فاريزا وڭعارسىنوۆا – قازاق رۋحانياتىنا مول مۇرا قالدىرعان اقىن. قازاق قىزدارىنىڭ ءسوز ونەرىندەگى لايىقتى ورنىن بيىككە كوتەرگەن سۋرەتكەر. اقىن شىعارماشىلىعىنىڭ دارا بولمىسى مەن ەرەكشەلىگى ماڭگى جاساي بەرەدى.
سونىڭ ءبىر دالەلىندەي, اتىراۋدا «و, تۋعان جەر, كەڭپەيىل, قۇشاعىڭ كەڭ, ساعان كوڭىل بۇلقىنار كۇش-اعىنمەن. ساعىنىشىمدى قانات قىپ ساعان قاراي, بالاپانداي تالپىنىپ ۇشامىن مەن» دەپ التىن بەسىگىن ەرەكشە اڭسارمەن جىرلاعان حالىق جازۋشىسى, مەملەكەتتىك سىيلىقتىڭ لاۋرەاتى فاريزا وڭعارسىنوۆانىڭ شىعارماشىلىعىنا ارنالعان وقۋشىلار بايقاۋى ءوتتى. «فاريزا وقۋلارى» بايقاۋى 2020 جىلدان بەرى تۇراقتى وتكىزىلىپ كەلەدى. ءتورت جىلدا بۇل بايقاۋعا 200-دەن استام جاس ورەن قاتىسىپتى. ال بيىل وبلىستىق ءبىلىم باسقارماسىنىڭ تالانتتاردى انىقتاۋ جانە قولداۋ ورتالىعى ۇيىمداستىرعان سايىستا 8-11 سىنىپتا وقيتىن 50-گە جۋىق وقۋشى باق سىنادى.
اقىن شىعارماشىلىعىن ناسيحاتتاعان بايقاۋعا «كاسپي قۇبىر كونسورتسيۋمى-ق» اق دەمەۋشىلىك تانىتتى. كونسورتسيۋمنىڭ قۇبىر جۇيەسى – تمد اۋماعىنداعى ەنەرگەتيكا سالاسىندا ىسكە اسىرىلىپ جاتقان ءىرى جوبانىڭ ءبىرى. كومپانيا «تەڭىز» كەنىشىنەن وندىرىلگەن مۇنايدى قارا تەڭىز جاعالاۋىنداعى نوۆوروسسيسك ايلاعىنا دەيىن تاسىمالدايتىن قۇبىرعا يەلىك ەتەدى. ەل مەن ەلدىڭ اراسىن جالعاعان قۇبىردىڭ ۇزىندىعى 1 511 شاقىرىمدى قۇرايدى. بۇل باعىتپەن ەلىمىزدىڭ ەكسپورتقا شىعارىلاتىن مۇنايىنىڭ ۇشتەن ەكىسىنەن استامى, سونداي-اق رەسەيلىك, سونىڭ ىشىندە كاسپيدەگى كەن ورىندارىنان الىناتىن كومىرسۋتەكتى شيكىزات تاسىمالدانادى. كونسورتسيۋمنىڭ تەڭىز تەرمينالىنداعى ءۇش ايلاق تانكەرلەرگە جاعادان ايتارلىقتاي الشاقتا مۇناي تيەۋگە مۇمكىندىك بەرەدى.
«كومپانيا مەديتسينا, مادەنيەت جانە ءبىلىم سالاسىن, سونداي-اق اتىراۋ وبلىسىنداعى ينفراقۇرىلىمدى دامىتۋعا باعىتتالعان قايىرىمدىلىق قىزمەتى اياسىندا قولداۋ كورسەتۋىن جالعاستىرىپ كەلەدى. الداعى ۋاقىتتا دا بيزنەستىڭ الەۋمەتتىك جاۋاپكەرشىلىگى اياسىندا قوعامعا ماڭىزدى جوبالارعا قولداۋ كورسەتە بەرەدى. «فاريزا وقۋلارى» وبلىستىق بايقاۋىن اتىراۋ وبلىسىنىڭ مادەني ومىرىندەگى ايتۋلى وقيعا دەپ ەسەپتەيمىن. ويتكەنى قازاقتىڭ ءار پەرزەنتى فاريزا اقىننىڭ پوەزياسىمەن قاناتتانادى. رۋحاني ءنار الىپ, انانى قادىرلەۋدىڭ, تۋعان جەردى قاستەرلەي ءبىلۋدىڭ ۇلاعاتىن ۇعىنادى. سوندىقتان بايقاۋعا قاتىسقان وقۋشىلاردىڭ ەلدىڭ مادەني مۇراسىن ساقتاۋعا, ودان ءارى دامىتۋعا قىزىعۋشىلىعى ارتادى. جاس بۋىن رۋحاني قۇندىلىقتى بويىنا سىڭىرەدى. شىعارماشىلىققا ىنتاسى ارتادى», دەدى كومپانيا باس ديرەكتورىنىڭ ۇكىمەتپەن بايلانىس جونىندەگى ورىنباسارى قايىرگەلدى قابىلدين.
