جۇرت سەنىمىن ارتتىرعان جوبا

شيەلى اۋدانى بيدايكول اۋىلىنداعى «Barly Bai & K» كووپەراتيۆىنىڭ قىزاناق پاستاسىن وندىرەتىن تسەحى – بىلتىرعى باس­تاما جەمىسى. ءوندىرىس ورنىن اشقاندار 27,6 ملن تەڭگە نەسيە الىپ, رەسەيدەن تومات پاستاسى مەن كونسەرۆىلەنگەن ونىمدەردى ءوندىرۋ جەلىسىن ساتىپ العان. تاۋلىگىنە 2 توننا ءونىم وندىرەتىن تسەح ساپا سەرتيفيكاتىن دا يەلەنىپتى. جوبانى ىسكە اسىرۋ بارىسىندا كووپەراتيۆ مۇشەلەرى رەتىندە اۋىل تۇرعىندارى دا تۇقىم, كوشەت جانە مينەرالدىق تىڭايتقىشتارمەن قامتاماسىز ەتىلدى.

وسى اۋدانداعى جەكە كاسىپكەر ءبيبىنۇر ءمۇتالىپوۆانىڭ برونحيت, جۇرەك اۋرۋ­لارى, دەمىكپە مەن اللەرگيانى ەمدەپ, الدىن الۋعا كومەكتەسەتىن تۇزدى بولمە اشۋى­نا دا جوبانىڭ سەپتىگى ءتيدى. باستامانى جۇزەگە اسىرۋعا كاسىپكەر 8,6 ملن تەڭگە كولەمىندە شاعىن نەسيە الىپتى.

شيەلىدەگى «honeymood» نان-توقاش جانە كونديتەرلىك تسەحىنىڭ ونىمدەرى قازىر كوپكە تانىمال. كاسىپكەر جانسايا يمانتاەۆا 2019 جىلى «باستاۋ بيزنەس» باعدارلاماسىمەن وسى ءوندىرىستى باستاپ, بىلتىر «اۋىل اماناتى» باع­دارلاماسىنا قاتىسىپ, نەسيەگە 7 ملن تەڭگە العان. كاسىپكەر «مانساپ» ورتا­لى­عىن­دا وقۋدى بىتىرگەن جاس مامانداردى جۇمىسپەن قامتاماسىز ەتەدى.

«اۋىل اماناتى» جوباسىمەن 1 تومات پاستاسى تسەحى, 34 جىلىجاي اشىلىپ, 671 اسىل تۇقىمدى مال الىنعان. سونىمەن بىرگە 21 ءسۇت جانە ەت ونىمدەرى ءوندىرىسى ىسكە قوسىلىپ, 66 اۋىل شارۋاشىلىعى تەحنيكاسى اكەلىندى. 14 بالىق, 18 قۇس شارۋاشىلىعى دا – وسى جوبانىڭ جەمىسى. جوبا قا­تى­سۋ­شى­لارىنىڭ اراسىنان 38 ادام كونديتەر جانە نان ونىمدەرىن پىسىرۋمەن اينالىسادى, 3 گيدروپونيكا, 7 جيhاز, 34 پلاستيكالىق ونىمدەر مەن قۇرىلىس ماتەريالدارى ءوندىرىسى, 98 قىزمەت كورسەتۋ ورنى اشىلدى. وسىلايشا, بىلتىر جۇزدەگەن جوباعا نەسيە بەرىلىپ, 713 جۇمىس ورنى اشىلعان.

جۋىردا عانا قالا ىرگەسىندەگى بەسارىق اۋىلىندا «اۋىل اماناتى» شەڭبەرىندە 4 ءوندىرىس ورنى جۇمىسىن باستاپ كەتتى.

جۇرتقا ءۇمىت پەن سەنىم سىيلاعان جوبانىڭ ەكىنشى كەزەڭى اياسىندا بيىل 4 ملرد 600 ملن تەڭگە قارجى بولىنەدى. ەندى اكىمدەر باعدارلامانىڭ ارتىقشىلىعىن ءتيىمدى پايدالانىپ, اۋىل حالقىنىڭ تابىسىن وسىرۋگە ۇمتىلۋعا ءتيىس.

«بايقوڭىر» الەۋمەتتىك-كاسىپكەرلىك كورپوراتسياسىنىڭ باسقارۋشى ديرەكتورى مادالي الىشەر ۇلى تۇرعىنداردىڭ ءال-اۋقاتىن ارتتىرىپ, تابىسىن مولايتۋعا نەگىزدەلگەن باستاما شەڭبەرىندە وسى جىلى 575 جوبا قارجىلاندىرىلىپ, 610 جاڭا جۇمىس ورنىن اشۋ كوزدەلىپ وتىرعانىن جەتكىزدى. ءوڭىر ەرەكشەلىگىنە قاراي باسىمدىق وندىرىستىك جوبالارعا بەرىلىپ وتىر. ال مال شارۋاشىلىعىنا قاتىستى جوبالارمەن قاتىسقاندارعا اسىل تۇقىمدى مال ساتىپ الۋ تالابى قويىلادى. بۇل ءتورت ت ۇلىك تۇقىمىن تۇرلەندىرۋمەن قاتار مونيتورينگ كە­زىندە جاقىندارىنىڭ مالىن تىركەپ قويىپ, قارجىنى قالاعانىنشا جاراتىپ جۇرگەندەرگە توسقاۋىل بولماق.

جاۋاپتىلار نەسيە قارجىسى 4 باعىتقا باعدارلاناتىنىن ايتىپ وتىر. اۋىل شارۋاشىلىعى ونىمدەرىن وڭدەۋ سالاسى بويىنشا 108 جوبا قارجىلاندىرىلسا, ەگىنشىلىك سالاسىندا 81 جوباعا قولداۋ كورسەتىلەدى. مال شارۋاشىلىعى بويىنشا 123, باسقا دا ءتۇرلى باعىتتاعى 263 جوبا ماقۇلدانادى دەپ جوسپارلانعان.

قىزىلوردا