پرەمەر-مينيستر ولجاس بەكتەنوۆ ۇكىمەت وتىرىسىندا ساران قالاسىنداعى جاعدايعا قاتىستى پىكىر ءبىلدىردى, دەپ حابارلايدى Egemen.kz.
ۇكىمەت وتىرىسىندا ساران قالاسىنداعى جىلۋ بەرۋ ماۋسىمىنىڭ باستالۋى تۋرالى ماسەلە كۇن تارتىبىنەن تىس قارالعان. قاراعاندى وبلىسىنىڭ اكىمى ەرماعانبەت بولەكپاەۆ اعىمداعى جاعداي مەن اتقارىلىپ جاتقان جۇمىستار تۋرالى ايتتى.
«قازىر قازاندىق ىسكە قوسىلدى. 13 قازاندا اۆتوماتيكانىڭ اقاۋلىعىنا بايلانىستى قازاندىقتىڭ جۇمىسى توقتاتىلدى. رەزەرۆتىك قازاندىقتى قوسۋ تۋرالى شەشىم قابىلداندى. بۇگىنگى تاڭدا جۇمىس جۇرگىزىلىپ جاتىر, ماسەلە مەنىڭ جەكە باقىلاۋىمدا», دەدى بولەكپاەۆ.
ۇكىمەت باسشىسى اكىمگە قالعان بارلىق جۇمىستاردى بۇگىن اياقتاۋدى تاپسىرعان.
«بۇگىن ءبارىن اياقتاۋ قاجەت. ءبىرىنشى كەزەكتە, بۇل – ساران قالاسى اكىمىنىڭ جەكە جاۋاپكەرشىلىگى جانە وبلىس اكىمدىگى تاراپىنان ءتيىستى باقىلاۋدىڭ جوقتىعى. مەنىڭ تاپسىرمام بويىنشا قازىر تەكسەرىس ءجۇرىپ جاتىر. جىلۋ بەرەتىن نىساننىڭ دايىندىعى تۋرالى جالعان اقپارات بەرگەن ادامدارداردىڭ بارلىعى جاۋاپكەرشىلىككە تارتىلادى», دەدى ولجاس بەكتەنوۆ.
پرەمەر-مينيستر ۇكىمەت وتىرىسىنان كەيىن ەنەرگەتيكا ءمينيسترىنىڭ ساران قالاسىنا باراتىنىن ءمالىم ەتتى.
«وسى وتىرىستان كەيىن ەنەرگەتيكا ءمينيسترى ساران قالاسىنا بارىپ, ءوزى ءبارىن تەكسەرەدى. تەكسەرۋ ناتيجەسى بويىنشا ماتەريالداردى قۇقىق قورعاۋ ورگاندارىنا جىبەرەمىز. ەگەر قىلمىستىڭ قۇرامى بار بولاتىن بولسا, كىنالى ادامداردىڭ ءبارى قىلمىستىق جاۋاپكەرشىلىككە تارتىلادى», دەدى ۇكىمەت باسشىسى.
ەسكە سالايىق, 13 قازاندا ساران قالاسىندا جۇرت جىلۋسىز وتىرعانى تۋرالى اقپارات تارادى. جەرگىلىكتى تۇرعىندار ۇيلەرىندە سالقىن ەكەنىن ايتىپ شاعىمداندى. اكىم ەركىن باۋلىقوۆ قالادا جىلۋ جوق ەكەنىن راستاپ, جىلۋ جۇيەسى جاڭارتىلعانىن, ورتالىق جۇيەلەر ارقىلى جىلۋ بەرىلىپ جاتقانىن العا تارتقان.