اتىراۋدان استراحانعا اپاراتىن جول قۇرىلىسى تامامدالۋعا تاياۋ. قۇرىلىسى ۇزاققا سوزىلىپ, جوندەۋ باياۋ جۇرگەن بۇل جول كوپشىلىكتى ابدەن سارساڭعا سالدى. ەندى بۇل جول جوندەۋدەن سوڭ ءۇشىنشى ساناتتان ەكىنشى ساناتقا اۋىستىرىلماق. سول كەزدە كولىك اعىنى دا كوبەيەتىن كورىنەدى.
ءبىر شاقىرىمنىڭ قۇنى قانشا؟
وبلىس اۋماعىندا 3 052 شاقىرىم جول بار. 1 926 شاقىرىمىنا وبلىستىق, 1 126 شاقىرىمىنا رەسپۋبليكالىق ماڭىز بەرىلگەن. مۇنايلى شاھاردان ءتورت باعىتقا شىعاتىن جولدىڭ ءبىرى استراحان وبلىسىنىڭ شەكاراسىنا دەيىن قاتىنايدى. بۇل جولداعى كولىك قوزعالىسىنىڭ جىلدامدىعى ساعاتىنا 110 شاقىرىمعا دەيىن بولادى.
وتكەن اپتادا كورشى ەلمەن كولىك قاتىناسىن جالعايتىن جولدىڭ 80 شاقىرىمى پايدالانۋعا بەرىلدى. «قازاۆتوجول» ۇك» اق باسقارما توراعاسى دارحان يماناشەۆتىڭ ايتۋىنشا, بۇل – «اتىراۋ – رەسەي شەكاراسى» باعىتىنداعى اۆتوموبيل جولىنىڭ 753-833-شاقىرىمى. جول بويىندا 25 بايلانىس جۇيەسى, 13 سۋ وتكىزگىش قۇبىر توسەلدى. مال وتۋگە ارنالعان 5 وتكەل جاسالدى. تۇنگى مەزگىلدە جارىق بەرەتىن 78 تىرەك جوندەلدى. جول جانىنا 155 مىڭ سىزىقتىق مەتر تورلى قورشاۋ قويىلىپ, 435 جول بەلگىسى بەكىتىلدى. توسقاۋىل قورشاۋىنىڭ 8 مىڭ سىزىقتىق مەترى جوندەلدى. ءبىر سانيتارلىق-گيگيەنالىق توراپ ورناتىلدى. ءتورت دەمالىس ورنى اباتتاندىرىلىپ, 26 اۋىسپا جول سالىندى.
«جول اكتيۆتەرىنىڭ ۇلتتىق ساپا ورتالىعى» رمك باس ديرەكتورى بولاتبەك ايتباەۆتىڭ ايتۋىنشا, جول ساپاسى ۇدايى تەكسەرىلگەن. كورشى ەلدىڭ شەكاراسىنا دەيىن سوزىلعان جول اتىراۋ وبلىسىنداعى يساتاي جانە قۇرمانعازى اۋدانىنىڭ اۋماعىمەن وتەدى. جول بويىندا 12 ەلدى مەكەن ورنالاسقان.
جوبا باستالعان كەزدە اتالعان جول قۇرىلىسىنا 98 ملرد تەڭگە بولىنگەن. كولىك ءمينيسترىنىڭ ورىنباسارى ءساتجان ابلاليەۆتىڭ دەرەگىنە سۇيەنسەك, 1 شاقىرىم جولدى سالۋعا شامامەن 600 ملن تەڭگەگە دەيىن قارجى جۇمسالادى. وسى كەزگە دەيىن جول قۇرىلىسىنا بولىنگەن قارجى كولەمى 111,3 ملرد تەڭگەگە جەتكەن.
تەمىرجولمەن تاسىمالداۋ نەگە قىمبات؟
«قازاۆتوجول» ۇك» اق اتىراۋ وبلىستىق فيليالىنىڭ ديرەكتورى مۇرات مىقتىباەۆتىڭ مالىمەتىنشە, جوباعا سايكەس جول بويىنا 6 كوپىر سالۋ قاراستىرىلعان. كوپىردىڭ ءبىرى يساتاي اۋدانىنداعى ح.ەرعاليەۆ اۋىلىنىڭ تۇسىندا ورنالاسقان. قازىر بۇل كوپىردىڭ قۇرىلىسى ءجۇرىپ جاتىر. وسى كەزگە دەيىن جول بويىندا سۋ وتكىزەتىن 60 تۇربا, 1 500-دەن استام جارىق باعانى ورناتىلىپتى.
