قىزىلوردادا قاراڭعىنى جامىلىپ قىلمىسقا باراتىندار قاتارى جىل ساناپ ازايىپ كەلەدى. بۇل – كوشەلەردە ورنالاسقان باقىلاۋ كامەرالارىنىڭ سەپتىگى. وبلىستىق پوليتسيا دەپارتامەنتى ءباسپاسوز قىزمەتىنىڭ دەرەگىنشە, جىل باسىنان بەينەكامەرالار كومەگىمەن 122 قىلمىس اشىلىپتى.
وسى كوكتەمدە وبلىس اكىمى نۇرلىبەك نالىباەۆتىڭ قالاداعى نىسانداردى ارالاۋ كەزىندە وبلىس اكىمى اپپاراتىنىڭ تسيفرلىق تەحنولوگيالار ءبولىمىنىڭ باسشىسى ءسابيت يبادۋللا وبلىس ورتالىعىنداعى بەينەباقىلاۋ كامەرالارىنىڭ جۇمىسى مەن «قاۋىپسىز قالا» جوباسىنىڭ جاي-جاپسارىن ايتقان ەدى. 2029 جىلعا دەيىن جۇزەگە اسۋعا ءتيىس «قاۋىپسىز قالا» جوباسىندا حالىق كوپ ورنالاسقان جەرلەردە 1 400 كامەرا, 19 ينتەللەكتۋالدى قيىلىس پەن 58 جىلدامدىق ولشەگىش, سونداي-اق 20 Sergek Qorgau ورناتىلاتىنى قاراستىرىلعان. بۇل ءموبيلدى قوسىمشا جول-پاترۋلدىك پوليتسيا قىزمەتكەرىنە پلانشەت ارقىلى كولىك جانە جۇرگىزۋشىنىڭ بارلىق دەرەگىنە قول جەتكىزۋگە مۇمكىندىك بەرەدى.
ال جازدا وبلىستا وڭىردەگى تسيفرلاندىرۋ جانە اقپاراتتىق-كوممۋنيكاتسيالىق تەحنولوگيالاردى دامىتۋ ماسەلەلەرىنە ارنالعان جيىن ءوتىپ, وندا قالا اۋماعىنداعى بەينەباقىلاۋ كامەرالارى مەن اۆتوكولىك جىلدامدىعىن ولشەيتىن قۇرالدار ماسەلەسى ءسوز بولعان ەدى. كۇن تارتىبىندە تۇرعان ماسەلەگە وراي جەدەل باسقارۋ ورتالىقتارى جاڭعىرتىلىپ, 7 اۋدان ورتالىعىنا دا بەينەباقىلاۋ كامەرالارىن ورناتۋ جوسپارلانىپ وتىر. جالپى قىزىلوردا «اقىلدى قالا» باعدارلاماسىنىڭ نەگىزگى كومپونەنتتەرىنىڭ باسىم كوپشىلىگى ورىندالعان ءوڭىر رەتىندە باعالانادى.
بەينەكامەرالار پوليتسيا جۇمىسىنىڭ تيىمدىلىگىن ارتتىرىپ, قىلمىستىڭ جەدەل اشىلۋىنا كوپ كومەكتەسەدى. جىل باسىنان بەرى بەينەباقىلاۋ كامەرالارى 41 مىڭنان اسا اكىمشىلىك قۇقىق بۇزۋشىلىقتى انىقتاسا, ونىڭ ىشىندە 34 مىڭنان استامى جول قوزعالىسى ەرەجەلەرىن بۇزۋ دەرەكتەرى بولىپ وتىر. وسى ۋاقىت ارالىعىندا «مۇلدەم توزبەۋشىلىك» قاعيداسىن قالىپتاستىرۋ ماقساتىندا بەينەباقىلاۋشى ينسپەكتورلار 3 مىڭنان اسا ۇساق بۇزاقىلىق, 2 مىڭنان اسا قوعامدىق ورىندارعا ماساڭ كۇيدە كەلۋ, 300 قوعامدىق ورىنداردا ءتيىسۋ, 2 026 باسقا دا قۇقىقبۇزۋشىلىق دەرەگىن انىقتاعان. سونداي-اق ادام كوپ شوعىرلاناتىن ورىندارعا ورناتىلعان «SOS» دابىل باتىرماسى ارقىلى 15 حابارلاما ءتۇسىپتى.
بەينەكامەرالار كومەگىن كورسەتەتىن ءبىر-ەكى مىسال ايتا كەتەيىك. بيىلعى 30 قاڭتاردا قىزىلوردا قالاسىنىڭ اۋماعىنداعى دۇكەندەردىڭ بىرىندە بولعان تەلەفون ۇرلىعى وسى قۇرىلعى كومەگىمەن ۇزاققا بارماي اشىلدى. ۇرلىق جونىندە شاھار تۇرعىنى قالالىق پوليتسيا باسقارماسىنا ارىزدانىپ, سونىڭ نەگىزىندە ۇيىمداستىرىلعان جەدەل-ىزدەستىرۋ شارالارى كەزىندە كامەرا كومەگىمەن كۇدىككە ىلىنگەن 52 جاستاعى ازاماتشا ۇستالدى. ۇرلانعان تەلەفون ءوز يەسىنە قايتارىلىپ, وبلىس تۇرعىنى پوليتسيا قىزمەتكەرلەرىنە العىس ءبىلدىردى.
ال قىركۇيەكتىڭ 19-ى كۇنى SOS باتىرماسىنا قالا تۇرعىنىنان حابارلاما ءتۇسىپتى. بەلگىسىز بىرەۋلەر ۇيالى تەلەفونىن تارتىپ العانىن ايتقان تۇرعىن ارىزىنا سايكەس دەرەۋ پوليتسيا ناريادتارىنا باعىت-باعدار بەرىلەدى. جەدەل ارەكەت ەتكەن پوليتسەيلەر كوپكە ۇزاتپاي ەكى كۇدىكتىنى قۇرىقتادى. جالپى پوليتسەيلەر SOS تۇيمەسىنەن تاۋلىك بويى جەدەل باسقارۋ ورتالىعىنا تۇسەتىن قوڭىراۋلار كەزەكشى ءبولىم قىزمەتكەرىنە جاعدايدى ءوز بەتىنشە باعالاۋعا مۇمكىندىك بەرەتىنىن ايتادى.
قىزىلوردادا كامەرا ورناتۋ 2017 جىلدان باستاپ قولعا الىندى. جۇيەنى پايدالانۋ, تەحنيكالىق قىزمەت كورسەتۋ جۇمىسىن «كوركەم تەلەكوم» جشس اتقارادى. بۇگىندە جەدەل باسقارۋ ورتالىعىنا قاراستى 272 بەينەباقىلاۋ كامەراسى جۇمىس ىستەسە, ودان بولەك 20 «اركان» ستاتسيونارلىق جىلدامدىق ولشەگىشى, 5 ينتەللەكتۋالدى قيىلىس ورناتىلعان.
كوپشىلىك اراسىندا «بەينەباقىلاۋ كامەراسىن كوبەيتۋ ايىپپۇل سالىپ, قارجى جيناۋدىڭ امالى» دەگەن دە پىكىردى دە ەستىپ قالامىز. بىراق جۇرتتىڭ كوشە كامەرالارىنىڭ قوعامدىق قاۋىپسىزدىكتى قامتاماسىز ەتىپ, ءتارتىپتى ساقتاۋ باعىتىنداعى جۇمىستاردى جەدەل ۇيىمداستىرۋعا كومەگى كوپ بولىپ وتىرعانىنا كوزى جەتتى.
قىزىلوردا