جەلىگە جەتكىزبەي تۇرعان راديوفوبتار

ۇيالى بايلانىس وپەرا­تور­لارى ينتەرنەت جىل­دام­دىعىنىڭ باياۋ بولۋىنا راديوفوبتار كىنالى دەگەندى ۇنەمى العا تارتادى. «Beeline» كوم­پا­نياسى وكىلىنىڭ ايتۋىن­شا, تۇر­عىن­دارمەن كەلىسىمگە كەلۋ قيىن شارۋا.

«ادەتتە انتەننالاردى الىپ تاستاڭدار دەگەن تالاپ ءىرى قالا­لار­دا كوپ قويىلادى. اسىرەسە استانا, الماتى, جەزقازعان, شىمكەنت, اقتاۋ, پاۆلودار سياقتى ابونەنتتەر سانى كوپ جانە جەلى جۇكتەمەسى جوعارى وڭىرلەردە بولادى. جىل سايىن ابونەنتتەر سانى مەن ولاردىڭ تۇتىناتىن ينتەرنەت ترافيگى ءوسىپ وتىرعاندىقتان, بازالىق ستانسالاردى كوبىرەك ورناتۋ قاجەتتىلىگى تۋىندايدى. وسىعان بايلانىستى وپەراتورلىق جابدىققا قارسى كوزقاراستاعى راديوفوبتارمەن ءجيى ۇشىراسامىز. مۇنداي ادامدار قولدانىستاعى ستانسالاردى الىپ تاس­تاۋدى تالاپ ەتەدى نەمەسە جاڭاسىن ورناتۋعا قارسى بولادى. تاعى ءبىر ماسەلە – شاتىرداعى ورىنداردىڭ جالداۋ قۇنىنىڭ تىم قىمبات بولۋى», دەيدى «Beeline» كومپا­نيا­سىنىڭ وكىلى انارا سمايلوۆا.

«Kcell» بايلانىس وپەراتورى بىلتىر ەلىمىز بويىنشا 115 بازالىق ستانسانى دەمونتاجداسا, بيىلعى العاش­قى توعىز ايدا 165 بازالىق ستان­سانى الىپ تاستاۋعا ءماجبۇر بولعان. سونداي-اق ولار دا ستانسا­لار ورناتاتىن ورىننىڭ جالداۋ قۇ­نى جوعارى دەگەن شاعىم ايتىپ وتىر.

«مەملەكەتتىك مەكەمەلەرگە تيەسىلى عيماراتتاردا بازالىق ستانسالاردى مەملەكەتتىك ورگان­نىڭ نۇسقاۋىمەن الىپ تاستايمىز. ال تۇرعىن ءۇي كەشەندەرىندە ستانسا­لار تۇرعىنداردىڭ كوپشىلىگى دا­ۋىس بەرگەن جاعدايدا عانا الىنادى. دەمونتاجدىڭ تاعى ءبىر سەبەبى – جالداۋ قۇنىنىڭ بىرنەشە ەسە كوتەرىلۋى», دەيدى «Kcell» وكىلى.

ايتۋلارىنشا, كەي­بىر مەنشىك يەلەرى جالداۋ قۇنىن 500-700 مىڭ تەڭگەگە دەيىن كوتەرەدى, بۇل تىم قىمبات ءارى ءتيىمسىز. ەگەر وپە­را­تور مۇنداي شارتتارعا كەلىسەتىن بولسا, بارلىق جەردە جالداۋ قۇنى كوتە­رىلىپ كەتەدى. ەل بويىنشا ون مىڭ­داعان بازالىق ستانسا بار ەكەنىن ەسكەرسەك, شىعىن بىرنەشە ەسە ارتىپ كەتۋى مۇمكىن.

«Beeline» ۇيالى وپەراتورى­نىڭ مالىمدەۋىنشە, زاڭ بويىنشا­ بازالىق ستانسانى ورناتۋعا تۇر­عىن­داردىڭ كوبى كەلىسۋى قاجەت. الايدا كەي جاعدايدا راديوفوبتار قاتاڭ قارسىلىق تانىتادى. ولار كورشىلەرىن كەلىسپەۋگە ۇگىتتەيدى, جانجال شىعارىپ, جابدىقتى, سىندىرىپ تاستاۋعا دەيىن بارادى. سوندىقتان كەيدە باسقا تۇرعىندار جانجال شىعارماۋ ءۇشىن قارسى­لىق بىل­دىر­گەندەردىڭ تالابىنا كونۋگە ءماجبۇر بولادى.

