دىندەردى زەرتتەۋ ورتالىعى «حان شاتىر» ساۋدا ويىن-ساۋىق ورتالىعىندا «اشىق الاڭ» كوپشىلىككە ارنالعان اقپاراتتىق-ءتۇسىندىرۋ اكتسياسىن ۇيىمداستىردى, دەپ حابارلايدى Egemen.kz.
استانا قالاسى اكىمدىگى ءدىن ىستەرى جونىندەگى باسقارماسىنىڭ قولداۋىمەن ۇيىمداستىرىلعان اكتسيا قازاقستان رەسپۋبليكاسىنىڭ 2021-2025 جىلدارعا ارنالعان ۇلتتىق قاۋىپسىزدىك ستراتەگياسىن, سونداي-اق ەكسترەميزم مەن تەرروريزمگە قارسى ءىس-قيمىلدىڭ 2023-2025 جىلدارعا ارنالعان مەملەكەتتىك جۇيەسىن دامىتۋدىڭ كەشەندى جوسپارىن ورىنداۋ شەڭبەرىندە ءوتتى.
«اتالعان اكتسيا وسىمەن ءۇشىنشى رەت ۇيىمداستىرىلىپ وتىر. بۇعان دەيىن بۇل جوبامىز «ارۋجان» ساۋدا ۇيىندە, «استانالىق بازار» اۋماعىندا وتكىزىپ, كوپشىلىكتىڭ ىقىلاسىنا بولەنگەن ەدى. بۇگىن «حان شاتىر» ساۋدا ورتالىعىندا وتكىزىپ جاتىرمىز. نەگىزگى ماقسات – سالت-ءداستۇر, ۇلتتىق قۇندىلىقتار, ەل تاريحى مەن ءدىن ماسەلەلەرىنە قاتىستى ۆيكتورينالىق ساۋالدار ۇيىمداستىرۋ ارقىلى جاس ۇرپاقتىڭ پاتريوتتىق سەزىمدەرىن وياتۋ. ءبىلىم جانە تانىمدىق ساۋالدارعا جاۋاپ بەرگەن, ماقال-ماتەلدەرگە قاتىستى سايىستا مۇدىرمەگەن جەڭىمپازدارعا باسقارمانىڭ العىس حاتى جانە سەرتيفيكاتتار تۇرىندەگى ارنايى سىيلىقتار تابىستالادى. بۇدان بولەك, ءدىني اعىمداردان ساقتانۋ, ولاردىڭ بەلگىلەرى تۋرالى بەينەروليكتەر كۇنى بويى كورسەتىلدى. سونداي-اق ۆولونتەرلەرمەن بىرلەسە وتىرىپ, ءۇش مىڭعا جۋىق ەلوردالىقتارعا ءدىن سالاسىنا قاتىستى ارنايى اقپاراتتىق بۋكلەتتەردى ۇلەستىردىك. وسى ءىس-شاراعا بەلسەندى اتسالىسقان ۆولونتەرلەردى دە ماراپاتتايمىز», دەدى دىندەردى زەرتتەۋ ورتالىعىنىڭ ءبولىم باسشىسى نۇرسۇلتان جانشين.