پرەمەر-ءمينيستردىڭ ورىنباسارى تامارا دۇيسەنوۆا قاراعاندى وبلىسىندا مەملەكەتتىك باعدارلامالاردىڭ ىسكە اسىرىلۋىمەن تانىستى. ساپار اياسىندا پرەزيدەنت تاپسىرمالارىن ىسكە اسىرۋ بارىسىن سارالاپ, بىرقاتار الەۋمەتتىك نىساندى ارالادى.
ۆيتسە-پرەمەردىڭ جۇمىس ساپارى بۇقار جىراۋ اۋدانىنىڭ سامارقاند اۋىلىنان باستالدى. مۇندا قازىر «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى بويىنشا دارىگەرلىك امبۋلاتوريانىڭ قۇرىلىسى اياقتالۋعا جاقىن. بۇرىنعى عيمارات ورتەنىپ, دارىگەرلەر قازىر ناۋقاستاردى بەيىمدەلگەن ورىندا قابىلداپ جاتىر. مەديتسينالىق مەكەمەگە سامارقاندتىڭ 1,3 مىڭ تۇرعىنى جانە جاقىن ماڭداعى ءتورت اۋىل تىركەلگەن.
«بىزگە جاڭا عيمارات سالىپ بەرگەنىنە بارلىق تۇرعىن قۋانىشتى. مۇندا پروتسەدۋرالىق كابينەت, زەرتحانا جۇمىس ىستەيدى. فيزيوتەراپيالىق ەم مەن يممۋنوپروفيلاكتيكا جۇرگىزىلەدى. ءدارىحانا قويماسى دا بولادى. ياعني ازاماتتار وزدەرىنە تيەسىلى تەگىن ءدارى الۋ ءۇشىن ەندى قالاعا نەمەسە اۋدانعا سابىلمايدى», دەدى مەدبيكە اسەم جاۋدينا.
مەديتسينالىق مەكەمە 1 300 ادامعا قىزمەت كورسەتەدى. سامارقاند اۋىلى مەن جاقىن ماڭداعى تاعى 4 اۋىلدىڭ تۇرعىنى ەندى وسى مەكەمەگە كەلە الادى. جالپى, قاراعاندى وبلىسىندا «اۋىلدا دەنساۋلىق ساقتاۋدى جاڭعىرتۋ» باعدارلاماسى اياسىندا 92 نىساننىڭ قۇرىلىسى جوسپارلانعان. ونىڭ ىشىندە 14 نىسان 2023 جىلى پايدالانۋعا بەرىلدى. جىل سوڭىنا دەيىن تاعى 27 نىسان اشىلادى. قالعاندارى كەلەسى جىلى بىتۋگە ءتيىس. بۇل مەملەكەت باسشىسىنىڭ تاپسىرماسىنا سايكەس اۋىل تۇرعىندارىن قولجەتىمدى ءارى ساپالى مەديتسينالىق كومەكپەن قامتاماسىز ەتۋ ماقساتىندا جۇزەگە اسىرىلىپ جاتىر.
سونداي-اق تامارا دۇيسەنوۆا «اۋىل اماناتى» باعدارلاماسىنىڭ ىسكە اسىرىلۋ بارىسىمەن تانىستى. مەملەكەت باسشىسى جولداۋدا ونىڭ تيىمدىلىگىن جوعارى باعالاعان بولاتىن. باعدارلاما اۋىل تۇرعىندارىنىڭ كىرىسىن ارتتىرۋعا جانە جۇمىس ورىندارىن اشۋعا باعىتتالعان. بيىل «اۋىل اماناتى» باعدارلاماسىنا پەتروۆكا اۋىلىندا مال وسىرەتىن كاسىپكەر تەمىرلان قاناتوۆ تا قوسىلدى. جاس كاسىپكەر اۋىلدا ءوز ءىسىن دامىتۋدى كوزدەيدى. جەڭىلدەتىلگەن نەسيە راسىمدەپ, 11 ساۋىن سيىردى ساتىپ العان. ساۋىلعان ءسۇتتى جەرگىلىكتى كاسىپورىنداردىڭ بىرىنە وڭدەۋگە وتكىزىپ وتىر.
«اۋىل تۇرعىندارى ءۇشىن وسىنداي باعدارلاما بولعانى ءتيىمدى. بىزدە ءوز ءىسىمىزدى اشۋعا مۇمكىندىك بار. ەڭ باستىسى – ءونىمدى وتكىزۋ جولىنىڭ جۇيەسىن قالىپتاستىردى. بىزدە ءبارى جاقسى, ەشقانداي پروبلەما جوق. بارلىق ءسۇتتى وتكىزىپ وتىرمىز. ال تۇسكەن قاراجاتقا مالعا جەمشوپ ساتىپ الدىم, ەلەكتر قۋاتى ءۇشىن تولەدىم, مالدى قىستاتۋعا ورىن دايىندادىم. بولاشاقتا كاسىبىمدى دامىتىپ, ءسۇت وڭدەۋ مەن ءسۇت ونىمدەرىن ءوندىرۋ تسەحىن اشقىم كەلەدى», دەيدى ت.قاناتوۆ.