«جول قۇرىلىسىنا تارتىلعان جۇمىسشىلاردىڭ دەنى – جەرگىلىكتى تۇرعىندار. جاڭعىرتىلىپ جاتقان جولعا 2 ملن توننا ينەرتتى ماتەريال, 42,05 مىڭ توننا جول بيتۋمى, 1,29 ملن توننا اسفالت بەتونى توسەلدى. بۇل جولدىڭ بويىنا 2 250-گە جۋىق ءتۇرلى جول بەلگىسى ورناتىلىپ جاتىر. بۇرىن بۇل جولمەن جۇرۋگە 5-6 ساعات كەتەتىن ەدى. قازىر 2 ساعاتتان ءسال اساتىن ۋاقىتتا ءجۇرىپ وتۋگە بولادى», دەيدى مۇرات مىقتىباەۆ.
ونىڭ ايتۋىنشا, قازىر رەسەي شەكاراسىنا دەيىنگى جولدىڭ 212 شاقىرىمىندا جول توسەمىنىڭ قۇرىلىسى اياقتالعان. ۇزىن جولدىڭ 621–833 شاقىرىم ارالىعىنداعى ۋچاسكەدە نەگىزگى, ال 146,8 شاقىرىمىندا قيىرشىق تاستى-ماستيكالىق اسفالتبەتوننىڭ جوعارى قاباتى توسەلگەن.
«جوباعا سايكەس جول بويىنا 3 سانيتارلىق-گيگيەنالىق توراپ ورناتۋ كوزدەلدى. توراپتىڭ ءبىرى يساتاي اۋدانىنداعى زينەدەن اۋىلىنىڭ ماڭىندا اشىلدى. ال اققىستاۋ اۋىلىندا جول-پايدالانۋ بەكەتى اشىلادى», دەيدى وڭىرلىك فيليال ديرەكتورى.
بەس جىلدان بەرى جول قۇرىلىسىنا قازاقستان, يتاليا, تۇركيا, ازەربايجان كومپانيالارى مەردىگەرلىككە تارتىلعان. وتاندىق كومپانيانىڭ ءبىرى – «اقجولقۇرىلىس» جشس 2020 جىلدان اتىراۋ وبلىسىنداعى جول قۇرىلىسىنا قاتىسىپ كەلەدى. ماڭعىستاۋ وبلىسىندا تىركەلگەن كومپانيانىڭ باس ديرەكتورى امىربەك تولەگەنوۆتىڭ ايتۋىنشا, بۇعان دەيىن قىزىلقوعا جانە ماقات اۋدانىنىڭ اۋماعىندا 119 شاقىرىم جول سالعان. ەندى شەكاراعا دەيىنگى جولدىڭ 56 شاقىرىمىن سالىپ جاتىر.
ء«بىزدىڭ كومپانيادا ەلىمىزدىڭ بارلىق ءوڭىرىنىڭ تۇرعىندارى جۇمىس ىستەيدى. ەڭ تومەنگى جالاقى 100 مىڭ تەڭگەدەن باستالادى. جول قۇرىلىسىندا كەزدەسىپ وتىرعان باستى قيىندىق – ينەرتتى ماتەريالداردىڭ وزگە وڭىرلەردەن تاسىمالدانۋى. ويتكەنى اتىراۋ وبلىسىندا جول قۇرىلىسىنا قاجەتتى قيىرشىقتاس, پگس, بيتۋم سەكىلدى ينەرتتى ماتەريالدار جوق. سول سەبەپتى, ينەرتتى ماتەريالداردى اقتوبە وبلىسىنان تەمىرجولمەن تاسىمالداپ وتىرمىز. بىراق ينەرتتى ماتەريالداردى تەمىرجولمەن تاسىمالداۋ باعاسى قىمبات. وسى جوبا باستالعاندا 1 توننا قيىرشىق تاستى تاسىمالداۋعا 6 مىڭ تەڭگەدەن تولەيتىن ەدىك. قازىر بۇل باعا 11 مىڭ تەڭگەدەن باستالادى. قيىرشىقتاس بەرەتىن مەكەمەگە 1 ملرد تەڭگە تولەدىم. بىراق 200 ملن تەڭگەنىڭ قيىرشىق تاسىن الدىم. نەگە دەسەڭىز, 800 ملن تەڭگە تەمىرجولمەن تاسىمالداۋعا جۇمسالدى», دەيدى امىربەك تولەگەنوۆ.
تاعى ءبىر مەردىگەر – «سپ سينە ميداس ستروي» جشس 80 شاقىرىم ۋچاسكەنى پايدالانۋعا تاپسىرعان. كومپانيانىڭ باس ديرەكتورى مەحمەد ديلشاد بۋداننىڭ مالىمەتىنە سۇيەنسەك, جول قۇرىلىسىنا 500-گە جۋىق ادام, 300-دەن استام تەحنيكا تارتىلىپتى.
