روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمى قازاق مەملەكەتتىك سيمفونيالىق وركەسترى ەلوردا تۇرعىندارى مەن قوناقتارىنا سيمفونيالىق كەش سىيلادى, دەپ حابارلايدى Egemen.kz.
مۋزىكا كەشىندە وركەسترمەن بىرگە سكريپكاشى كاتسۋمۋرا مايۋكو, گوبويشى ميامۋرا كادزۋحيرو, كابۋكي مۋزىكاسىنىڭ شەبەرى موتيدزۋكي تاسايتيرو جانە ۆيرتۋوز كەرنەيشى تسۋدزيموتو ميتسۋكۋني سىندى ايگىلى جاپوندىق مۋزىكانتتار ونەر كورسەتتى.
كەش الدىندا جاپون مادەنيەتىنىڭ باي مۇراسىمەن تەرەڭىرەك تانىسۋعا مۇمكىندىك بەرەتىن قازاق جانە جاپون مۋزىكاسى بويىنشا جانە وريگامي ونەرى بويىنشا شەبەرلىك ساعاتى ۇيىمداستىرىلدى.
حالىقارالىق كونكۋرستاردىڭ لاۋرەاتى كاتسۋمۋرا مايۋكو ەۋروپانىڭ جەتەكشى وركەسترلەرىمەن ونەر كورسەتىپ, تىڭدارمانداردىڭ جۇرەگىن جاۋلاعان تانىمال سكريپكاشى. ول «مۋزىكا ەلشىسى» سىندى كوپتەگەن قايىرىمدىلىق جوبالارىنا بەلسەندى قاتىسادى. 2022 جىلى «جاپونيا-ارمەنيا 2022» كونتسەرتىندە, 2023 جىلى «ALEMSAZ» حالىقارالىق مۋزىكا فەستيۆالىندە ونەر كورسەتكەن.
ال ميامۋرا كادزۋحيرو كوبە قالاسىنان شىققان گوبويشى, توكيو ونەر ۋنيۆەرسيتەتىن تامامداعان. توكيو سيمفونيالىق وركەسترى مەن كوبە ءانسامبلى سەكىلدى تانىمال وركەسترلەرمەن ونەر كورسەتكەن. ماەسترو جاپونيا مەن قازاقستان اراسىنداعى مادەني الماسۋعا اتسالىسىپ, جاپون مۋزىكالىق ءداستۇرىنىڭ سۇلۋلىعىن بۇكىل الەمگە پاش ەتىپ كەلەدى.
موتيدزۋكي تاسايتيرو – ۇلتتىق تەاتردىڭ وقۋ ءبولىمىن تامامداعان ءداستۇرلى كابۋكي مۋزىكاسىنىڭ شەبەرى. جاپونيادا جانە شەتەلدە بەلسەندى ونەر كورسەتىپ, كابۋكي داستۇرلەرىن ساقتاپ, دامىتۋمەن اينالىسادى.
تسۋدزيموتو ميتسۋكۋني – «سيۋنيۋكاي» وركەسترىنىڭ جەتەكشى كەرنەيشىسى, ماحلەر مەن چايكوۆسكيدىڭ سيمفونيالارىنىڭ ورىنداۋشىسى. ميتسۋكۋني جاس مۋزىكانتتارمەن تاجىريبە الماسىپ, ۇرمەلى مۋزىكا ونەرىنىڭ ماڭىزدىلىعىن ناسيحاتتايدى.
كونتسەرتتە قازاقستاننىڭ ەڭبەك سىڭىرگەن قايراتكەرى ەربولات احمەدياروۆ ديريجەرلىك ەتتى.