رەسپۋبليكا كۇنى قارساڭىندا ەلوردادا «ۇزدىك پەداگوگ - 2024» رەسپۋبليكالىق بايقاۋىنىڭ جەڭىمپازدارى ماراپاتتالدى. بيىلعى جىلى اتالعان بايقاۋعا مەكتەپتەر مەن كوللەدجدەردەن بارلىعى 1750 مۇعالىم قاتىسىپ, ونىڭ ىشىندە 64 پەداگوگ ءوز ءىسىنىڭ ۇزدىگى بولىپ تانىلدى, دەپ حابارلايدى Egemen.kz وقۋ-اعارتۋ مينيسترلىگىنىڭ ءباسپاسوز قىزمەتىنە سىلتەمە جاساپ.
وقۋ-اعارتۋ ءمينيسترى ارىپتەستەرىن سالتاناتتى جاعدايدا قۇتتىقتاپ, قوعامداعى ۇستاز ءرولىنىڭ ماڭىزدىلىعىن اتاپ ءوتتى. ونىڭ ايتۋىنشا, جىل سايىن قازاقستاندىق ۇستازدار حالىقارالىق دەڭگەيدە جوعارى كورسەتكىشتەرگە قول جەتكىزىپ كەلەدى. مينيستر بيىل وقۋشىلار الەمدىك بەدەلدى پاندىك وليمپيادالاردا 26 مەدال جەڭىپ العانىن جانە بۇل جۇلدەلەردىڭ ەكەۋى التىن مەدال ەكەنىن اتاپ ءوتتى.
«مەملەكەت كۇللى پەداگوگيكالىق قاۋىمداستىققا وراسان زور سەنىم مەن قۇرمەت, قولداۋ ءبىلدىرىپ كەلەدى. كۇنى كەشە عانا ءبىزدىڭ ەكى ۇستازىمىز «قازاقستاننىڭ ەڭبەك ەرى» اتاعىنا يە بولدى, بۇگىن دە پەداگوگتەرىمىزدى تورگە وزدىرىپ, ولارعا قۇرمەت كورسەتۋدەمىز. بۇل ماراپاتتاردىڭ بارلىعى ۇستازداردىڭ ەلىمىزدىڭ يگىلىگىنە, ادامي كاپيتالدى قالىپتاستىرۋعا جانە وسكەلەڭ ۇرپاقتى تاربيەلەۋگە قوسقان ولشەۋسىز ادال ەڭبەكتەرىنىڭ مەملەكەت تاراپىنان لايىقتى باعالاناتىنىن جانە پەداگوگ مارتەبەسىن كوتەرۋدىڭ جاڭا كەزەڭىن ايعاقتايدى», دەدى عاني بەيسەمباەۆ.
ايتا كەتەيىك, رەسپۋبليكالىق بايقاۋ جەڭىمپازدارى «ۇزدىك پەداگوگ» كۋالىگىمەن, «ۇزدىك پەداگوگ» توسبەلگىسىمەن جانە 1000 اەك (3,6 ملن تەڭگەدەن استام) مولشەرىندە اقشالاي سىياقىمەن ماراپاتتالدى.
سونداي-اق رەسپۋبليكا كۇنىنە ارنالعان سالتاناتتى شارادا وقۋ-اعارتۋ جۇيەسىنىڭ بىرقاتار قىزمەتكەرلەرىنە «ەرەن ەڭبەگى ءۇشىن», «ەڭبەك ارداگەرى» مەدالدەرى, «ى. التىنسارين», ء«بىلىم بەرۋ ءىسىنىڭ قۇرمەتتى قىزمەتكەرى» توسبەلگىلەرى جانە باسقا دا ۆەدومستۆولىق ناگرادالار تاپسىرىلدى.