«كومپانيا جەرگىلىكتى تۇر­عىن­­­دارمەن كەلىسىمگە كەلۋ ءۇشىن بار كۇشىن سالادى. ينجەنەرلەر راديو­تولقىنداردىڭ قاۋىپسىزدىگى تۋرالى تۇسىندىرەدى, ولشەۋ جۇمىستارىن جۇرگىزەدى. قورىتىندىلارىن دالەل رەتىندە ۇسىنادى, كەلىسسوزدەرگە اكىمدىك پەن جاۋاپتى مينيسترلىكتىڭ وكىلدەرىن شاقىرادى. الايدا راديو­­فوبيا – اقىلعا قونىم­سىز قۇبى­لىس, سوندىقتان تەحنو­لو­گيانىڭ قاۋىپ­سىز­دىگى ايقىن بولعانىمەن, ادامداردى سەندىرۋ مۇمكىن بولماي وتىر. مەملەكەتتىك ورگانداردىڭ وكىلدەرى دە بۇل جاعدايعا ىقپال ەتە المايدى», دەيدى «Beeline» وكىلى ا.سمايلوۆا.

«Kcell» كومپانياسى دا مۇنداي جاعدايدا بايلانىس سالاسىنداعى ۋاكىلەتتى ورگانعا, اكىمدىككە كوندومينيۋم كەڭەسىنە جۇگىنەتىنىن ايتادى. بىراق ماسەلە ۇنەمى وڭىنان شەشىلە بەرمەيدى. دەگەنمەن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى وسى جاعدايدى رەتتەۋ ماقساتىندا «بايلانىس تۋرالى» زاڭ جوباسىن ازىرلەۋگە كىرىسكەن.

سونداي-اق قۇرىلىس ءجۇرىپ جاتقان نىساندار دا ينتەرنەت جىل­دام­دىعىنا ايتارلىقتاي اسەر ەتەتىن كورىنەدى. قۇرىلىس ءجۇرىپ جاتقان قالالاردا جاڭادان سالىنعان عيما­راتتار راديوسيگنالدى جاۋىپ تاس­تا­عان­دىقتان, وپەرا­تورلارعا بازالىق ستانسانى ورناتۋعا باسقا ورىن ىزدەۋگە تۋرا كەلەدى. راديوسيگنال فيزيكا زاڭدىلىقتارىنا سايكەس عيماراتتار ارقىلى وتە المايدى. سونىمەن قاتار قۇرىلىسشىلار بايلانىسقا ارنالعان ينفراقۇرى­لىمدى جوسپار­لامايدى جانە وپە­راتورلارعا قۇرىلىس جوسپارلارى تۋرالى ەسكەرت­پەيدى, سول سەبەپتى جاڭا تۇرعىن ۇيلەردىڭ تۇرعىندارى ءجيى بايلانىسسىز قالادى.

بازالىق ستانسانى ورناتۋعا كەتەتىن ۋاقىت تا, قاراجات تا از ەمەس. مىسالى, «Beeline» وكىلى ءبىر ستانساعا 100 ميلليون تەڭگە كەتەدى دەيدى. بايلانىس وپەراتورلارى كوبىنە مەملەكەتتىك ساتىپ الۋ سالالارىندا كەدەرگىلەرگە ۇشىراسادى ەكەن. سوندىقتان بۇل ۇدەرىستى جەڭىلدەتسە, جاعداي تۇزەلەر مە ەدى دەپ وتىر. ء«بىر بازالىق ستانسانى ورناتۋعا 6 ايدان ءبىر جىلعا دەيىن ۋاقىت كەتەدى. بۇل ۇدەرىستىڭ كەزەڭدەرى ارنايى سىزبادا كورسەتىلگەن. قۇرىلىس, سەس, مەم­لەكەتتىك ساتىپ الۋ سالالارىندا كەدەرگىلەر بار. ونى جەدەلدەتۋ ءۇشىن بۇنى زاڭنامالىق دەڭگەيدە جەڭىلدەتۋ قاجەت», دەيدى «Kcell» كومپانياسىنىڭ مامانى.

ۇدەرىس جەڭىلدەسە, «Kcell» كومپا­نيا­سى 2027 جىلعا دەيىن ەل بو­يىن­شا 5G-ءدىڭ 3527 بازالىق ستان­سا­سىن ورناتۋدى جوسپارلاپ وتىر. «Beeline» بايلانىس وپەراتورىنىڭ دا جىل­دام­دىعى جوعارى بازالىق ستان­سالاردى ورناتىپ جاتقانى بەلگىلى بولدى.