تالانتتاردى انىقتاۋ جانە قولداۋ ورتالىعى ديرەكتورىنىڭ مىندەتىن اتقارۋشى جانار سارسەنعاليەۆانىڭ ايتۋىنشا, بايقاۋدىڭ ماقساتى – وسكەلەڭ ۇرپاقتىڭ شىعارماشىلىق قابىلەتىن دامىتۋ, جاس بۋىندى پاتريوتيزمگە, قازاق ەلىنىڭ مادەني ءداستۇرىن قۇرمەتتەۋگە تاربيەلەۋ. سول سەبەپتەن «فاريزا وقۋلارى» وبلىستىق بايقاۋى ءۇش باعىتتى قامتىدى. بايقاۋدا باق سىناعان وقۋشىلار «جىرىم قالسىن جانىمنىڭ ۇشقىنىنداي» باعىتىندا فاريزا وڭعارسىنوۆانىڭ ولەڭدەرىن مانەرلەپ جاتقا وقىدى. ال «ولەڭ, مەن سەنى ايالاپ وتەم...» كەزەڭىندە اقىننىڭ سوزىنە جازىلعان اندەردى ورىندادى. تالانتتى وقۋشىلاردىڭ ءبىر توبى «فاريزا شىعارمالارىنان يلليۋستراتسيالىق سۋرەتتەر سالۋ» باعىتىمەن اقىننىڭ تۋىندىلارىن ارقاۋ ەتكەن سۋرەتتەرىن ۇسىندى.
«جۇيرىكتەن جۇيرىك وزار جارىسقاندا» دەگەندەي, «فاريزا وقۋلارى» بايقاۋىندا ونەرلى ورەندەر ءبىر-بىرىنەن سۋىرىلىپ العا شىعۋعا ۇمتىلدى. ەشقايسىسىنىڭ قالىس قالعىسى جوق. بايقاۋدىڭ «جىرىم قالسىن جانىمنىڭ ۇشقىنىنداي» باعىتىندا اقىن شىعارمالارىن ناقىشىنا كەلتىرە, ءارى جاتقا وقىعان يندەر اۋدانىنداعى ماحامبەت اتىنداعى ورتا مەكتەپتىڭ 10-سىنىپ وقۋشىسى اقنۇر ماعزوم, ق.ساتباەۆ اتىنداعى مەكتەپتىڭ 11-سىنىبىندا وقيتىن ءسابينا ەركىنعاليەۆا, ج.موداعاليەۆ اتىنداعى مامانداندىرىلعان مەكتەپ-ليتسەي-ينتەرناتىنىڭ 9-سىنىپ وقۋشىسى گۇلناز اياپبەرگەن ءۇشىنشى جۇلدەگە يە بولدى.
ال ەكىنشى ورىن «زياتكەر» مامانداندىرىلعان مەكتەپ-ليتسەي-ينتەرناتىنىڭ 9-سىنىپ وقۋشىسى نۇرسەزىم ادىلقاسقا, ح.دوسمۇحامەوۆ اتىنداعى اتىراۋ ۋنيۆەرسيتەتىنىڭ جانىنان دارىندى بالالارعا ارنالىپ اشىلعان «ۇستاز» مەكتەپ-ينتەرناتىنىڭ 10-سىنىپ وقۋشىسى مانسۇر مۇراتبايعا بەرىلدى. ءبىرىنشى جۇلدەگە جىلىوي اۋدانىنداعى №17 ورتا مەكتەپتىڭ 11-سىنىپ وقۋشىسى جانگ ۇلىم اكەن لايىق دەپ تانىلدى.
«ولەڭ, مەن سەنى ايالاپ وتەم...» باعىتىندا اقىن ولەڭدەرىنە جازىلعان اندەردى جۇرەككە جەتكىزە ورىنداعان وقۋشىلار از بولمادى. دەگەنمەن, ءۇشىنشى جۇلدەنى نۇرعيسا تىلەنديەۆ اتىنداعى مامانداندىرىلعان مەكتەپ-ليتسەي-ينتەرناتىنىڭ 8, 9-سىنىبىندا وقيتىن اقبوتا ەرىكقىزى, اياۋلىم نۇرىموۆا, ءسابينا باۋىرجانوۆا, ءمولدىر ساميعوللاەۆا, يساتاي اۋدانىنداعى اققىستاۋ ورتا مەكتەبىنىڭ 9-سىنىپ وقۋشىسى جانەركە كەنجەمۇراتوۆا, اتىراۋ قالاسىندا ورنالاسقان №34 مەكتەپ-گيمنازياسىنىڭ 9-سىنىپ وقۋشىسى ابىلاي نۇرسۇلتان يەلەندى.
