قوستانايداعى و.قوزىباەۆ پەن يۋ.جۋراۆلەۆا كوشەلەرىنىڭ تۇيىسكەن تۇسىنداعى اشىق الاڭقاي وبلىستىق توتەنشە جاعداي دەپارتامەنتىنىڭ قاراۋىنا بەكىتىلگەن ەدى. وسى الاڭقايدى جازداي قۇتقارۋشىلاردىڭ وزدەرى كوگالداندىرىپ, ءاپ-ادەمى دەمالىس ورنى ەتىپ جاساپ قويدى. اتالعان اللەيا قۇتقارۋشىلار كۇنى قارساڭىندا اشىلىپ, توتەننەن تۋىنداعان قاۋىپتى ساتتەردە باسىن قاتەرگە تىككەندەردى ەسكە العان جيىن ءوتتى.
سالتاناتتى ءىس-شاراعا تجد قىزمەتكەرلەرى مەن ارداگەرلەر, اللەيا ماڭايىنداعى تۇرعىندار قاتىستى. دەپارتامەنت باسشىسى ءدامىر ەرماعانبەتوۆ كوپشىلىككە قۇتتىقتاۋ ءسوز ارناپ, بۇل جەردىڭ جاي دەمالىس ورنى عانا ەمەس, سونىمەن قاتار قوعام قاۋىپسىزدىگى جولىندا قىزمەت ەتكەن قۇتقارۋشىلاردىڭ ەرلىگىنە قويىلعان ەسكەرتكىش ەكەنىن اتاپ ءوتتى.
«قۇتقارۋشىلار اللەياسى» – قۇتقارۋشىلاردىڭ سىن ساعاتتاردا كورسەتكەن ەرلىگى مەن جانكەشتى ەڭبەگىنىڭ رامىزدىك نىشانى. ولاردىڭ ەڭبەگى قوعامدا اسا ماڭىزدى. قۇتقارۋشىلار كۇندەلىكتى قىزمەت بارىسىندا كۇتپەگەن جەردەن تۇتانعان ورتپەن ارپالىسىپ, ادام ومىرىنە اراشا تۇسەدى, تابيعي اپاتتاردىڭ زارداپتارىن جويۋمەن, ەۆاكۋاتسيالاۋمەن اينالىسادى, العاشقى كومەك كورسەتەدى», دەدى تجد باسشىسى.
اللەيا اۋماعىندا قۇتقارۋشىلارعا ارنالعان ەسكەرتكىش اركا, ءورت ءسوندىرۋ كولىگىنىڭ شاعىن ماكەتى قويىلعان.
قوستاناي وبلىسى