مەملەكەت باسشىسى قاسىم-جومارت توقاەۆ بيىلعى جولداۋىندا ەسىرتكى قىلمىسى تاقىرىبىنا تاعى دا توقتالىپ, ناشاقورلىققا قارسى كۇرەستىڭ ماڭىزدى مىندەت ەكەنىن ايتتى. ونىڭ ايتۋىنشا, بۇل – ۇلتتىڭ گەنەتيكالىق قورىن امان ساقتاپ قالۋ ماسەلەسى. ء«بىز وسىعان دەيىن قاجەتتى زاڭنامالىق شارالاردى قابىلدادىق. بىراق ناقتى ناتيجەگە قول جەتكىزدىك دەۋگە ءالى ەرتە. ءاربىر مەملەكەتتىك قۇرىلىم, اسىرەسە قۇقىق قورعاۋ ورگاندارى ءتيىمدى جۇمىس ىستەپ جاتىر دەپ ايتا المايمىز. ەسىرتكى ماسەلەسى ۋشىعىپ بارادى», دەدى ول.
راسىندا, ەلىمىزدە ەسىرتكى ساۋداسى مەن تاسىمالىنا قارسى تىزە قوسىپ كۇرەسۋ جاعى كەمشىن سوعىپ جاتقانعا ۇقسايدى. بالكىم, ونىڭ تارالۋىنا مۇددەلى توپتار دا بولۋى عاجاپ ەمەس. ويتكەنى تىركەلىپ جاتقان ەسىرتكى قىلمىستارىنا قاراپ وتىرساق, قوعام جەگىقۇرتىن ەلگە كىرگىزۋدىڭ نەبىر قيتۇرقى امالدارى جاسالاتىنىن كورۋگە بولادى. ءوندىرىس ورىندارىن اشىپ, دايىن ءونىمدى وتكىزۋ مەن ەكونوميكالىق بايلانىستاردى جولعا قويۋ – قيىننىڭ قيىنى. ال ەسىرتكى زاتتارىنىڭ ءوندىرىسىن تەز ارادا ۇيىمداستىرىپ, وتكىزۋ جاعىنا كەلگەندە ابجىلدىك تانىتاتىندار بارشىلىق. وكىنىشتىسى – بۇعان جۇرتشىلىق تاراپىنان سۇرانىستىڭ بولۋى دا سەبەپ.
وسىنداي زاڭسىزدىقتاردىڭ جولىن كەسۋ ماقساتىندا مەملەكەت باسشىسىنىڭ تاپسىرماسىنا سايكەس كولىك پروكۋراتۋراسى جانە باسقا دا قۇقىق قورعاۋ ورگاندارى ەسىرتكى بيزنەسىنە قارسى كۇرەستى, شەكارادا جۇكتەر مەن پوشتا جونەلتىلىمدەرىن باقىلاۋدى كۇشەيتىپ, ەلىمىزگە ەسىرتكىنىڭ شەتەلدەن زاڭسىز اكەلىنۋىن بولدىرماۋ ماقساتىندا شارالار قابىلداپ جاتىر. باس پروكۋراتۋرانىڭ مالىمەتىنشە, بيىلدىڭ وزىندە زاڭسىز اينالىمنان 1 توننادان اسا ەسىرتكى زاتى تاركىلەنگەن, ونىڭ ىشىندە 774 كگ گەروين, 155 كگ ماريحۋانا, 37 كگ گاشيش جانە گاشيش مايى, 34 كگ كوكنار, سونداي-اق 1 كگ سينتەتيكالىق ەسىرتكى بار. بۇل «تاۋارلاردىڭ» «قارا نارىقتاعى» جالپى قۇنى 7 ملرد تەڭگەدەن ارتىق دەپ باعالانىپ وتىر.
باس پروكۋراتۋرا شەتەلدەن كەلەتىن ەسىرتكى زاتتارىنىڭ كوبى تۇرمىستىق تاۋار رەتىندە جاسىرىلاتىنىن ايتادى. ماسەلەن, قىلمىستىق توپ يراننان وسىنداي جولمەن گەرويننىڭ ءىرى پارتياسىن اكەلۋگە تىرىسقان. سونىمەن قاتار ەۋروپا, اقش جانە تايلاندتان كەلگەن ەسىرتكى زاتتارى بار 50-دەن اسا پوشتا جولدانىمدارى ۇستالىپتى. ال قارجىلىق مونيتورينگ اگەنتتىگى اقش-تان ەسىرتكى زاتتارىن پوشتا ارقىلى كونتراباندالىق جولمەن جەتكىزەتىن جۇيەلى ارنانى جويدى. ناتيجەسىندە, ون كۇدىكتى ۋاقىتشا ۇستاۋ يزولياتورىنا قامالىپ, 15 كگ كاننابيس سىعىندىسى جانە 8 كگ ماريحۋانا تاركىلەندى. 21 ادام تۇرمەگە قامالدى, اراسىندا شەتەل ازاماتتارى دا بار.
