قىرعىزستان تاۋلارىندا التى ادام ءىز-ءتۇسسىز جوعالىپ كەتتى

قىرعىزستان رەسپۋبليكاسى توتەنشە جاعدايلار مينيسترلىگىنىڭ مالىمەتىنشە, 9 قازاندا قانىش-قيا اۋىلىنان 14 ادام ارنەبيا وسىمدىكتەرىن جيناۋعا تاۋعا شىعىپ, ءىز-ءتۇزسىز جوعالعان. 16 قازاندا جەدەل-ىزدەستىرۋ شارالارىنىڭ ناتيجەسىندە 8 ادام ءتىرى تابىلعان. قالعان 6 ادامدى ىزدەۋ جۇمىستارى ءالى دە جالعاسىپ جاتىر. ولاردى قار كوشكىنى باسىپ قالعان دەگەن بولجام بار.

ۆەدومستۆونىڭ ءمينيسترى بووبەك اجىكەەۆ  زارداپ شەككەندەردى ىزدەۋ جۇمىستارى ءۇشىن تىكۇشاق دايىندالىپ جاتقانىن ايتتى.

«اۋا رايى قولايلى بولعان كەزدە, تىكۇشاق دەرەۋ ىزدەۋ ورنىنا اتتانادى. زارداپ شەككەندەردىڭ ناقتى مەكەن-جايى انىقتالعاننان كەيىن وقيعا ورنىنا توتەنشە جاعدايلار مينيسترلىگىنىڭ 15-20 قۇتقارۋشى توبى اتتانادى. ول 2-3 كۇنگە سوزىلادى. توپ بارلىق قاجەتتى قۇرالدارمەن, سونىڭ ىشىندە ۇزدىكسىز بايلانىس پەن اقپاراتتى حابارلاۋ ءۇشىن سپۋتنيكتىك بايلانىسپەن جابدىقتالادى. سودان كەيىن ەۆاكۋاتسيالاۋ ءۇشىن 6 اتپەن جابدىقتالعان ەكىنشى قۇتقارۋ توبى جولعا شىعادى. جاعداي مەنىڭ باقىلاۋىمدا», دەدى باسقارما باسشىسى.

تابىلعان ادامداردىڭ مالىمەتىنشە, 14 قازان كۇنى ساعات 18:00 شاماسىندا اق-ساي اسۋىندا قار كوشكىنى ءجۇرىپ, ونىڭ استىندا  التى ازامات قالعان.