنگە قالدىرۋ نەمەسە ەسەپكە قويۋ, ەسەپتەن شىعارۋ سياقتى قىزمەتتەر اسكەري كوميسسارياتقا ازاماتتىڭ ءوزىنىڭ بارۋىنسىز شەشىلەدى. بۇل قىزمەتتەردىڭ بارلىعىن E-gov-تاعى ازاماتتىڭ جەكە كابينەتىنەن الۋعا بولادى. 2024 جىلى 29 648 ازامات اسكەرگە شاقىرۋدى اۆتوماتتى تۇردە كەيىنگە قالدىردى, – دەپ اتاپ ءوتتى د.احمەديەۆ.
تسيفرلىق ترانسفورماتسيا اسكەري ءبىلىم بەرۋ جۇيەسىنە دە اسەر ەتتى. بارلىق اسكەري وقۋ ورنىن بىرىكتىرەتىن كوپفۋنكتسيونالدى ءبىلىم بەرۋ پلاتفورماسى قۇرىلدى. بۇل جۇيە ەڭبەك فۋنكتسيالارىن ورىندايتىن جەكە مودۋلدەردى قامتيدى. وعان جوعارى وقۋ ورىندارى ارالىق ەلەكتروندى كىتاپحانا, وقۋ ۇدەرىسىن جوسپارلاۋ قۇجاتتارى, ەلەكتروندى جۋرنالدار جانە تسيفرلىق ءبىلىم بەرۋ رەسۋرستارى كىرەدى.
ءمينيستردىڭ ورىنباسارى قىزمەتتىك قۇجات اينالىمى ەداۋىر قىسقارعانى تۋرالى دا ايتتى. قورعانىس مينيسترلىگىندە «اسكەري قىزمەتشىنىڭ كابينەتى» سەرۆيسى ىسكە قوسىلعان. وندا بارلىق باياناتتى, انىقتامالاردى جانە باسقا دا قىزمەتتىك قۇجاتتاردى بىرنەشە مينۋت ىشىندە بەرۋگە جانە الۋعا بولادى.
بۇعان قوسا قىزمەتتىك تۇرعىن ۇيگە كەزەككە قويۋ, قارۋلى كۇشتەردىڭ اسكەري قىزمەتشىلەرى مەن ازاماتتىق پەرسونالىنىڭ تۇرعىن ءۇي-جايدى جالداۋ شارتىن جاساسۋ جانە ۇزارتۋ مەملەكەتتىك قىزمەتتەرى ەلەكتروندىق فورماتقا اۋىستىرىلدى. ەندى بۇل قىزمەتتەر E-gov جانە e-Gov mobile قوسىمشالارى ارقىلى كورسەتىلەدى.