مەملەكەت باسشىسىنىڭ تاپسىرماسى بويىنشا قازاقستان پرەمەر-ءمينيسترى ولجاس بەكتەنوۆ شىعىس قازاقستان وبلىسىنداعى بۇقتىرما سۋ قويماسى ارقىلى وتەتىن ەلىمىزدەگى ەڭ ۇزىن كوپىردىڭ اشىلۋىنا قاتىستى. جوبا كولىك قاتىناسىنا قاتىستى كوپ جىلعى ماسەلەنى شەشۋگە باعىتتالعان, كوپىر التى اۋداندى – كۇرشىم, ۇلكەن نارىن, مارقاكول, كاتونقاراعاي, تارباعاتاي جانە زايسان اۋداندارىن بايلانىستىرادى, دەپ حابارلايدى Egemen.kz.
كولىك ءمينيسترى مارات قاراباەۆ پرەمەر-مينيسترگە ۇزىندىعى 1316 مەتر ەكى جولاقتى اۆتوموبيل كوپىرىنىڭ قۇرىلىسى اياقتالعانى تۋرالى باياندادى. كوپىر تاۋلىگىنە 80 مىڭعا دەيىن كولىك وتكىزە الادى, وتكەلگە 18 شاقىرىم جاڭا جول تارتىلدى. جوبا وزىق ينجەنەرلىك تەحنولوگيالاردى قولدانا وتىرىپ جانە بارلىق ساپا ستاندارتتارىنا سايكەس جۇزەگە اسىرىلدى.
وبلىس تۇرعىندارىمەن كەزدەسۋدە پرەمەر-مينيستر جوبانى ىسكە اسىرۋ كولىك قۇرالدارىنىڭ جىل بويى قاۋىپسىز قوزعالىسىن قامتاماسىز ەتەتىنىن, شىعىس قازاقستاننىڭ الەۋمەتتىك-ەكونوميكالىق دامۋىنا سەرپىن بەرەتىنىن جانە ەلىمىزدىڭ كولىك-لوگيستيكا سالاسىنىڭ دامۋىنا وڭ اسەر ەتەتىنىن اتاپ كورسەتتى.
«جاڭا كوپىر مەملەكەت باسشىسىنىڭ تاپسىرماسى بويىنشا تۇرعىنداردىڭ جايلىلىعى مەن قاۋىپسىزدىگىن ارتتىرۋ ماقساتىندا سالىندى. ايماقتا تۇرعىندار 50 جىل بويى جازدا نە پاروممەن, قىستا تىكەلەي نە مۇز ۇستىمەن جۇرگەنىن بىلەسىزدەر. قۇرىلىستىڭ سالىنۋىن جەرگىلىكتى تۇرعىندار ۇزاق كۇتتى», دەپ اتاپ ءوتتى ولجاس بەكتەنوۆ.
شىعىس قازاقستان — ماڭىزدى كولىك دالىزدەرى وتەتىن ستراتەگيالىق ايماق. بۇقتىرما سۋ قويماسى ارقىلى وتەتىن كوپىر لوگيستيكالىق باعىتتاردى جاقسارتىپ, شەكارالاس ەلدەرمەن ۇزدىكسىز بايلانىستى قامتاماسىز ەتەدى.
ءوز كەزەگىندە, كوپىردىڭ اشىلۋىنا كەلگەن ايماق تۇرعىندارى كوپىر سۋ قويماسىنىڭ ەكى جاعىنداعى ەلدى مەكەندەر اراسىنداعى كولىك قاتىناسىن ەداۋىر جاقسارتاتىنىن, بۇل تۇرعىنداردىڭ جەڭىل قاتىناۋىن قامتاماسىز ەتەتىنىن, تاۋارلار قوزعالىسىن جەدەلدەتەتىنىن, قىزمەتتەرگە قولجەتىمدىلىكتى ارتتىرىپ, سونداي-اق وبلىستىڭ تۋريستىك الەۋەتىن اشۋعا مۇمكىندىك بەرەتىنى تۋرالى پىكىر ءبىلدىردى.
«2019 جىلى وسى ءوڭىردىڭ حالقى ەلىمىزدىڭ پرەزيدەنتىنە ارىز-تىلەگىن جازعان. قاسىم-جومارت كەمەل ۇلى توقاەۆ حالىقتىڭ تىلەگىنە كوڭىل ءبولىپ, ەلدىڭ 60 جىل ارمانداعان كوپىرىن سالۋعا قازىنادان قاراجات ءبولدى. جوبادا ەڭبەك ەتكەن تەك ەلىمىزدىڭ ازاماتتارى. شەتەلدەن تارتىلعان بىردە-ءبىر مامان جوق. قانشاما كىسىگە جۇمىس تابىلدى. قۇرىلىس قىستىڭ ايازىندا, جازدىڭ اپتاپ ىستىعىندا دا جۇرگىزىلدى», دەدى كۇرشىم اۋدانىنىڭ قۇرمەتتى ازاماتى باقىتحان ولمەسەكوۆ.
«كوپىردىڭ اشىلۋى ەرەكشە وقيعا بولدى. بۇل – ماڭىزدى ينفراقۇرىلىمدىق جوبا, ارينە, بۇكىل ەلىمىزدىڭ تۇرعىندارى ءۇشىن تاريحي نىسان. ول پرەزيدەنتتىڭ باستاماسىنىڭ ارقاسىندا جۇزەگە استى. بىرنەشە ساعات بويى ءجۇرىپ وتەتىن قاشىقتىقتى ەندى بىرنەشە مينۋتتا وتتىك. قىسقى مەزگىلدە بۇل جەردەن ءوتۋ وتە قيىن ەدى», دەپ اتاپ ءوتتى التاي اۋداندىق ءماسليحاتىنىڭ توراعاسى لاريسا گرەچۋشنيكوۆا.
پرەمەر-مينيستر ءىرى جوبالاردى جۇزەگە اسىرۋ بارىسىندا وتاندىق ماماندار مەن مەردىگەر كومپانيالاردى تارتۋعا ەرەكشە نازار اۋدارىلاتىنىنا توقتالدى.
«مەملەكەت باسشىسى اتالعان جوباعا, جالپى وڭىرلەردىڭ دامۋىناپ ۇلكەن كوڭىل ءبولىپ كەلەدى. ءسىز دۇرىس ايتتىڭىز, ءارى جۇمىس بەرىپ ءارى ينفراقۇرىلىمدىق بايلانىس پەن دامۋدى قامتاماسىز ەتەتىن مەگاجوبالار كوپ بولۋى كەرەك. سىرتتان ەشكىمدى تارتپاي-اق, ءبىزدىڭ ءوز قۇزىرەتىمىز دە جەتكىلىكتى. وسىنداي رەسپۋبليكالىق ماڭىزى بار ءىرى جوبالاردى جۇزەگە اسىرۋدى جالعاستىرامىز. قازىر پرەزيدەنتتىڭ تاپسىرماسى بويىنشا ۇكىمەت وتاندىق كاسىپكەردى, وتاندىق وندىرۋشىلەردى قولداۋ ساياساتىن جۇرگىزىپ وتىر», دەپ اتاپ ءوتتى ولجاس بەكتەنوۆ.