ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە جوشى ۇلىسىنىڭ 800 جىلدىعىنا ارنالعان «قازاق مەملەكەتتىلىگى: باستاۋلارى, تاريحي ساباقتاستىعى جانە ەۆوليۋتسيا» اتتى حالىقارالىق عىلىمي-تەوريالىق كونفەرەنتسيا ءوتتى. مازمۇندى ءىس-شارا تاريح عىلىمدارىنىڭ دوكتورى, پروفەسسور ساتاي سىزدىقوۆتىڭ 70 جىلدىق مەرەيتويىنا وراي ۇيىمداستىرىلدى.
تۇركى قاعاناتىنان باستاپ, قاراحان, قارلىق, وعىز جانە قىپشاقتاردىڭ تاريحىن ىندەتە زەرتتەپ, تاريح عىلىمىنا سۇبەلى ولجا سالعان عالىمنىڭ بۇگىنگە دەيىن 20-دان اسا مونوگرافياسى, 200-گە جۋىق عىلىمي ماقالاسى جارىق كورگەن. اسىرەسە تاريحشىنىڭ «قارلىق-قاراحان مەملەكەتىنىڭ تاريحى», «قارقارالى-قازىلىق», «اباي جانە ۇلى دالا تۇلعالارىنىڭ مۇرالارى: وركەنيەتتىك ساباقتاستىق» اتتى ەڭبەكتەرىن اۋزى دۋالى عالىمدار جوعارى باعالاعان.
كونفەرەنتسيا مەرەيتوي يەسىن قۇتتىقتاۋمەن باستالدى. الدىمەن عىلىم جانە جوعارى ءبىلىم مينيسترلىگىنىڭ وكىلى مينيستر ساياسات نۇربەكتىڭ قۇتتىقتاۋ حاتىن وقىپ بەردى. ودان كەيىن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, اكادەميك ەرلان سىدىقوۆ پەن «قازاق گازەتتەرى» جشس باس ديرەكتورى, اكادەميك ديحان قامزابەك ۇلى ىزگى لەبىزدەرىن ءبىلدىردى. ال پارلامەنت ءماجىلىسىنىڭ دەپۋتاتى, پروفەسسور ەركىن ءابىل جوشى ۇلىسىنىڭ بوس جەردەن پايدا بولماعانىن ايتا كەلىپ: «ونىڭ نەگىزىن تۇركى مەملەكەتتەرى قالادى. وسى تۇركى مەملەكەتتەرىن زەرتتەۋگە بارلىق سانالى عۇمىرىن ارناعان عالىمنىڭ ءبىرى – ساتاي سىزدىقوۆ. سوندىقتان ۇلتتىق سانامىزدى قالىپتاستىراتىن وسىنداي تاعىلىمدى ءىس-شارانىڭ عىلىمي عانا ەمەس, ساياسي دا ءمانى بولەك», دەپ تاريحشىنىڭ تىڭ ىزدەنىستەرىنە توقتالدى. ءىس-شاراعا الىستان ات ارىتىپ كەلگەن تاجىكستان ۇلتتىق ۋنيۆەرسيتەتىنىڭ دوتسەنتى راحمويل سافاروۆ باستاعان دەلەگاتسيا وكىلدەرى عالىمنىڭ قارلىق مەملەكەتىنىڭ تاريحىن زەرتتەگەن ەڭبەگىنە لايىقتى باعا بەرىپ, مەرەيتوي يەسىنىڭ يىعىنا شاپان جاپتى. ال كونفەرەنتسيا بارىسىندا عالىمدار پلەنارالىق جانە سەكتسيالىق ماجىلىسكە ءبولىنىپ, بايىپتى باياندامالار جاسادى. سونداي-اق ءىس-شارا اياسىندا ساتاي ماقسۇت ۇلىنىڭ «قازىلىق» اتتى ءتورت تومدىعى تانىستىرىلدى.