«ۋچاسكە قۇرىلىسىنا 250 مىڭ توننا اسفالت توسەلدى. اقتوبە وبلىسىنان 22 مىڭ ۆاگون قيىرشىقتاس, ماڭعىستاۋ وبلىسىنان 25 مىڭ توننا بيتۋم جەتكىزدىك. قۇرىلىس جۇمىسىنا 1,2 ملن توننا توپىراق پايدالانىلدى. جول بويىندا 16 سۋ قۇبىرى, 2 مال وتكەلى, 78 جارىق باعانى, تور جانە كەدەرگى قورشاۋى, 435 جول بەلگىسى, جارىق بەلگىلەرى بار داۋىس زورايتۋعا ارنالعان قۇرىلعى, 4 دەمالىس الاڭى ورناتىلدى», دەيدى جوبا مەنەدجەرى احمەت مۋدۋروگلۋ.
جوباعا ەنبەگەن 5 شاقىرىم
«قازاۆتوجول» ۇك» اق اتىراۋ وبلىستىق فيليالىنىڭ ديرەكتورى مۇرات مىقتىباەۆتىڭ مالىمەتىنشە, جىل سوڭىنا دەيىن 212 شاقىرىم جول تولىعىمەن پايدالانۋعا بەرىلەدى. ال 5 شاقىرىم جولدى جوندەۋ بۇل جوباعا ەنگىزىلمەگەن. نەگە؟
«ويتكەنى اتىراۋ قالاسىنىڭ شەتىنەن باستالاتىن جولدىڭ 5 شاقىرىمىنا وبلىستىق ماڭىز بەرىلگەن. سوندىقتان جولدىڭ بۇل ۋچاسكەسى قايتا جاڭعىرتۋ جوباسىنا ەنگىزىلگەن جوق. ەندى ونى وبلىس بيۋدجەتىنەن قارجى ءبولۋ ارقىلى جوندەۋ كوزدەلىپ وتىر», دەپ ءتۇسىندىردى م.مىقتىباەۆ.
اتىراۋ وبلىسى اكىمىنىڭ ورىنباسارى قايرات نۇرتاەۆتىڭ ايتۋىنشا, مۇنايلى شاھارعا كىرەبەرىستەگى 5 شاقىرىم جولدى كۇردەلى جوندەۋ وتكىزۋ ءۇشىن ارنايى جوبا ازىرلەنىپتى. جوبا مەملەكەتتىك ساراپتامادان وتكەن. «جولدىڭ بۇل بولىگى 4 جولاقتى بولادى. ونىڭ توسەمى 14 مەترگە دەيىن كەڭەيتىلەدى. اتىراۋ قالاسىنىڭ سولتۇستىك بولىگىندەگى بۇل ۋچاسكە وبلىستىق ماڭىزى بار جول رەتىندە جوسپارعا قايتا ەنگىزىلدى», دەيدى ق.نۇرتاەۆ.
سالاداعى ەڭبەك ءوتىلى – 42 جىل
«جول اكتيۆتەرىنىڭ ۇلتتىق ساپا ورتالىعى» رمك باس ديرەكتورى بولاتبەك ايتباەۆتىڭ ايتۋىنشا, جول سالاسىندا مامان جەتىسپەيدى. ۇزاق جىل جۇمىس ىستەگەن ماماندار زەينەت جاسىنا جەتكەن. ماسەلەن, قۇرمانعازى اۋدانىنىڭ تۇرعىنى راقىمعالي سارسەنباەۆ 42 جىلدان بەرى وسى سالادا جۇمىس ىستەيدى.
«قىستا اۋىر تەحنيكامەن جولداعى قاردى كۇرەيمىن. كەيدە اسفالتقا ينەرتتى ماتەريالدار توگەمىن. جۇمىس تاڭەرتەڭگى ساعات 8-دە باستالادى. سودان كەشكى ساعات 6-عا دەيىن مىگىر تاپپايمىز. كۇن رايى بۇزىلىپ تۇرسا دا كۇن دەمەي, ءتۇن دەمەي جۇمىسقا شىعامىز. بۇرىن بۇل جول جوندەلمەگەندە, اۋىر تەحنيكامەن ءجۇرۋ قيىن ەدى. سول قيىندىقتان ارىلدىق. ەندى جولدى بۇلدىرمەۋ ءۇشىن ۇدايى كۇتىم جاساۋ قاجەت», دەيدى ر.سارسەنباەۆ.
اتىراۋ وبلىسى