ەڭبەك جانە حالىقتى الەۋمەتتىك قورعاۋ مينيسترلىگى ەرەكشە قاجەتتىلىكتەرى بار ادامدارعا ينۆاتاكسي قىزمەتىن كورسەتۋ كەزىندە تاكسي اگرەگاتورلارىن پايدالانۋ جونىندەگى قاناتقاقتى جوبانى قولعا العان ەدى. مۇگەدەكتىگى بار, جارىم كوڭىل جانداردى قولداۋعا ارنالعان قايىرىمدىلىق شاراسى قالىڭ بۇقارا تاراپىنان وڭ باعالانىپ وتىر.
ايتالىق, بيىل جىل باسىنان قاراشا ايىنا دەيىن استانا, الماتى قالالارىندا اتالعان قىزمەت 157,9 مىڭ رەت كورسەتىلىپتى. بۇل – وتە جاقسى كورسەتكىش. سەبەبى سالىستىرمالى تۇردە ايتساق, بىلتىر جىل قورىتىندىسى بويىنشا اتالعان قىزمەت ءتۇرى 53,9 مىڭ رەت كورسەتىلگەن ەكەن.
ينۆاتاكسي قىزمەتىنىڭ ساپاسى مەن قىزمەت كورسەتۋ ساپاسىن ارتتىرۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگى اكىمدىكتەرمەن بىرلەسىپ, قىزمەت ءتۇرىن جەتىلدىرۋ, ءتۇرلى وزگەرىس ەنگىزۋگە قاتىستى تىڭ شەشىمدەر قابىلداپ وتىرادى. مىسالى, مۇگەدەكتىگى بار تۇرعىن ەندى ينۆاتاكسي قىزمەتىنە كۇنى بۇرىن, تەلەفون ارقىلى جازىلا الادى. بۇل ەرەكشە قابىلەتتى ازاماتتاردىڭ ساپارىن الدىن الا جوسپارلاۋعا, كولىكتى كوپ كۇتىپ قالماۋعا مۇمكىندىك بەرەدى.
وڭىرلەردە ينۆاتاكسي قىزمەتىن ۇسىناتىن كولىك قۇرالدارىنىڭ ازدىعى, باسقا دا ماسەلەلەر جەتىپ-ارتىلادى. قۋانتارلىعى, وسى ماسەلەلەردى جەڭىلدەتۋ, شەشۋ ماقساتىندا قىزمەت كورسەتۋگە سۇرانىس العان تاكسي اگرەگاتورلارىن تارتۋ جونىندە قاناتقاقتى جوبا باستالدى. مۇنداعى باستى شارت – ساپار اقىسىندا پايىزدىڭ بولماۋى. ول پايىزدار ادەتتە اگرەگاتور پلاتفورمالارىنىڭ پايداسىنا اۋدارىلادى. مۇنىڭ بارلىعىن ەلەپ-ەسكەرگەن «ياندەكس» كومپانياسىنىڭ قاناتقاقتى جوباعا وتەۋسىز نەگىزدە قاتىسۋعا نيەت بىلدىرگەنى – قۇپتارلىق شەشىم.
تۇسىنىكتى ەتىپ ايتار بولساق, قاناتقاقتى جوبا شەڭبەرىندە ەندى ەل ازاماتتارى «ياندەكس Go» ءموبيلدى قوسىمشاسى ارقىلى ينۆاتاكسي قىزمەتىن قولدانا الادى. بۇل قىزمەت الۋشىعا كولىكتى تەزىرەك تاڭداۋعا, ونلاين رەجىمدە تاپسىرىس مارتەبەسىن قاداعالاۋعا, ساپارعا مونيتورينگ جۇرگىزۋگە مۇمكىندىك بەرەدى. قوسىمشادا مۇگەدەكتىگى بار ادامدار جۇرگىزۋشىگە ساپارداعى ەرەكشە قاجەتتىلىكتەرى تۋرالى ەسكەرتۋى ءۇشىن ارنايى مۇمكىندىكتەر ەكرانى ىسكە قوسىلعان. ال جۇرگىزۋشىلەر بولسا, ەرەكشە قابىلەتتى جولاۋشىنى كولىككە وتىرعىزۋ, ودان تۇسۋدە قالاي كومەك كورسەتۋگە بولاتىنى تۋرالى ارنايى نۇسقاۋ الادى.
قاناتقاقتى جوبانىڭ العاشقى كەزەڭىنە استانا, الماتى قالالارىنان مۇگەدەكتىگى بار ادامدار توبى قاتىسادى. كەلەشەكتە ەرەكشە قابىلەتتى ادامدارعا قىزمەت كورسەتۋدىڭ جاڭا فورماتىن ەلدىڭ بارلىق وڭىرىنە جەتكىزۋ مينيسترلىكپەن قوسا, كومپانيا باسشىلىعىنىڭ جوسپارىندا بار.