ەندى تولەمدى تەك ەلەكتروندى جولمەن – كولىك كارتاسى, QR كود, سمس, بانك كارتالارى, ارنايى قوسىمشادان NFC جانە Apple pay, Google pay, Samsung pay ارقىلى عانا جاساۋعا بولادى. بۇل تۋرالى قالا اكىمدىگى حابارلادى, دەپ جازادى Egemen.kz.
- بۇعان دەيىن قوعامدىق كولىكتە قولما-قول تولەم ءتۇرىن جۇرگىزۋشىنىڭ ءوزى جۇرگىزەتىندىكتەن, كولىك قۇرالىن باسقارۋدان الشاقتاۋعا ءماجبۇر بولاتىن. بۇل جولاۋشىلاردىڭ, جول قوزعالىسىنىڭ باسقا دا قاتىسۋشىلارىنىڭ ءومىرى مەن دەنساۋلىعىنا قاۋىپ توندىرەدى. وعان قوسا, قوعامدىق كولىك جۇرگىزۋشىسى مەن جولاۋشىلار اراسىندا ءجيى تۇسىنىسپەۋشىلىكتەر ورىن الاتىن. جىل باسىنان بەرى قوعامدىق كولىك بويىنشا تۇسكەن 6 مىڭ ارىز-شاعىمنىڭ 3 مىڭنان استامى جۇرگىزۋشىلەرگە قاتىستى. ونىڭ ىشىندە, جولاۋشىلاردى قولما- قول اقشامەن تولەۋگە ماجبۇرلەۋ, قاساقانا ەسىكتەردى اشپاۋ جايتتارى تىركەلگەن, – دەلىنگەن اكىمدىك مالىمەتىندە.
بۇدان بولەك جۇرگىزىلگەن تالداۋعا سايكەس اۆتوبۋستاردا 97% ترانزاكتسيالار ەلەكتروندىق جۇيەلەرى ارقىلى (كارتا, QR-كود, SMS), ال قالعان 3%-ى عانا قولما-قول اقشامەن تولەنگەنگەنى انىقتالىپتى. بۇل كورسەتكىش تە جولاۋشىلار ءۇشىن ەلەكتروندى جۇيەنىڭ ءتيىمدى ەكەنىن كورسەتىپ وتىر.
ەنگىزىلەتىن وزگەرىستەردىڭ ناتيجەسىندە كولەڭكەلى اقشا اينالىمى, قوعامدىق كولىكتەردىڭ بەكىتىلگەن ۋاقىتىنان كەشىگۋى جانە جول-كولىك وقيعالار كورسەتكىشى ايتارلىقتاي تومەندەيدى دەپ سەندىردى قالا اكىمدىگى.
ايتا كەتسەك, بۇگىنگى تاڭدا مەگاپوليستە 80 تۇراقتى مارشرۋتتا كۇندەلىكتى 947 اۆتوبۋس جولاۋشىلاردى تاسىمالدايدى.