اتىراۋ وبلىسىنىڭ ەڭ شالعايىنداعى اۋداننىڭ ءبىرى – قىزىلقوعا. ەلدى مەكەندەرىنىڭ كەيبىرى ءوڭىر, اۋدان ورتالىعىنان قاشىقتا ورنالاسقان. بىراق تۇرعىنداردىڭ دەنى التىن بەسىگىنە بالاعان قونىسىنان ىرگە كوتەرمەي وتىر.
وزگە اۋداندارداي ەمەس, مۇندا ءالى دە جىلدىڭ ءتورت مەزگىلىندە تاماعىن قي مەن كومىر قىزۋىنا پىسىرەتىن, سۋدى ارتەزيان قۇدىعىنان ءىشىپ وتىرعان اۋىل تۇرعىندارى بار. وبلىس اكىمى سەرىك شاپكەنوۆتىڭ ايتۋىنشا, جىل سوڭىنا دەيىن اۋدان تۇرعىندارىن ساپالى اۋىزسۋمەن 100 قامتۋ جوسپارلانىپتى.
«قازىر قىزىلقوعا اۋدانىنداعى سوركول, سارقۇماق, قوعام, تاسقۇدىق, اققورا, قوڭىراۋلى, بىلقىلداقتى, كەنباي, قونىستانۋ سەكىلدى 9 ەلدى مەكەندە اۋىلىشىلىك سۋ قۇبىرى جۇرگىزىلىپ جاتىر. ال مۇقىر اۋىلىندا ەكىنشى سۋ ايداۋ ستانساسىن قايتا جاڭعىرتۋ جۇمىسىن جىل سوڭىنا دەيىن اياقتاۋدى باقىلاۋىمدا ۇستاپ وتىرمىن. بۇعان قوسا «كەرەگەن-ساعىز-جامانسور» توپتىق سۋ قۇبىرىن رەكونسترۋكتسيالاۋ, ميالى اۋىلىنا جازعى سۋ قۇبىرىن جۇرگىزۋ اياقتالادى», دەيدى س.شاپكەنوۆ.
اكىمنىڭ مالىمەتىنە سۇيەنسەك, قىزىلقوعا اۋدانىنداعى تۇرمىسى تومەن تۇرعىنداردى باسپانامەن قامتۋعا 80 پاتەر ساتىپ الۋ كوزدەلگەن. وسى كەزگە دەيىن ميالى اۋىلدىق وكرۋگىندە 39, جانگەلديندە – 5, ساعىز اۋىلدىق وكرۋگىنىڭ تۇرعىندارىنا 6 باسپانا ساتىپ الىنىپتى. «جىل سوڭىنا دەيىن تاعى 50 ءۇيدى ساتىپ الىپ بەرەمىز. بۇل ماسەلە بيىل تولىقتاي شەشىمىن تابادى», دەپ مالىمدەدى وبلىس اكىمى.
قىزىلقوعا اۋدانىندا كەيىنگى جىلدارى تۇرعىنداردىڭ تۇرمىسىن جاقسارتۋمەن قاتار, بۇقارالىق سپورتتى دامىتۋعا دا نازار اۋدارىلدى. قازىر اۋداننىڭ 10 مىڭعا جۋىق تۇرعىنى سپورتپەن تۇراقتى تۇردە شۇعىلدانادى. دەگەنمەن 10 اۋىلدىق وكرۋگتىڭ ەكەۋىندە عانا سپورت كەشەنى بار. بيىل 8 اۋىلدا 11 اشىق سپورت الاڭىنىڭ قۇرىلىسى باستالدى. سونداي-اق الداعى جىلى 7 سپورتتىق نىساندى پايدالانۋعا بەرۋ جوسپارلانىپ وتىر.
جاقىندا اۋداننىڭ ەكى اۋىلىندا سپورت كەشەنى اشىلدى. ونىڭ ءبىرى تاسشاعىل اۋىلدىق وكرۋگىندە ورنالاسقان. بۇل وكرۋگتە 1884 ادام تۇرادى. ءبىر وندىرىستىك كووپەراتيۆ, 26 شارۋا قوجالىعى, 1 ورتا مەكتەپ, 1 بالاباقشا, 1 ۋچاسكەلىك امبۋلاتوريا, 5 دۇكەن, كىتاپحانا, اۆتوماتتى تەلەفون ستانساسى, پوچتا بايلانىسى تورابى جۇمىس ىستەيدى.
سپورت كەشەنىنىڭ ەكىنشىسى ويىل اۋىلدىق وكرۋگىنىڭ ورتالىعى – جاسقايرات اۋىلىندا ورنالاسقان. مۇنداعى 410 وتباسىندا 2310 ادام تىركەلگەن. وكرۋگتە 1 سەرىكتەستىك, 17 شارۋا قوجالىعى مەن 66 كاسىپكەرلىك نىسانى بار. «شالقىما» مادەنيەت ۇيىندە اۋىلدىق كىتاپحانا ورنالاسقان. تۇرعىندارعا مادەنيەت ءۇيىنىڭ جانىنان دومبىرا, ەسترادالىق ءانسامبلى, دراما, بي, ءان ۇيرەتۋ, سۋرەتشىلەر ۇيىرمەلەرى مەن مادەني-ۇگىت بريگاداسى قىزمەت كورسەتەدى.
قاناتتاس قونىستانعان ەكى اۋىلدىڭ ءبىر-بىرىنەن ايىرماسى جوققا ءتان. تۇرعىندار ورتالىقتاندىرىلعان سۋ, گاز جۇيەسىن پايدالانىپ وتىر. قوس وكرۋگتە يگىلىككە بەرىلگەن سپورت كەشەندەرىنىڭ دە ءبىر-بىرىنە ۇقساستىعى كوپ. جاڭا نىساندار فۋتبول, ۆولەيبول, باسكەتبولعا ارنالعان الاڭ, كۇرەس زالىمەن, ءتۇرلى قۇرال-جابدىقپەن قامتىلعان.
«ەلىمىزدە بۇقارالىق سپورت پەن دەنە شىنىقتىرۋدى دامىتۋ, سالاۋاتتى ءومىر سالتىن قالىپتاستىرۋ كەڭ قانات جايىپ كەلەدى. سونىڭ ناقتى مىسالىنداي, جاسقايرات پەن تاسشاعىل اۋىلىندا جاڭا سپورت كەشەنى اشىلدى. مۇندا ەلىمىزدىڭ ابىرويىن اسقاقتاتاتىن, كوك تۋىمىزدى كوكتە جەلبىرەتەتىن رۋحتى سپورتشىلار تاربيەلەنەتىنىنە سەنەمىن», دەدى سەرىك شاپكەنوۆ.
اتىراۋ وبلىسى