باس جۇلدە – «بولماعان بالالىق شاقتا»

فەستيۆالگە ساراپشىلار كەڭە­سىنىڭ شەشىمىمەن ىرىك­تەۋدەن وتكەن 10 تەاتر قاتىسىپ, باق سى­ناستى. بىرنەشە كۇن قاتارىنان بول­عان قويىلىمداردى ەلىمىزدىڭ تانىمال تەاتر سىنشىلارىنان قۇرالعان قازىلار القاسى باعالادى. العاشقى كۇنى تەاتر فويەسىندە كونفەرەنتسيا ۇيىم­داستىرىلىپ, كسرو حالىق ءارتىسى ءاسانالى ءاشىموۆ, قازاقستاننىڭ حالىق ءارتىسى تۇڭعىشباي جامانقۇلوۆ, ق­ازاقستان جازۋشىلار وداعىنىڭ توراعاسى مەرەكە قۇلكەنوۆ, قازاقستاننىڭ ەڭبەك سiڭiرگەن قايراتكەرi نۇرلان سانجار ۇلى سەكىلدى بەلگىلى تۇلعالار باق وكىلدەرى تارا­پىنان قويىلعان سۇراقتارعا جاۋا­پ بەردى. ساۋالدىڭ كوبى قوجانىڭ ءرولىن سوم­داعان نۇرلان سانجار ۇلىنا قويىلدى. كونفەرەنتسيادان سوڭ دا جينالعانداردىڭ كوبى «قوجانى» قاۋ­مالاپ العان. بۇل جەردە ول وسكەمەندە وقى­عانىن ايتىپ, ازدى-كوپتى ەستەلىگىمەن ءبولىستى.

فەستيۆال شىمىلدىعىن ج.ايماۋى­توۆ اتىنداعى پاۆلودار وبلىستىق قازاق مۋزىكالىق دراما تەاترى ب.سوقپاق­باەۆ­تىڭ «مەنىڭ اتىم – قوجا» قويىلى­مىمەن اشىپ, استانانىڭ جاستار تەاتر­ى «كوزىمە ءبىر كورىنسەڭ, بالا عاشىق» كورىنىسىمەن جاپتى. ءيا, ەكەۋى دە مەرەيتوي يەسى بەر­دىبەك سوقپاقباەۆتىڭ شى­عارماسى نەگىزىندە ساحنالانعان. ءسويتىپ, جابىلۋ سالتاناتىندا ەلىمىزدىڭ ءتورت بۇرىشىنان جينالعان تەاتر ارتىستەرى ماراپاتتالىپ, قوشەمەت كورسەتىلدى.

– وسىنداي ۇلكەن ونەر دوداسى وس­كە­مەندە, شىعىستىڭ تورىندە ءوتىپ جاتقانىنا قۋانىشتىمىز. جالپى, قان­داي دا شارانى جوعارى دەڭگەيدە ۇيىمداس­تىرۋعا ارقاشان دايىنبىز, – دەدى شقو مادەنيەت باسقارماسى باسشىسىنىڭ مىندەتىن اتقارۋشى سامات كاسەنوۆ.

سونىمەن, ماراپاتتاۋ بارىسىندا «ەكىنشى پلانداعى ۇزدىك ايەل» ءرولى «مۇ­عالىم» قويىلىمىنداعى ناريماننىڭ اجەسىن سومداعان ب. ريموۆا اتىنداعى تال­دىقورعان دراما تەاترىنىڭ ءارتىسى ءالي­حان ىدىرىشەۆاعا بەرىلدى. ءار ماراپاتتاۋدان كەيىن جەرگىلىكتى انشىلەر اننەن شاشۋ شاشىپ, بيشىلەر مىڭ بۇرالا ونەر كورسەتۋمەن بولدى.

 «ەكىنشى پلانداعى ۇزدىك ەر ادام» اتالىمى بويىنشا رەسپۋبليكالىق نەمىس دراما تەاترى قويعان «Wolgakinder» سپەكتاكلىندە ۆاسكا ءرولىن ويناعان زاڭعار احمەتقازىعا ۇسىنىلدى.

«ۇزدىك رەجيسسەرلىك شەشىم» اتالىمى بويىنشا ت.احتانوۆ اتىنداعى اقتوبە وب­لىستىق دراما تەاترى ماراپاتتالىپ, 1 ملن 500 تەڭگەنىڭ سەرتيفيكاتى تابىس­تالدى. ايتا كەتەيىك, ءار اتالىم يەگەرى اقشالاي سىيلىققا يە بولدى.

