ء«بىلىم الۋدىڭ ەرتە-كەشى جوق». وسى ءسوزدى ايتاتىن ادام كوپ. بىراق ءىس جۇزىندە دالەلدەگەندەر نەكەن-ساياق. سولاردىڭ ءبىرى – 57 جاستاعى قىزىلوردالىق كەندەباي ىدىرىسوۆ.
1988-1991 جىلدارى تاشكەنتتەگى قۇرىلىس تەحنيكۋمىندا وقىپ, 2006 جىلى تاۋ-كەن جۇمىستارى ماماندىعى بويىنشا جوعارى وقۋ ورنىن تامامداعان كەندەباي ىدىرىسوۆ بىلىمنەن كەندە ەمەس. بىراق ول زامان اعىمىنا ىلەسىپ, تەحنيكا ءتىلىن مەڭگەرىپ, ساپالى مامان بولۋ ماقساتىندا قازىر قورقىت اتا اتىنداعى قىزىلوردا ۋنيۆەرسيتەتىندە ءبىلىمىن شىڭداپ ءجۇر. «جاسىراتىنى جوق, جاسىڭ ۇلكەيگەننەن كەيىن وقۋ وڭايعا سوقپايدى. بىراق قاي جاسقا كەلسەڭ دە, جاڭاشىلدىققا ۇمتىلعان دۇرىس», دەيدى ول.
قاتال ءتارتىپ
جاپونيادا ۆەلوسيپەدپەن كەلە جاتىپ تەلەفونمەن سويلەسكەندەر 6 اي باس بوستاندىعىنان ايىرىلادى نەمەسە 100 مىڭ يەن ايىپپۇل تولەۋگە مىندەتتى.
جاڭا زاڭ وتكەن جۇمادا كۇشىنە ەندى. بيلىكتىڭ بۇل باستاماسىنا ۆەلوسيپەدشىلەر اراسىندا جول كولىك وقيعاسىنىڭ ارتۋى سەبەپ بولعان. ماسەلەن, بىلتىر 72 مىڭ اپات تىركەلدى. بۇل – ەلدەگى جالپى جول اپاتىنىڭ 20 پايىزىنا تەڭ. ال وسى جىلى ۆەلوسيپەدتەن 1 ادام وپات بولىپ, ونداعان كىسى زارداپ شەككەن.
جارعاناتتار جارىسى
اقش-تا جەر رەسۋرستارىن باسقارۋ بيۋروسى ۇيىمداستىرعان جارعاناتتار اراسىنداعى سۇلۋلىق سايىسى ءوتتى.
وسى ءبىر جاراتىلىس يەسىنىڭ ەكولوگياداعى ماڭىزدى ءرولىن ناسيحاتتاۋدى ماقسات ەتكەن فەدەرالدىق اگەنتتىك بۇل ءىس-شارانى 2019 جىلدان باستاپ ۇيىمداستىرىپ كەلەدى. جابايى تابيعاتتى قورعاۋ جونىندەگى مامان ەمما بۋسكتىڭ ايتۋىنشا, جارعاناتتاردىڭ قورشاعان ورتاعا ۇلەسى زور. ولار زياندى جاندىكتەرمەن قورەكتەنىپ, گۇلدەر مەن جەمىس اعاشتارىن توزاڭداندىرىپ, ورمان شارۋاشىلىقتارىنا وراسان پايدا اكەلەدى. ايتپاقشى, بيىلعى بايقاۋدىڭ جەڭىمپازى ورەگون شتاتىنان كەلگەن قىرىلداۋىق پوتتەر ەسىمدى جارعانات بولدى.