بۇل اتالىمداعى ەكىنشى ورىننىڭ بىرىنە قۇرمانعازى اۋدانىنان قاتىسقان ميلانا ساياسات يە بولدى. جاس ورەن قازاقتىڭ اياۋلى اقىنى فاريزا وڭعارسىنوۆانىڭ ەسىمى بەرىلگەن ورتا مەكتەپتىڭ 10-سىنىبىندا وقىپ ءجۇر. ونىمەن بىرگە جىلىوي اۋدانىنىڭ ورتالىعى – قۇلسارى قالاسىنداعى س.قارابالين اتىنداعى №15 مەكتەپتىڭ 10-سىنىپ وقۋشىسى ايسانا قۋانعا دا ءدال وسىنداي جۇلدە بەرىلدى.
ءان ورىنداۋشىلار توبىنداعى ءبىرىنشى جۇلدەنى ماقات اۋدانىنداعى ح.سانباەۆ اتىنداعى ورتا مەكتەپتىڭ 10-سىنىپ وقۋشىسى سىمبات ماڭعىستاۋ يەلەندى. جاس ونەرپازدىڭ اسەم داۋسى بار ەكەن.
بايقاۋدىڭ ءۇشىنشى باعىتى – فاريزا اقىننىڭ شىعارمالارىنان يلليۋستراتسيالىق سۋرەتتەر سالۋ. راس, سۋرەت سالۋ وڭاي ەمەس. الايدا قىلقالامدى سەرىك ەتۋگە تالپىنعان وقۋشىلاردىڭ سۋرەتتەرىنەن سىرلى بوياۋدىڭ سىرىنا بويلاعىسى كەلگەنى اڭعارىلدى. قازىلار ورتاق شەشىممەن «سارمات» مامانداندىرىلعان مەكتەپ-ليتسەي-ينتەرناتىنىڭ 10-سىنىپ وقۋشىسى ءمادي مارات ۇلىنىڭ, نۇرعيسا تىلەنديەۆ اتىنداعى مامانداندىرىلعان مەكتەپ-گيمنازيا-ينتەرناتىنىڭ 9-سىنىپ وقۋشىسى ءنۇربيبى ورازدىڭ, №3 ء«بىلىم-يننوۆاتسيا» ليتسەي-ينتەرناتىنىڭ 11-سىنىپ وقۋشىسى ديليارا مۇراتوۆانىڭ, ج.مولداعاليەۆ اتىنداعى مامانداندىرىلعان مەكتەپ ليتسەي-ينتەرناتىنىڭ 10-سىنىپ وقۋشىسى اليزە ىزبەرگەننىڭ تۋىندىلارىن ءۇشىنشى جۇلدەگە لايىق دەپ تاپتى.
اقىننىڭ شىعارمالارىن ءوزىنىڭ سۋرەتىنە ارقاۋ ەتكەن ج.قاراجىگىتوۆ اتىنداعى №16 مەكتەپ-ليتسەيىنىڭ 8-سىنىپ وقۋشىسى ميلانا سەرىك ەكىنشى جۇلدەنى يەلەندى. ال حاليدا وڭداسىن بالعىن سۋرەتشىلەر اراسىنداعى ءبىرىنشى جۇلدەنىڭ يەگەرى اتاندى. ول يندەر اۋدانىنداعى ق.اباحانوۆ اتىنداعى ورتا مەكتەپتىڭ 10-سىنىبىندا وقيدى.
ء«ۇش جىلدان بەرى سۋرەتشىلەر ۇيىرمەسىنە قاتىسىپ ءجۇرمىن. مەنى سۋرەت سالۋعا جەتەكشىم جانار مۇحامەتجانوۆا ۇيرەتەدى. بۇعان دەيىن ەكى رەسپۋبليكالىق سۋرەتشىلەر بايقاۋىنا قاتىسىپ, ەكەۋىندە دە ءۇشىنشى ورىن العان ەدىم. ال بۇل بايقاۋعا قاتىسۋ ماقساتىندا فاريزا وڭعارسىنوۆانىڭ ولەڭدەرىن قايتا-قايتا وقىدىم. ويتكەنى سۋرەتتى اقىننىڭ شىعارماشىلىعىمەن بايلانىستىرۋ قاجەت بولدى. بايقاۋدىڭ ءبىرىنشى جۇلدەسىن العانىما قۋانىپ تۇرمىن», دەيدى حاليدا وڭداسىن.
اقىن شىعارماشىلىعىنا ارنالعان بايقاۋعا قاتىسقان جاۋقازىن جەتكىنشەكتەر جالىنداپ تۇرعانىن بايقادىق. ويتكەنى اقىننىڭ جۇرەكتە عانا جاتتالاتىن, مەيىرىڭدى قاندىراتىن كاۋسار جىرلارى جاس بۋىنعا جالىن بەرگەنى داۋسىز.
اتىراۋ وبلىسى