باتىس قازاقستان وبلىسىنىڭ پروكۋراتۋرا قىزمەتكەرلەرى الەۋمەتتىك جەلىلەردى باقىلاۋ بارىسىندا بەلگىسىز بىرەۋلەردىڭ وبلىس اۋماعىندا ەسىرتكى, پسيحوتروپتىق زاتتار مەن پرەكۋرسورلاردى جارنامالاۋ جانە ساتۋ بويىنشا ۇگىت-ناسيحات ماقساتىندا جاساعان تەلەگرام ارنالارىن انىقتادى. وسى قىلمىستىق قۇقىق بۇزۋشىلىقتاردى جاساعان ادامداردى تابۋ ءۇشىن سوتقا دەيىنگى تەرگەپ-تەكسەرۋدى باستاپ, ودان ءارى تەرگەۋ ءۇشىن پوليتسياعا جولدادى. ناتيجەسىندە, ەسىرتكىنى تىكەلەي جارنامالايتىن 3 چات بۇعاتتالىپ, كىنالىلەر انىقتالىپ جاتىر. جۋىردا تەلەگرامنىڭ نەگىزىن قالاۋشى پاۆەل دۋروۆ مەملەكەت تاراپىنان ءتيىستى سۇراتۋ بولعان جاعدايدا قىلمىسقا سەبەپشى ارنالاردىڭ بايلانىس مالىمەتتەرىن اشاتىنىن ايتقانى بەلگىلى. بۇل قادام تەلەگرامدى تورلاپ العان ەسىرتكى تاراتۋشىلاردىڭ ارەكەتىنە توسقاۋىل قويادى دەپ ۇمىتتەنەمىز.
اۋىزدى قۋ شوپپەن سۇرتۋگە دە بولمايدى. ەلىمىزدە ەسىرتكى قىلمىسىمەن كۇرەسۋ ءۇشىن ءتۇرلى شارا قابىلدانىپ جاتىر. سونىڭ ءبىرى – شىمكەنت قالاسىنىڭ پروكۋراتۋراسى ناشاقورلىققا شاقىراتىن جارنامالارمەن كۇرەسكە قالانىڭ كوممۋنالدىق مەكەمەلەرىندە ىستەيتىن مىڭنان اسا قىزمەتكەردى جۇمىلدىردى. ەندى كوممۋنالدىق مەكەمەلەر قالانىڭ تازالىعىن قامتاماسىز ەتۋ جانە ساقتاۋمەن قاتار, قوعامدىق ورىنداردا ەسىرتكىنى ساتۋ, تاراتۋ سايتتارىنىڭ جارنامالارى بار سۋرەتتەردى قۇقىق قورعاۋ ورگاندارىنا حابارلاۋعا مىندەتتى. بۇل باستاما ەسىرتكى جارناماسىمەن ءتيىمدى, ماقساتتى ءارى تۇراقتى تۇردە كۇرەسۋگە مۇمكىندىك بەرمەك.
ماقالامىزدىڭ باسىندا ەسىرتكى ءوندىرىسى جايىندا بەكەر ءسوز قوزعاعان جوقپىز. وكىنىشكە قاراي, ەلىمىزدىڭ ءار ايماعىندا ەسىرتكى زەرتحانالارىن اشىپ الىپ, يمپورتقا تاۋەلدىلىكتەن ارىلامىز دەگەن «ىزگى نيەتتى» قىلمىسكەرلەر تابىلىپ جاتىر. ماسەلەن, جۋىردا جەتىسۋ وبلىسىندا پ. جانە ت. ەسىمدى ەكى ازامات قىلمىستىق كەلىسىمگە كەلە وتىرىپ, سينتەتيكالىق ەسىرتكى ءوندىرىپ, ساتۋ ءۇشىن تەكەلى قالاسىنان ءۇي جالداعان. ەسىرتكى زەرتحاناسىن ءتىنتۋ كەزىندە 21 كگ پسيحوتروپتىق زاتتار مەن زەرتحانالىق قۇرال-جابدىق, اتاپ ايتقاندا, ەسىرتكى زاتتاردى وراۋ ءۇشىن ەلەكتروندى تارازىلار, پاكەتتەر, فولگا, يزولەنتا جانە ت.ب. زاتتار تاركىلەندى. سوت ۇكىمىمەن ەكەۋى دە 10 جىلعا باس بوستاندىعىنان ايىرىلدى. ۇكىم زاڭدى كۇشىنە ەنگەن جوق.