مەملەكەت باسشىسى ۇيىتقى بولعان «تازا قازاقستان» رەسپۋبليكالىق ەكولوگيالىق باعدارلاماسى اياسىندا سولتۇستىك قازاقستان وبلىسىندا ەلدى مەكەندەردىڭ, ورمانداردىڭ, ساياباقتار مەن سكۆەرلەردىڭ اۋماعىن تازارتۋ جۇمىسى جۇيەلى جۇرگىزىلىپ كەلەدى.
«ابىلاي حان رەزيدەنتسياسى» مۇراجاي كەشەنىنىڭ اۋماعىندا «تازا قازاقستانمەن بىرگەمىز» جاستار ەكولوگيالىق اكتسياسى وتكىزىلدى. ءىس-شارانى وبلىستىق جاستار رەسۋرستىق ورتالىعىنىڭ وكىلدەرى ۇيىمداستىردى. اكتسياعا كوللەدج ستۋدەنتتەرى, ەرىكتىلەر, جۇمىسشى جاستار قاتىستى.
«تابيعاتتى قورعاۋ وتە ماڭىزدى, ويتكەنى ول – ورتاق بايلىعىمىز. ارقايسىمىز قورشاعان ورتانى قورعاۋعا ۇلەسىمىزدى قوسۋىمىز كەرەك. ءوز باسىم قالامىزدا ءوتىپ جاتقان بارلىق ەكولوگيالىق اكتسياعا ۇزبەي قاتىسۋعا تىرىسامىن. ەلىمىزدەگى ەكولوگيالىق قوزعالىس دامىپ, ءارى قاراي نىعايا تۇسەتىنىنە كامىل سەنەمىن. تابيعاتتى قورعاۋدىڭ ماڭىزدىلىعىن كوپ جاستار جاقسى ءتۇسىنىپ كەلەدى. وسىنداي اكتسيالاردى بىرگە ۇيىمداستىرىپ, ەكولوگيالىق ماسەلەلەردى ءجيى كوتەرىپ وتىرساق, ەلىمىزدى تازا ءارى جاسىل ەل ەتە الامىز», دەيدى «جاستار اسسامبلەياسى» بىرلەستىنىڭ سقوف باسشىسى داريعا سمايىلوۆا.
جاستاردىڭ «Birgemiz» ۆولونتەرلىك فرونت-كەڭسەسى تابيعي رەسۋرستار جانە تابيعاتتى پايدالانۋدى رەتتەۋ باسقارماسىمەن بىرلەسىپ, مەششان ورمانىنىڭ اۋماعىندا سپورتتىق-ەكولوگيالىق مارافون وتكىزدى. بۇل ورمانعا ەرتەرەكتە قالالىقتار دەمالىس الىپ, تازا اۋامەن تىنىستاۋ ماقساتىندا كەلىپ تۇرادى ەكەن. ول كەزدە ورمان قالانىڭ ورتالىعىنان 10 شاقىرىمداي جەردە. وعان ۇلت اقىنى ماعجان جۇماباەۆ تا جارىمەن كەلىپ, دوستارىمەن ديدارلاساتىنى جونىندە ونىڭ نەمەرە ءىنىسى عادىلشا قاھارمانوۆ ءوزىنىڭ «جاجەكە» دەگەن كىتابىندا جازعان. قازىر ورمان قالانىڭ اۋماعىنا كىرگەن. ءبىراز جەرى وتالىپ قالعانىمەن, نەگىزگى سۇلباسى ساقتالعان. وسى ورمانداعى «تازا ورمان» اتتى ەكولوگيالىق اكتسياسى اياسىندا قوقىس جيناۋ جارىسىنا جۇمىسشىلار, ستۋدەنتتەر, سونداي-اق ەرىكتىلەر بار, بارلىعى 80-دەي ادام قاتىستى. مارافون تازالىق مادەنيەتىن قالىپتاستىرۋ, قورشاعان ورتاعا ۇقىپتى قاراۋ دەڭگەيىن ارتتىرۋ ماقساتىندا ۇيىمداستىرىلدى. اكتسيا 40 مينۋتتىق قوقىس جيناۋ مارافونى تۇرىندە ءوتتى. جەڭىمپازدار ديپلومدار مەن سىيلىقتارعا يە بولدى.
اكتسيا باستالعاننان بەرى اۋماقتاردى تازارتۋعا 152,2 مىڭعا جۋىق جاستار جۇمىلدىرىلعان. ەسىل وزەنى جاعالاۋى كۇل-قوقىستان تازارتىلدى. بارلىعى 211 سكۆەر مەن ساياباق اباتتاندىرىلىپ, 150,6 مىڭ توننا قوقىس شىعارىلدى, 32,5 مىڭنان استام اعاش, 3,2 مىڭنان استام كوشەت وتىرعىزىلدى.
سولتۇستىك قازاقستان وبلىسى