جۋىردا سولتۇستىك قازاقستان وبلىسى اكىمدىگىندە اگروونەركاسىپ كەشەنىن دامىتۋعا ارنالعان كەڭەيتىلگەن كەڭەس ءوتىپ, ونىڭ جۇمىسىنا اۋىل شارۋاشىلىعى ءمينيسترى ايداربەك ساپاروۆ پەن وبلىس اكىمى عاۋەز نۇرمۇحامبەتوۆ قاتىستى. جيىندا وراق ناۋقانىنىڭ اياقتالۋى, استىقتى ساتىپ الۋ باعاسى مەن ديقاندارعا مەملەكەتتىك قولداۋ كورسەتۋ, كوكتەمگى ەگىس ماسەلەلەرى تالقىلاندى.
بيىل جاۋىن-شاشىن مول بولىپ, كۇردەلى اۋا رايى شارۋالارعا ناعىز سىناق بولدى. جاڭبىر ەگىننىڭ ۋاقتىلى پىسۋىنە كەدەرگى كەلتىردى. ءارامشوپ تە قاۋلاپ كەتىپ, ەسىل استىق ءراسۋا بولا جازدادى. قولى جەتكەن شارۋالار ارامشوپكە قارسى امالدار جاساعانىمەن نەگىزگى ديقانداردىڭ استىعىنا ءارامشوپ مولىنان ارالاسىپ, استىق ساپاسىن ءتۇسىرىپ جىبەردى. قىركۇيەكتىڭ ورتاسىنان بىلاي عانا كۇن اشىلدى. وعان دەيىن كۇندە جاۋعان قارا جاڭبىر استىق القاپتارىن كومباين كىرە المايتىنداي قىلىپ, ەزىپ جىبەرگەن. دەگەنمەن ەگىستىڭ ۋاقتىلى جينالۋى مەن استىق ساپاسىن ساقتاۋ ماقساتىندا ديقاندار ەرەكشە تاسىلدەر مەن زاماناۋي تەحنولوگيالاردى پايدالاندى. مەملەكەت استىقتى كەپتىرۋ ماقساتىندا ارزانداتىلعان ديزەل وتىنى مەن سۇيىتىلعان گاز ءبولدى. قازىر بيدايدىڭ 40%-دان ارتىعى 3-سىنىپتى, 46%-ى 4-سىنىپتى بولىپ ءوتىپ جاتىر.
بۇگىندە ەگىس القابىنىڭ 96%-ى ورىلىپ, 6 ملن تونناعا جۋىق استىق باستىرىلعان. ورتاشا ونىمدىلىك گەكتارىنا 18 تسەنتنەردەن اينالعان. وزىق شارۋاشىلىقتاردىڭ گەكتار بەرەكەسى 30 تسەنتنەرگە جەتتى. بۇل – اگروتەحنولوگيالاردى ساقتاۋ, مينەرالدى تىڭايتقىشتاردى ۋاقتىلى سەبۋ, جوعارى ساپالى تۇقىم ەگۋ جانە جەتىلگەن تەحنيكالاردى قولدانۋدىڭ ارقاسىندا قول جەتكىزىلگەن تابىس.
وتىرىسقا سەرىكتەستىك باسشىلارى, سەلەكتورلىق رەجىمدە اۋدان اكىمدەرى مەن وزات ديقاندار قاتىستى. اۋىل شارۋاشىلىعى مينيسترلىگى دەپارتامەنتىنىڭ ديرەكتورى جانار ماحانوۆانىڭ ايتۋىنشا, «كەڭ-دالا-2» مەملەكەتتىك باعدارلاماسىنا قاتىسۋشىلار جەتىستىكتەرگە قول جەتكىزدى. ەندى «كەڭ دالا-2» باعدارلاماسى قولعا الىنادى. ونىڭ اياسىندا شارۋالار كوكتەمگى دالا جۇمىستارىن جۇرگىزۋگە جىلدىق 5%-دىق وسىممەن جەڭىلدەتىلگەن نەسيە الماق. تاعى ءبىر ارتىقشىلىعى – فەرمەر كەپىلدىك سوماسىنىڭ 15%-ىن عانا قامتاماسىز ەتەدى, قالعان 85%-ىنا «دامۋ» قورى كەپىلدىك بەرەدى.
2024 جىلى وسى باعدارلاما اياسىندا 140 ملرد تەڭگە جەڭىلدەتىلگەن نەسيە بەرىلگەن. قايتارىلۋ مەرزىمى 2025 جىلدىڭ 1 ناۋرىزىنا دەيىن سوزىلعان. قارجىلاندىرۋ نەسيەلىك سەرىكتەستىك, ميكروقارجى ۇيىمى, ەكىنشى دەڭگەيلى بانك, ايماقتىق ينۆەستيتسيالىق ورتالىقتار ارقىلى جۇرگىزىلەدى. قارجى ينستيتۋتتارىنىڭ ءوسىمى 3,5%-دان اسپايدى.
سولتۇستىك قازاقستان وبلىسى