تاياۋدا ەلىمىزدىڭ ۇلتتىق مەرەكەسى – رەسپۋبليكا كۇنى كەڭ كولەمدە اتالىپ ءوتتى. مەملەكەتتىلىگىمىزدىڭ ىرگەتاسىن قالاعان ۇلىق كۇننىڭ قۇرمەتىنە پرەزيدەنت اتىنان ماراپات العان ازاماتتاردىڭ اراسىندا ءبىزدىڭ گازەتتىڭ بۇرىنعى باسشىلارى مەن قىزمەتكەرلەرى دە بار. «قازاق گازەتتەرى» سەرىكتەستىگىندە وتكەن جيىندا باس ديرەكتور ديحان قامزابەك ۇلى ولاردىڭ ەسىمدەرىن قۇرمەتپەن اتادى.
– «Egemen Qazaqstan» گازەتىنىڭ بۇرىنعى باسشىلارى نۇرلان ورازالين – «وتان» وردەنىن, دارحان قىدىرالى «بارىس» وردەنىن يەلەندى. گازەتىمىزدىڭ ارداگەرى, ادەبيەت سىنشىسى قۇلبەك ەرگوبەك اباي اتىنداعى مەملەكەتتىك سىيلىقتىڭ لاۋرەاتى بولدى. سونىمەن قاتار گازەتتىڭ كەزىندە ماڭعىستاۋ وبلىسىندا مەنشىكتى ءتىلشىسى بولعان تەمىرحان مەدەتبەك «حالىق جازۋشىسى» اتاندى. بۇل ازاماتتاردىڭ ارقايسى ءبىزدىڭ باسىلىمنىڭ دامۋىنا ەلەۋلى ۇلەس قوسقان.
ۇلتتىق مەرەكە قارساڭىندا «قازاق گازەتتەرى» سەرىكتەستىگىنە قارايتىن باسىلىمداردىڭ قىزمەتكەرلەرى دە نازاردان تىس قالماي, بىرقاتارى جوعارى ماراپات يەسى اتانعان ەدى. باس ديرەكتور جيىن بارىسىندا ۇجىم الدىندا ولارعا ماراپاتتارىن تاپسىرىپ, توسبەلگىلەرىن تاعىپ, ارنايى قۇتتىقتادى. اتاپ ايتقاندا, «Egemen Qazaqstan» گازەتىنىڭ ۇلىتاۋ وبلىسىنداعى ءتىلشىسى ابدوللا داستان, ماڭعىستاۋ وبلىسىنداعى ءتىلشىسى گۇلايىم ءداۋىتباي جانە قىزىلوردا وبلىسىنداعى ءتىلشىسى مۇرات جەتپىسباەۆ «ەرەن ەڭبەگى ءۇشىن» مەدالىمەن ماراپاتتالدى.
ال «كازاحستانسكايا پراۆدا» گازەتىنىڭ ءتىلشىسى يۋليا پولونسكايا «شاپاعات» مەدالىن, «Egemen Qazaqstan» گازەتىنىڭ ءفوتوتىلشىسى ەرلان ومار مەن «كازاحستانسكايا پراۆدا» گازەتىنىڭ ءفوتوتىلشىسى يۋري بەككەر پرەزيدەنتتىڭ العىسحاتىن يەلەندى.
سونىمەن قاتار مەيرام قارساڭىندا ءبىر توپ ارىپتەسىمىز «اقپارات سالاسىنىڭ ۇزدىگى» اتاندى. ارنايى توسبەلگىنى كەۋدەسىنە تاققاندار قاتارىندا «Egemen Qazaqstan» گازەتىنىڭ اعا تىلشىلەرى گۇلنار جولجان مەن مارجان ءابىش, «كازاحستانسكايا پراۆدا» گازەتىنىڭ اقمولا وبلىسىنداعى ءتىلشىسى راۋشان وتەۋلينا جانە ءفوتوتىلشىسى يگور بۋرگاندينوۆ, kazpravda.kz سايتىنىڭ ءتىلشىسى گۇلميرا قۇناپيا بار. بۇعان قوسا ارىپتەستەرىمىز اينۇر رايىمقۇلوۆا مەن بەكەن قايرات ۇلى مادەنيەت جانە اقپارات مينيسترلىگىنىڭ قۇرمەت گراموتاسىمەن, باقىتگۇل راحيمباەۆا العىسحاتىمەن ماراپاتتالدى.
جيىن بارىسىندا د.قامزابەك ۇلى سەرىكتەستىككە قاراستى باسىلىمدارعا كەلەسى جىلعا جازىلۋ ناۋقانى باستالعانىن, وسىعان وراي وبلىستاردا جازىلىمدى ۇيىمداستىرۋعا كىرىسۋ قاجەتتىگىن ەسكە سالدى. مەنشىكتى تىلشىلەرگە وبلىستىق اكىمدىكپەن, ءىرى كاسىپورىندارمەن, سونداي-اق وقۋ ورىندارىمەن بايلانىس ورناتىپ, جۇمىس جۇرگىزۋدى تاپسىردى. وتكەن جىلدان باستاپ kaspi.kz قوسىمشاسى ارقىلى ونلاين جازىلۋ جولعا قويىلعانى بەلگىلى. سەرىكتەستىك باسشىسى اتالعان قوسىمشا ارقىلى جازىلۋ جەكە تۇلعالارعا ارنالعانىن, باعاسى ءتيىمدى ەكەنىن اتاپ ءوتتى.