اقش استاناسى ۆاشيڭتونداعى امەريكا سىرتقى ساياساتى كەڭەسىنىڭ عيماراتىندا امەريكالىق شىعىستانۋشى فرەدەريك ستارردىڭ ء«وز زامانىنىڭ گەنيلەرى. يبن سينا, بيرۋني جانە ۇمىتىلعان ۇلىلىق» اتتى ەڭبەگىنىڭ قازاق ءتىلدى نۇسقاسى تانىستىرىلدى. اتالعان كىتاپ حالىقارالىق «قازاق ءتىلى» قوعامىنىڭ باستاسىمەن اۋدارىلىپ باسىلدى. تانىستىرىلىم قازاقستاننىڭ اقش-تاعى ەلشىلىگىنىڭ قولداۋىمەن ءوتتى, دەپ حابارلايدى Egemen.kz.
ء«وز زامانىنىڭ گەنيلەرى. يبن سينا, بيرۋني جانە ۇمىتىلعان ۇلىلىق» («The Genius of Their Age: Ibn Sina, Biruni, and the Lost Enlightenment») – شىعىس اعارتۋشىلىعىنىڭ كورنەكتى وكىلدەرى – يبن سينا جانە ءبيرۋنيدىڭ ءتۇرلى عىلىم سالاسىنا قوسقان ولشەۋسىز ۇلەسى مەن عيبراتتى عۇمىرلارى باياندالعان ەڭبەك. بۇعان دەيىن «قازاق ءتىلى» قوعامى وقىرمانعا اۆتوردىڭ «ۇمىتىلعان ۇلىلىق: ورتالىق ازيانىڭ اراب شاپقىنشىلىعىنان ءامىر تەمىرگە دەيىنگى التىن عاسىرى» اتتى ءبىرىنشى كىتابىن قازاق تىلىندە ۇسىندى. بۇل كىتاپتار ورتا ازيا ەلدەرىنىڭ ورتاق زياتكەرلىك مۇراسى مەن تاريحىنا ارنالعان.
ورتالىق ازيا ءوڭىرى ءۇشىن اسا ماڭىزدى تۋىندىنى قازاق تىلىنە اۋدارۋعا مەملەكەت باسشىسى قاسىم-جومارت توقاەۆتىڭ «ورتالىق ازيا رەنەسسانسى: ورنىقتى دامۋ جانە وركەندەۋ جولى» اتتى ماقالاسى تۇرتكى بولدى. پرەزيدەنتتىڭ ورتالىق ازيا ەلدەرىنىڭ ورتاق ماقساتتارى مەن بولاشاعى تۋرالى يدەياسىن دامىتا تۇسەتىن شىعىستىڭ قوس عۇلاماسىنىڭ الەم عىلىمى مەن ادامزات اقىل-ويىنىڭ دامۋىنا قوسقان ۇلەسى باياندالعان قۇندى ەڭبەك قازاق تىلىنە اۋدارىلىپ, وقىرمانعا ۇسىنىلىپ وتىر.
جيىنعا كىتاپ اۆتورى, امەريكالىق شىعىستانۋشى فرەدەريك ستارر, Freedom Holding Corp. ديرەكتورلار كەڭەسىنىڭ مۇشەسى قايرات كەلىمبەتوۆ جانە حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى قاتىستى.
«ورتالىق ازيانىڭ ادامزات عىلىمى مەن بىلىمىنە قوسقان زور ۇلەسىن تاماشا مىسالدارمەن, ناقتى دايەك-دالەلدەر ارقىلى باياندايتىن مۇنداي ەڭبەكتى قازاق تىلىنە اۋدارۋدىڭ, مەنىڭشە ماڭىزى زور. ءوز ەلىمىزدەگى قاۋىم دا, الەمدەگى وقىرماندار دا ورتا ازيانى ۇلكەن ءبىلىم مەن عىلىم وشاعىنا اينالدىرعان ەنتسيكلوپەديست-عالىمدارىنىڭ ءومىرى جانە جاساعان قىزمەتى تۋرالى ءبىلۋى كەرەك. سونداي-اق, ورتا ازيانىڭ وسىنداي 500 جىلدىق «التىن عاسىرىنا» العىشارت بولعان نە جانە ونىڭ توقىراۋىنا الىپ كەلگەن نە دەگەن سۇراقتارعا جاۋاپ ىزدەۋىمىز قاجەت», دەدى حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى.
ايتا كەتەيىك, ء«وز زامانىنىڭ گەنيلەرى. يبن سينا, بيرۋني جانە ۇمىتىلعان ۇلىلىق» تۋىندىسىن قازاقستاننىڭ اشىق كىتاپحاناسى – Kitap.kz پورتالىنان تەگىن وقۋعا بولادى.