قازاقستاننىڭ بەلگىلى مەملەكەت قايراتكەرى كەنجەبەك ۋكين 84 جاسىندا ومىردەن ءوتتى. قارالى حاباردى الەۋمەتتىك جەلىدە قوستاناي وبلىسىنىڭ اكىمى قۇمار اقساقالوۆ جەتكىزدى, دەپ حابارلايدى Egemen.kz.
- كەنجەبەك ۋكينوۆيچ ۋكيننىڭ ومىردەن وزعانى تۋرالى سۋىت حاباردى زور كۇيزەلىسپەن قابىلدادىق. ول ەلدىڭ دامۋىنا ۇلكەن ۇلەس قوسقان ابىرويلى مەملەكەت جانە قوعام قايراتكەرى بولدى. كەنجەبەك ۋكينوۆيچ ەڭبەك جولىن مۇعالىمدىكتەن باستاپ, وبلىس اكىمشىلىگىنىڭ باسشىسىنا دەيىنگى ۇزاق جولدى ءجۇرىپ ءوتتى. ول اسىرەسە قازاقستاننىڭ تاۋەلسىزدىگىن قالىپتاستىرۋ جىلدارىنداعى قيىن كەزەڭدەردە ەرەن ەڭبەگىمەن تانىلدى مارقۇمنىڭ وتباسى مەن جاقىندارىنىڭ قايعىسىنا ورتاقتاسىپ, كوڭىل ايتامىز. ونىڭ ەڭبەگى مەن پاراساتى بولاشاق ۇرپاققا ءاردايىم ۇلگى بولىپ قالادى, - دەپ جازدى وبلىس اكىمى.