بەردىبەك سوقپاقباەۆ اتىنداعى ارنايى سىيلىققا قازىلار شەشىمىمەن «مەنىڭ اتىم – قوجا» قويىلىمى لايىق دەپ تابىلدى. ايتىپ وتكەندەي, فەس­تيۆال­دىڭ العاشقى كۇنىندە ج.ايماۋىتوۆ اتىنداعى پاۆلودار وبلىستىق قازاق مۋزى­كالىق دراما تەاترى «قوجانى» ساحناعا الىپ شىعىپ, كورەرمەندى بىردە كۇلدىرىپ, بىردە مۇڭايتقان.

– وسى بەس كۇن ونەر مەرەكەسى بولدى. ءبىز جىل سايىن رەسپۋبليكالىق فەستيۆالدى ەلىمىزدىڭ ءار قالاسىندا وتكىزەمىز. ال بالالارعا ارنالعان فەستيۆال ەكىنشى رەت قانا بولىپ وتىر. بيىل بەردىبەك سوق­پاقباەۆتىڭ 100 جىلدىعىنا ارنادىق. تەاتر ونەرى ورلەي بەرسىن, – دەدى مادەنيەت جانە اقپارات مينيسترلىگى مادەنيەت كوميتەتىنىڭ تەاتر ونەرى باسقارماسىنىڭ باس ساراپشىسى گۇلنافيس مىرزاشەۆا.

سونداي-اق جابىلۋ سالتاناتىندا شى­عىس قازاقستان وبلىسى اكىمىنىڭ ارنايى سىيلىعى, ياعني 2 ملن 500 مىڭ تەڭگەنىڭ سەرتيفيكاتى تابىستالدى. وعان شىعىس قازاقستان وبلىستىق دراما جانە وپەرەتتا تەاترى قويعان «قار قىزىن» لايىقتى كورىپتى.

كوزىقاراقتى كورەرمەن بەردىبەك سوقپاقباەۆتىڭ 100 جىلدىعىنا ارنالعان قازاقستان دراما تەاترلارىنىڭ ححح رەسپۋبليكالىق فەستيۆالىندە جۇزدەن جۇيرىك شىققان قاي تەاتر ەكەن دەپ تاعاتسىزدانا كۇتتى. گران-پري جۇلدەسى حابار­لانعانعا دەيىن جەرگىلىكتى ونەرپاز­دارمەن بىرگە جاس جۇلدىز قوبىلاندى بولات ونەر كورسەتتى.

سونىمەن, ءان-شاشۋلاردان سوڭ ساحناعا شىققان اكتەر, كەش جۇرگىزۋشىسى نارتاي ساۋدانبەك ۇلى جەڭىمپازدى حابارلاۋعا ورتاعا قازىلار القاسىنىڭ توراعاسى, تەاتر سىنشىسى, پروفەسسور سانيا قابديەۆانى شاقىرعان. ول فەستيۆال تۋرالى ءوز ويىن قىسقاشا قايىرىپ, جەڭىمپاز تەاتر­دى, ياعني ءا.مامبەتوۆ اتىنداعى مەم­لەكە­تىك دراما جانە كومەديا تەاترى وكىلىن ورتاعا شاقىرىپ, سەرتيفيكات تابىس­تادى, قۇرمەت كورسەتتى. وسىلايشا, دراماتۋرگ اق­بەرەن ەلگەزەكتىڭ شىعارماسى نەگى­زىندەگى «بولماعان بالالىق شاق» قويىلىمى «ۇزدىك سپەكتاكل» اتالىمىن جەڭىپ الدى. جەتىم بالانىڭ تاعدىرىنان سىر شەرتەتىن اۆتوبيوگرافيالىق تۋىندى اۆتور­دىڭ كومەسكى تارتقان بالالىق شاعىن سۋرەتتەيدى. اۆتوردىڭ قيالىنداعى عۇمىرى, كورگەن تاۋقىمەتى, ارپالىسقا تۇسكەن باقىتسىز كۇندەرى كورسەتىلەدى. اكە­سىنەن جاستايىنان ايىرىلعان ول قور­­شاعان ورتادان پانا ىزدەگەن. سويتە ءجۇرىپ, بۇگىنگى زاماننىڭ تۇلعاسىنا اينالا ءبىلدى. وسىنداي تاعدىرلى قويىلىمدى كورەر­مەن جۇرەگىنە جەتكىزگەن تەاتر ۇجى­مىنىڭ ەڭبەگى ەلەندى, ەسكەرىلدى. دۋ قول شاپالاقپەن, ونەرگە دەگەن ىستىق ماحابباتپەن فەستيۆال شىمىلدىعى جابىلدى. كورەر­مەن قاۋىم بەس كۇن قاتارىنان ونەر كورسەتكەن ارتىستەرمەن قيماي-قيماي قوش ايتىستى.

وسكەمەن