بوتاقارا كەنتىنىڭ تۇرعىنى اندرەي ستەپانەنكو كاسىپكەرلىكتى قولداۋدىڭ بىرىڭعاي كەشەندى باعدارلاماسى اياسىندا قايتارىمسىز گرانت العان. كولىك جوندەۋ ورتالىعى ءۇشىن قاجەتتى قۇرال-جابدىق ساتىپ الىپتى. بۇرىن جۇمىسسىز بولعان جانە ەكىنشى توپتاعى مۇگەدەكتىگى بار. قازىر ول تەك ءوزىن جۇمىسپەن قامتىپ قانا قويماي, ەكى اۋىلداسىنا تابىس كوزىن تاۋىپ بەردى. الداعى ۋاقىتتا «اۋىل اماناتى» باعدارلاماسى بويىنشا نەسيە الىپ, بيزنەسىن كەڭەيتۋدى جوسپارلاپ وتىر.
پرەمەر-ءمينيستردىڭ ورىنباسارى ءوڭىر باسشىسى ەرماعانبەت بولەكپاەۆپەن بىرگە «اۋىل اماناتى» جوباسىن ىسكە اسىرۋ بويىنشا كەڭەس وتكىزدى. وعان وبلىستىڭ اۋدان جانە اۋىلدىق وكرۋگ اكىمدەرى قاتىستى. باعدارلامانىڭ رەسپۋبليكالىق مونيتورينگىنىڭ ناتيجەسى باياندالىپ, باسقا وبلىستاردا جۇزەگە اسىرىلعان ۇزدىك جوبالار ۇلگى رەتىندە تانىستىرىلدى. ايماق باسشىسى ە.بولەكپاەۆ جوبانىڭ اۋىل تۇرعىندارى اراسىندا سۇرانىسقا يە ەكەنىنە توقتالدى. بىلتىر 456 شاعىن نەسيە بەرىلگەن. ونىڭ كوپشىلىگى جەكە قوسالقى شارۋاشىلىق يەلەرىنە ارنالعان. 639 جۇمىس ورنى اشىلىپ, 62 اۋىلشارۋاشىلىق كووپەراتيۆى قۇرىلدى. كەڭەس بارىسىندا ەكى ءىرى كاسىپورىن – «Kazakhmys» جانە «Qarmet» كومپانيالارىمەن مەموراندۋمعا قول قويىلدى. ولار قىزمەتكەرلەرىن تاماقتاندىرۋ ءۇشىن جەرگىلىكتى ءونىمدى ساتىپ الماق.
«پرەزيدەنتتىڭ تاپسىرماسىمەن ءبىز «اۋىل اماناتى» جوباسىنىڭ ايماقتاردا قالاي جۇزەگە اسىرىلىپ جاتقانىنا مونيتورينگ جۇرگىزدىك. قاراعاندى وبلىسىندا بەرىلگەن نەسيەنىڭ ارقاسىندا ءوز كاسىپتەرىن اشقان جاندارمەن كەزدەستىك. ءوندىرىستى كەڭەيتۋدى جوسپارلاپ وتىرعان ولار وسىنداي مۇمكىندىك ءۇشىن ريزاشىلىق ءبىلدىرىپ جاتىر. نەگىزگى مىندەتتەردىڭ ءبىرى – ءونىمدى ساتۋدى ۇيىمداستىرۋ. وسى ماقساتتا بۇگىن مەموراندۋمدارعا قول قويىلدى. بۇل ەكى كومپانيادا 63 مىڭنان اسا ادام جۇمىس ىستەيدى. ال جۇمىسشىلاردى تاماقتاندىرۋعا جۇمسالاتىن شىعىن 10 ملرد تەڭگەدەن اسادى. مەموراندۋم ناقتى ناتيجە بەرۋى كەرەك. بۇل ءىرى كاسىپورىندارعا ءوڭىردىڭ ەكونوميكاسىنا ۇلەس قوسۋعا مول مۇمكىندىك. ال اۋىل تۇرعىندارى ءوزىنىڭ ستاندارتتارعا ساي كەلەتىن ونىمدەرىن ساتا الادى», دەپ ءتۇسىندىردى تامارا دۇيسەنوۆا.
ول اۋىل اكىمدەرىنىڭ مىندەتى مەملەكەتتىك قولداۋ قۇرالدارى تۋرالى اقپاراتتى ءار تۇرعىنعا جەتكىزۋ ەكەنىن اتاپ ءوتتى.
ۆيتسە-پرەمەر سونداي-اق سپورتتى دامىتۋ ماسەلەلەرى بويىنشا قاراعاندى وبلىسىنداعى سپورت ۇيىمدارى مەن بالالار-جاسوسپىرىمدەر مەكتەپتەرىنىڭ باسشىلارىمەن كەڭەس وتكىزدى. تۋريزم جانە سپورت ۆيتسە-ءمينيسترى سەرىك جاراسباەۆ جوسپارلانعان وزگەرىستەر تۋرالى باياندادى. سپورتتىق قاۋىمداستىق بالالار مەن جاسوسپىرىمدەرگە ارنالعان سپورت مەكتەپتەرىن قارجىلاندىرۋعا ارنالعان جان باسىنا شاققانداعى ءنورماتيۆتى ەنگىزۋ تۋرالى ءوز ۇسىنىستارىن ءبىلدىردى. كەلەسى جىلدان باستاپ بۇل نورما قاناتقاقتى جوبا رەتىندە, ونىڭ ىشىندە تەمىرتاۋ قالاسىندا دا سىناقتان وتكىزىلەدى.
ت.دۇيسەنوۆا ايتىلعان پىكىرلەر مەن ۇسىنىستاردى ارنايى قۇرىلعان جۇمىس توبى مۇقيات قارايتىنىن اتاپ ءوتتى.