رەسپۋبليكا كۇنى قارساڭىندا ءماجىلىس سپيكەرى ەرلان قوشانوۆ پرەزيدەنتتىڭ اتىنان دەپۋتاتتار مەن اپپارات قىزمەتكەرلەرىنە مەملەكەتتىك ناگرادالاردى تابىس ەتتى, دەپ حابارلايدى Egemen.kz.
پالاتا توراعاسى جينالعانداردى ايتۋلى مەرەكەمەن قۇتتىقتاپ, رەسپۋبليكا كۇنىنىڭ ءمان-ماڭىزىنا ەرەكشە نازار اۋداردى.
«تاۋەلسىزدىكتىڭ سيمۆولى بولىپ قانا قويماي, پرەزيدەنتىمىز قاسىم-جومارت توقاەۆتىڭ باستاماسىمەن وسى مەرەيلى داتا قايتا تۇلەپ, مەملەكەت دامۋىنداعى جاڭا ءداۋىردىڭ باستاۋىنا اينالدى. رەسپۋبليكا كۇنى ەل كۇنتىزبەسىنەن ويىپ تۇرىپ ورىن الدى دەۋگە بولادى. بۇل – مەملەكەتىمىزدە جۇرگىزىلىپ جاتقان ساياسي رەفورمالاردىڭ ناقتى ناتيجەسى. ءبىزدىڭ ەندىگى ماقساتىمىز – باستى قۇندىلىعىمىز – تاۋەلسىزدىگىمىزدى كوزدىڭ قاراشىعىنداي قورعاۋ, ونى نىعايتۋ. مەملەكەت باسشىسى قانداي باستامانى قولعا السا دا, وسى بۇلجىماس قاعيدادان اينىعان ەمەس», دەدى ەرلان قوشانوۆ.
ءماجىلىس سپيكەرى قازىرگى زاڭ شىعارۋ قىزمەتىنە توقتالىپ, دەپۋتاتتار پرەزيدەنت رەفورمالارىن ىسكە اسىرۋدا ۇلكەن جۇمىس اتقارىپ وتىرعانىن اتاپ ءوتتى.
ء«بىز ءاردايىم «حالىق ۇنىنە قۇلاق اساتىن مەملەكەت» تۇجىرىمداماسىن باسشىلىققا الامىز. حالىقتىڭ ءۇنىن ەستىپ قانا قويماي, ازاماتتاردى تولعاندىراتىن پروبلەمالاردى بىلەمىز. زاڭ شىعارۋ ارقىلى ولاردىڭ شەشىلۋىنە اتسالىسامىز. سوندىقتان مەملەكەت باسشىسى ءماسليحات دەپۋتاتتارىنىڭ فورۋمىندا «ۇنەمى سىندارلى پىكىرتالاس ءوتىپ, ناقتى شەشىمدەر ازىرلەنەتىن ماجىلىستەن ۇلگى الۋ كەرەك» دەگەن بولاتىن. بۇل – پرەزيدەنتتىڭ ءبىزدىڭ قىزمەتىمىزگە بەرگەن جوعارى باعاسى. الداعى ۋاقىتتا دا وسى قارقىندى باسەڭدەتپەۋىمىز كەرەك», دەدى پالاتا توراعاسى.
مەرەكە قارساڭىندا بىرقاتار دەپۋتات پەن ءماجىلىس اپپاراتىنىڭ قىزمەتكەرلەرىنە مەملەكەتتىك ناگرادالار بەرىلدى.
مەملەكەت باسشىسىنىڭ جارلىعىمەن I دارەجەلى «بارىس» وردەنى V شاقىرىلىمداعى پارلامەنت ءماجىلىسىنىڭ توراعاسى قابيبوللا جاقىپوۆقا تابىستالسا, «پاراسات» وردەنىمەن ءماجىلىس دەپۋتاتتارى بولاتبەك ناجمەتدين ۇلى, مارات باشيموۆ, بەرىك بەيسەنعاليەۆ جانە قۇدايبەرگەن بەكسۇلتانوۆ ماراپاتتالدى.
ال «قۇرمەت» وردەنى ءماجىلىس دەپۋتاتتارى جيگۋلي دايراباەۆقا, ەركىن ابىلگە, اسحات راحىمجانوۆقا, ەكاتەرينا سمىشلياەۆاعا, اينا مىسىرالىموۆاعا جانە ءماجىلىس اپپاراتى باسشىسىنىڭ ورىنباسارى ينديرا ماماشەۆا مەن ءماجىلىس اپپاراتىنىڭ ءبولىم مەڭگەرۋشىسى پاتيما قياسباەۆاعا بەرىلدى.
«ەرەن ەڭبەگى ءۇشىن» مەدالى ءماجىلىس دەپۋتاتتارى كەنجەعۇل سەيتجانعا, نۇرگۇل تاۋعا, دانيار قاسقاراۋوۆقا جانە ءماجىلىس اپپاراتىنىڭ ءبولىم مەڭگەرۋشىسى جاننا تۇرىمباەۆا مەن ءبولىم مەڭگەرۋشىسىنىڭ ورىنباسارى ساۋلە باپاقوۆاعا تابىس ەتىلدى.
سونىمەن قاتار ەرلان قوشانوۆ تمد-عا مۇشە مەملەكەتتەر پارلامەنتارالىق اسسامبلەياسىنىڭ مەدالىمەن ءماجىلىس اپپاراتى باسشىسىنىڭ ورىنباسارى جاسۇلان جۇگىنىسوۆتى, تمد-عا مۇشە مەملەكەتتەر پارلامەنتارالىق اسسامبلەياسىنىڭ قۇرمەت گراموتاسىمەن ءماجىلىس دەپۋتاتتارى ماگەررام ماگەرراموۆ پەن يۋليا كۋچينسكايانى ماراپاتتاسا, تمد-عا مۇشە مەملەكەتتەر پارلامەنتارالىق اسسامبلەياسىنىڭ قۇرمەت بەلگىسىن ءماجىلىس دەپۋتاتى ەلنۇر بەيسەنباەۆقا جانە ۇقشۇ پارلامەنتتىك اسسامبلەياسىنىڭ قۇرمەت گراموتاسىن ءماجىلىستىڭ ءباسپاسوز قىزمەتىنىڭ مەڭگەرۋشىسى مۇحتار يبرايموۆقا تابىستادى.
سونىمەن قاتار سالتاناتتى جيىندا ءماجىلىس توراعاسىنىڭ العىس حاتتارى بەرىلدى.